ఐపియల్ పై ప్రణబ్, చిదంబరాలతో విచారణ?

న్యూఢిల్లీ: ఐపియల్ వ్యవహారాలపై కేంద్ర మంత్రులు ప్రణబ్ ముఖర్జీ, చిదంబరాలతో విచారణ జరిపించేందుకు ప్రభుత్వం సిద్ధమవుతున్నట్లు తెలుస్తోంది. ఐపియల్ వ్యవహారాలపై సంయుక్త పార్లమెంటరీ కమిటీ వేయాలని ప్రతిపక్షాలు చేస్తున్న డిమాండ్ పై చర్చించడానికి ప్రధాని మన్మోహన్ సింగ్, కాంగ్రెసు అధ్యక్షురాలు సోనియా గాంధీ శుక్రవారం సాయంత్రం సమావేశమవుతున్నారు.

కాంగ్రెసు పార్టీ కోర్ గ్రూప్ పరిస్థితిని సమీక్షించి తగిన నిర్ణయం తీసుకునే అవకాశం ఉంది. ప్రతిపక్షాలు డిమాండ్ పై ప్రతిస్పందిస్తూ కేంద్ర ఆర్థిక మంత్రి ప్రణబ్ ముఖర్జీ లోకసభలో తక్షణమే నిర్ణయం తీసుకోలేమని, ప్రతిపక్షాల డిమాండ్ ను పరిగణనలోకి తీసుకుంటున్నామని ఆయన చెప్పారు. తాను ప్రధానికి విషయాన్ని చెబుతానని, తగిన నిర్ణయం తీసుకుని పార్లమెంటుకు వస్తామని ఆయన చెప్పారు.