భారత్‌లో టాప్.. లంకలో ఫ్లాప్..బుడ్డోడికి అసలైన పరీక్ష!

ఐపీఎల్ 2026 సీజన్‌లో సిక్సర్ల వర్షం కురిపించి భారత క్రికెట్ వర్గాల దృష్టిని ఆకర్షించిన యువ సంచలనం వైభవ్ సూర్యవంశీకి శ్రీలంక పర్యటన రూపంలో ఓ పెద్ద అగ్నిపరీక్ష ఎదురైంది. భారత పిచ్‌లపై బౌలర్లను సులువుగా ఎదుర్కొన్న ఈ 15 ఏళ్ల యువ బ్యాటర్‌కు విదేశీ పరిస్థితులు, ముఖ్యంగా శ్రీలంకలోని పిచ్‌లు తీవ్ర సవాలు విసిరాయి. ఇండియా-ఎ జట్టుతో కలిసి వెళ్లిన వైభవ్, అక్కడ తన సహజసిద్ధమైన ఆటతీరును ప్రదర్శించలేక తీవ్రంగా ఇబ్బంది పడుతున్నాడు.

ఇటీవల ముగిసిన ఐపీఎల్ 2026 సీజన్ లో అద్భుత ఆటతీరును కనబరిచిన వైభవ్ సూర్యవంశీ కేవలం 16 మ్యాచ్‌లలో ఏకంగా 776 పరుగులు సాధించడం విశేషం. ఇందులో రికార్డు స్థాయిలో 72 సిక్సర్లు కొట్టి అందరినీ ఆశ్చర్యపరిచాడు. అయితే శ్రీలంక వేదికగా ప్రస్తుతం సాగుతున్న ముక్కోణపు వన్డే సిరీస్‌లో మాత్రం అతని బ్యాట్ పూర్తిగా మూగబోయింది. ఆడిన నాలుగు మ్యాచ్‌ల్లో కేవలం 14, 44, 21, 38 పరుగులు మాత్రమే చేయగలిగాడు. ఇందులో బలహీనమైన ఆఫ్ఘనిస్థాన్-ఎ జట్టుపై మాత్రమే కాస్త నిలదొక్కుకున్నప్పటికీ.. బలమైన ప్రత్యర్థి శ్రీలంక-ఎ పై రెండు సార్లూ దారుణంగా విఫలమయ్యాడు.

వైభవ్ బలహీనతను టార్గెట్ చేస్తున్న శ్రీలంక బౌలర్లు

ఐపీఎల్ ఫ్లాట్ పిచ్‌లపై ఎటువంటి భయం లేకుండా భారీ షాట్లు ఆడిన వైభవ్‌కు, శ్రీలంకలోని భారీ మైదానాలు సరికొత్త పాఠాలు నేర్పాయి. క్రీజులో ఎక్కువ సమయం గడపాలనే తపన ఉన్నప్పటికీ.. సరైన షాట్ సెలక్షన్ లేకపోవడం వైభవ్ సూర్యవంశీ కొంపముంచింది. ముఖ్యంగా షార్ట్ పిచ్ బంతులను ఎదుర్కోవడంలో వైభవ్ సూర్యవంశీ సాంకేతిక లోపాలు స్పష్టంగా బయటపడ్డాయి. టోర్నీలో ఆడిన 4 ఇన్నింగ్స్‌లలో రెండు సార్లు కేవలం షార్ట్ పిచ్ బంతులకే పుల్ షాట్లు ఆడబోయి క్యాచ్ అవుట్ కావడం వైభవ్ సూర్యవంశీ బలహీనతను ఎత్తిచూపుతోంది.

ఆదివారం జరగబోయే ముక్కోణపు సిరీస్ ఫైనల్ మ్యాచ్ వైభవ్‌కు అత్యంత కీలకంగా మారనుంది. ఈ మ్యాచ్ లో రాణించడం ద్వారా విమర్శకులకు దీటైన సమాధానం ఇచ్చే అవకాశం వైభవ్ సూర్యవంశీకి లభిస్తుంది. ఒకవేళ ఇక్కడ విఫలమైనా ఆందోళన చెందాల్సిన అవసరం లేదు. వైభవ్ తన ఆటను మెరుగుపరుచుకునేందుకు బీహార్‌ జట్టును వీడి, బలమైన జట్లు పోటీపడే ఎలైట్ గ్రూప్ దేశీయ జట్టుకు ఆడాలని క్రీడా విశ్లేషకులు సూచిస్తున్నారు. తద్వారా రెడ్ బాల్, వైట్ బాల్ ఫార్మాట్లలో మరింత రాటుదేలే అవకాశం ఉంటుంది.

భారత ప్రధాన కోచ్ గౌతమ్ గంభీర్, చీఫ్ సెలక్టర్ అజిత్ అగార్కర్ ఈ అద్భుత ప్రతిభ కలిగిన యంగ్ క్రికెటర్ భవిష్యత్తు కోసం ఒక దీర్ఘకాలిక ప్రణాళికను సిద్ధం చేయాల్సి ఉంటుంది. త్వరలోనే ఐర్లాండ్, ఇంగ్లాండ్ పర్యటనలకు వెళ్లే భారత టీ20 క్రికెట్ జట్టులో కూడా వైభవ్ సభ్యుడిగా ఉన్నాడు. ఈ పర్యటనలకు ముందు అతని లోపాలను సరిదిద్ది, బీసీసీఐ సరైన రోడ్‌మ్యాప్‌ను అందిస్తే, 15 ఏళ్ల వైభవ్ రాబోయే రోజుల్లో అంతర్జాతీయ క్రికెట్ కు ఒక నమ్మకమైన ఆయుధంగా మారతాడనడంలో ఎటువంటి సందేహం లేదు.