వేలంలో భారీ ధర.. చిందేసిన హెట్‌మెయిర్‌ (వీడియో)

ఢిల్లీకి హెట్‌మెయిర్‌:

ఆసీస్ ఆటగాళ్ల తర్వాత ఫ్రాంచైజీలు వెస్టిండీస్‌ ఆటగాళ్లపై కన్నేశారు. పేసర్ షెల్డాన్‌ కాట్రెల్, బ్యాట్స్‌మన్‌ షిమ్రోన్‌ హెట్‌మెయిర్‌లకు భారీ ధర పలికింది. కింగ్స్‌ లెవెన్‌ పంజాబ్‌ రూ.8.50 కోట్లకు కాట్రెల్‌ను కనుగోలు చేయగా.. రూ.7.75 కోట్లకు హెట్‌మెయిర్‌ను ఢిల్లీ క్యాపిటల్స్‌ దక్కించుకుంది. దీంతో ఈ ఇద్దరు ఆటగాళ్లు ఆనందంలో తేలాడుతున్నారు.

చిందేసిన హెట్‌మెయిర్‌:

ప్రస్తుతం భారత పర్యటనలో ఉన్న షిమ్రోన్‌ హెట్‌మెయిర్‌ ఆనందంతో హోటల్ గదిలోనే చిందేశాడు. వేలంను లైవ్ ద్వారా చూస్తున్న హెట్‌మెయిర్‌.. తనను ఢిల్లీ భారీ మొత్తంలో కనుగోలు చేయడంతో సంతోషంలో చిందులేశాడు. ఈ వీడియోను ఢిల్లీ క్యాపిటల్స్‌ తన ట్విటర్‌ ఖాతాలో పోస్ట్ చేసింది. 'హెట్‌మెయిర్.. ఢిల్లీ జట్టులోకి స్వాగతం. మన అభిమానులకు నీ అనుభూతిని పంచగలవా?. వేలం అనంతరం హెట్‌మెయిర్‌ ఇలా' అని ట్వీట్‌ చేసింది.

తొలి వన్డేలో మెరుపు సెంచరీ:

బెంగళూరు హెట్‌మెయిర్‌ను వదులుకోగా.. కనీస ధరతో వేలంలోకి వచ్చిన అతడి కోసం ఢిల్లీ, కోల్‌కతా, రాజస్థాన్‌ పోటీపడ్డాయి. చివరకు ఢిల్లీ భారీ ధరతో సొంతం చేసుకుంది. ప్రస్తుతం హెట్‌మెయిర్‌ భారత పర్యటనలో అద్భుతంగా రాణిస్తున్నాడు. తొలి వన్డేలో మెరుపు సెంచరీతో చెలరేగాడు. ఇక టీ20 సిరీస్‌లో ఫర్వాలేదనిపించాడు. వెస్టిండీస్‌ తరఫున 16 టెస్టులు, 41 వన్డేలు, 20 టీ20లు ఆడాడు. టెస్ట్ ఫార్మాట్‌లో 838 పరుగులు, వన్డేల్లో 1,379 పరుగులు, టీ20ల్లో 279 పరుగులు చేశాడు.