హిట్ మ్యాన్ మాయాజాలం: ఒక్క సైగ కొట్టిండు, వికెట్ ఎగిరింది!

ఐపీఎల్ 2026 సీజన్ ముంబై ఇండియన్స్ అభిమానులకు నిరాశను మిగులుస్తోంది. ముంబై జట్టు స్టార్ బ్యాటర్, మాజీ కెప్టెన్ రోహిత్ శర్మ హ్యామ్‌స్ట్రింగ్ గాయం కారణంగా గత కొన్ని మ్యాచ్‌లకు దూరమయ్యాడు. ఆర్సీబీతో జరిగిన 20వ మ్యాచ్‌లో బ్యాటింగ్ చేస్తూ రిటైర్డ్ హర్ట్ అయిన రోహిత్.. అప్పటి నుంచి ప్లేయింగ్ ఎలెవన్‌లో కనిపించలేదు. అయితే మైదానంలో బ్యాట్ పట్టకపోయినా.. డగౌట్‌లో కూర్చుని తన అపారమైన అనుభవంతో ముంబై ఇండియన్స్ జట్టుకు వెన్నుముకలా నిలుస్తున్నారు. తాజాగా సీఎస్కేతో జరిగిన మ్యాచ్‌లో ఆయన చాణక్య వ్యూహం మరోసారి చర్చనీయాంశమైంది.

డగౌట్ నుంచి పంపిన సంకేతం.. ఫలించిన వ్యూహం
చెన్నైలోని చెపాక్ స్టేడియం వేదికగా జరిగిన ఈ హై-వోల్టేజ్ మ్యాచ్‌లో ముంబై బౌలర్లు మొదట్లో తడబడ్డారు. ముఖ్యంగా పవర్ ప్లే సమయంలో సీఎస్కే బ్యాటర్ ఉర్విల్ పటేల్ కేవలం 12 బంతుల్లోనే 2 ఫోర్లు, 2 సిక్సర్లతో 24 పరుగులు చేసి ముంబై బౌలర్లను ఒత్తిడిలోకి నెట్టాడు. సీఎస్కే స్కోరు వేగంగా పెరుగుతున్న తరుణంలో డగౌట్లో ఉన్న రోహిత్ శర్మ పరిస్థితిని గమనించి స్పిన్నర్‌ను రంగంలోకి దించాలని కెప్టెన్ హార్దిక్ పాండ్యాకు సూచించాడు. రోహిత్ అంచనాను గౌరవించిన హార్దిక్ పాండ్యా.. ఆరో ఓవర్లో స్పిన్నర్ అల్లా ఘజన్‌పర్‌కు బంతిని అందించాడు. రోహిత్ వ్యూహం అద్భుతంగా పనిచేసి.. ఘజన్‌పర్ తన ఓవర్ నాలుగో బంతికే ధాటిగా ఆడుతున్న ఉర్విల్ పటేల్‌ను క్లీన్ బౌల్డ్ చేశాడు.

కెప్టెన్సీ లేకపోయినా.. జట్టులో రోహిత్ ప్రభావం
రోహిత్ శర్మ ఐపీఎల్ చరిత్రలో అత్యంత విజయవంతమైన కెప్టెన్ అని అందరికీ తెలిసిందే. 2013 నుంచి 2023 వరకు ముంబై ఇండియన్స్ సారథిగా ఉన్న రోహిత్ శర్మ.. జట్టుకు ఐదు పతకాలు అందించాడు. 2024లో హార్దిక్ పాండ్యాకు కెప్టెన్సీ బాధ్యతలు బదిలీ అయినప్పటికీ.. సంక్లిష్ట పరిస్థితుల్లో జట్టు ఇప్పటికీ రోహిత్ సలహాల కోసమే చూస్తుంది. డగౌట్ నుంచి ఆయన చేసిన ఈ 'రిమోట్ కంట్రోల్' కెప్టెన్సీ సోషల్ మీడియాలో వైరల్ అయ్యింది. స్టార్ స్పోర్ట్స్ కూడా రోహిత్ చాకచక్యాన్ని మెచ్చుకుంటూ ప్రత్యేకంగా పోస్ట్ షేర్ చేయడం ఆయనకున్న క్రేజ్‌ను తెలియజేస్తోంది.

పోరాడి ఓడిన ముంబై ఇండియన్స్
రోహిత్ వ్యూహంతో ఓ ముఖ్యమైన వికెట్ దక్కినప్పటికీ.. ముంబై ఇండియన్స్‌కు విజయం మాత్రం దక్కలేదు. టాస్ గెలిచి బ్యాటింగ్ ఎంచుకున్న ముంబై, నిర్ణీత 20 ఓవర్లలో 7 వికెట్ల నష్టానికి 159 పరుగులు మాత్రమే చేయగలిగింది. ఒకానొక దశలో 11 ఓవర్లకు 99 పరుగులతో పటిష్టంగా ఉన్న ముంబై.. ఆ తర్వాత వరుస వికెట్లు కోల్పోయి తక్కువ స్కోరుకే పరిమితమైంది. అనంతరం 160 పరుగుల లక్ష్యంతో బరిలోకి దిగిన సీఎస్కే.. కెప్టెన్ రుతురాజ్ గైక్వాడ్ (67 నాటౌట్), కార్తీక్ శర్మ (54 నాటౌట్) అద్భుత ఇన్నింగ్స్‌లతో మరో 2 ఓవర్లు మిగిలి ఉండగానే 8 వికెట్ల తేడాతో విజయం సాధించింది. ఈ విజయంతో సీఎస్కే పాయింట్ల పట్టికలో తన స్థానాన్ని మరింత మెరుగుపరుచుకుంది.