Irfan Pathan: ప్రతిసారి అలాంటి బౌలర్ దొరకడు.. ఉన్నప్పుడే వాడుకోవాలి, ఆడినా ఆడకున్నా జట్టులో ఉంచాలి

ఐర్లాండ్ పర్యటనలోనైనా

ఈ నెలాఖరులో ఐర్లాండ్ పర్యటనకు టీమిండియా వెళ్లనుంది. ఐర్లాండ్‌తో భారత్ రెండు టీ20లు ఆడనుంది. ఐర్లాండ్ పర్యటనలోనైనా ఉమ్రాన్ మాలిక్ తుది జట్టులో ఎంపిక అవుతాడో కాడో అనేది సందిగ్ధమే. ఇక టీ20 ప్రపంచకప్‌లో టీమిండియా జట్టుకు ఉమ్రాన్ ఎంపికయ్యే అవకాశాలున్నాయా అని స్టార్ స్పోర్ట్స్‌ వ్యాఖ్యాత ఇర్ఫాన్ పఠాన్‌ను అడగ్గా అతను స్పందిస్తూ.. 'ఉమ్రాన్ ఇంకా ఒక్క మ్యాచ్ కూడా ఆడలేదు, అతను ఇంకా అరంగేట్రమే చేయలేదు. మొదట అతన్ని డెబ్యూ చేయనియండి. డెబ్యూ చేశాక అతను ఎలా ఆడతాడో చూద్దాం. అతను అరంగేట్రం చేశాక.. అతను ఫెయిల్ అయితే మాత్రం అతన్ని పక్కన పెట్టవద్దు.' అని పఠాన్ పేర్కొన్నాడు.

మనకు 150కి.మీ వేగంతో బౌలింగ్ చేసే బౌలర్లు లేరు

ఇండియాకు 150కి.మీ వేగంతో బౌలింగ్ చేసే బౌలర్ దాదాపు ఎప్పుడూ లేరు, ఇప్పుడు మనకో బౌలర్ ఉన్నాడు. కాబట్టి అతన్ని జాగ్రత్తగా లాంగ్ రన్లో ఇండియా జట్టుతో పాటు కొనసాగించాలి. అతని లాంగ్ రన్ ఏమిటో, అతని ఫిట్‌నెస్ అతనికి ఎంత వరకు ఉపయుక్తమవుతుందో చూడాలి.' అని పఠాన్ అభిప్రాయపడ్డాడు. ఉమ్రాన్ మాలిక్ స్పెషాలిటీ ఏంటంటే అతని రా పేస్. ఎలాగైనా సెలెక్టర్లు, టీమ్ మేనేజ్‌మెంట్ అతన్ని పట్టుదలగా జట్టుతో పాటు ముందుకు తీసుకెళ్లాలని కోరాడు.

స్పీడ్‌గా బౌలింగ్ చేయించడం ఎవరి తరం కాదు

ఇక పఠాన్ మాట్లాడుతూ.. అంత మంచి రా పేస్ మీకు లేదు నాకు లేదు. ఎవరికీ వేగంగా బౌలింగ్ చేయడం మనం నేర్పలేం. అది వారి శక్తి, సహజత్వం మేరకు అబ్బుతుంది. ఇర్ఫాన్ పఠాన్ కానివ్వండి.. ప్రపంచంలోని అత్యుత్తమ మెంటర్ లేదా కోచ్ కానివ్వండి.. వేగవంతమైన బౌలింగ్ నేర్పలేం. కానీ అతని వేగానికి సరైన లయ దొరికి రాణించే మెలకువలను మాత్రం అతనికి నేర్పగలం. ఇకపోతే అతనిని ఎలాగైనా ఇండియా తరఫున అరంగేట్రం చేసేలా చేయండి. అతను ఒక వేళ రాణిస్తే.. జట్టులో కొనసాగనివ్వండి. రాణించకపోతే అతన్ని పట్టుదలగా జట్టుతో పాటు ముందుకు తీసుకెళ్లండి. ఎందుకంటే మనకు అలాంటి బౌలర్ ప్రతిసారీ దొరకడు' అని పఠాన్ అన్నాడు.