విజయయాత్రకు బ్రేక్.. రాజస్థాన్ ఓటమికి అసలు విలన్లు వీరే!

IPL 2026: ఐపీఎల్ 2026 సీజన్లో రాజస్థాన్ రాయల్స్ జైత్రయాత్రకు బ్రేక్ పడింది. వరుస విజయాలతో దూసుకుపోతున్న రాజస్థాన్ రాయల్స్‌కు సన్‌రైజర్స్ హైదరాబాద్ షాక్ ఇచ్చింది. హైదరాబాద్‌లోని రాజీవ్ గాంధీ ఇంటర్నేషనల్ స్టేడియంలో జరిగిన 21వ ఉత్కంఠభరిత పోరులో సన్‌రైజర్స్ హైదరాబాద్ 37 పరుగుల తేడాతో ఘనవిజయం సాధించింది. ఈ సీజన్లో రాజస్థాన్ జట్టుకు ఇదే తొలి ఓటమి కావడం గమనార్హం. టాస్ ఓడి ముందుగా బ్యాటింగ్ చేసిన సన్‌రైజర్స్ హైదరాబాద్ నిర్ణీత 20 ఓవర్లలో 6 వికెట్ల నష్టానికి 216 పరుగుల భారీ స్కోరు సాధించింది. అనంతరం 217 పరుగుల భారీ లక్ష్యంతో బరిలోకి దిగిన రాజస్థాన్ రాయల్స్.. హైదరాబాద్ బౌలర్ల ధాటికి 19 ఓవర్లలో కేవలం 159 పరుగులకే కుప్పకూలింది.

రాజస్థాన్ పతనానికి కారణమైన ఆటగాళ్లు వీరే..
రాజస్థాన్ రాయల్స్ ఓటమిలో ఈ ఐదుగురు ఆటగాళ్ల ప్రదర్శన జట్టును కోలుకోలేని దెబ్బ తీసింది. వారి గురించి ఇప్పుడు తెలుసుకుందాం.

తుషార్ దేశ్‌పాండే: బౌలింగ్‌లో రాజస్థాన్‌కు పెద్ద మైనస్‌గా మారాడు. తన 4 ఓవర్ల కోటాలో ఏకంగా 55 పరుగులు సమర్పించుకుని కేవలం ఒకే ఒక వికెట్ తీశాడు. తుషార్ దేశ్‌పాండే ధారాళంగా పరుగులు ఇవ్వడం వల్ల సన్‌రైజర్స్ హైదరాబాద్ భారీ స్కోరు సాధించగలిగింది.

వైభవ్ సూర్యవంశీ: ఈ సీజన్‌లో మంచి ఫామ్‌లో ఉన్న 15 ఏళ్ల యువ సంచలనం వైభవ్ సూర్యవంశీ ఈ కీలక మ్యాచ్‌లో గోల్డెన్ డక్ (0) అవుట్ అయి నిరాశపరిచాడు. ప్రఫుల్ హింగే బౌలింగ్‌లో వైభవ్ పెవిలియన్ చేరడం రాజస్థాన్ ఛేజింగ్‌ను దెబ్బతీసింది.

యశస్వి జైస్వాల్: ఇన్-ఫామ్ ఓపెనర్ జైస్వాల్ కూడా ఈ మ్యాచ్‌లో చేతులెత్తేశాడు. కేవలం 5 బంతుల్లో 1 పరుగు మాత్రమే చేసి అరంగేట్రం చేసిన సాబిక్ హుస్సేన్ బౌలింగ్‌లో ఔట్ అయ్యాడు.

ధ్రువ్ జురేల్: మూడో నంబర్‌లో బ్యాటింగ్‌కు వచ్చిన ధ్రువ్ జురేల్ కూడా ఖాతా తెరవకుండానే డకౌట్ అయ్యాడు. ప్రఫుల్ హింగే బౌలింగ్‌లో క్లీన్ బౌల్డ్ అవ్వడం జట్టుపై తీవ్ర ఒత్తిడిని పెంచింది.

సందీప్ శర్మ: అనుభవజ్ఞుడైన పేసర్ సందీప్ శర్మ కూడా ఈ మ్యాచ్‌లో విఫలమయ్యాడు. 4 ఓవర్లలో 52 పరుగులు ఇచ్చి కేవలం ఒక వికెట్ మాత్రమే తీశాడు. డెత్ ఓవర్లలో సందీప్ శర్మ భారీగా పరుగులు ఇవ్వడం రాజస్థాన్‌కు ప్రతికూలంగా మారింది.

ఈ పరాజయంతో రాజస్థాన్ రాయల్స్ తమ తప్పులను సరిదిద్దుకోవాల్సిన పరిస్థితి ఏర్పడింది, మరోవైపు సన్‌రైజర్స్ హైదరాబాద్ ఈ భారీ విజయం ద్వారా టోర్నీలో ఆత్మవిశ్వాసాన్ని పెంచుకుంది.