మూడు జట్లు అవుట్.. ప్లేఆఫ్స్ వేటలో కోల్‌కతా ట్విస్ట్!

ఐపీఎల్ 2026లో శనివారం జరిగిన 60వ మ్యాచ్‌లో కోల్‌కతా నైట్ రైడర్స్ (కేకేఆర్) గుజరాత్ టైటాన్స్‌ను 29 పరుగుల తేడాతో ఓడించి ప్లేఆఫ్స్ రేసును ఉత్కంఠగా మార్చింది. ఈ విజయంతో కేకేఆర్ టోర్నమెంట్‌లో నిలిచి, 12 మ్యాచ్‌లలో 5 విజయాలతో 11 పాయింట్లతో ప్రస్తుతం 7వ స్థానానికి చేరుకుంది.ప్లేఆఫ్స్ బెర్తు సాధించాలంటే కేకేఆర్ మిగిలిన రెండు మ్యాచ్‌లను భారీ తేడాతో గెలిచి, ఇతర జట్ల ఫలితాలపై ఆశించాల్సి ఉంటుంది. మరోవైపు, ఓటమి పాలైనప్పటికీ గుజరాత్ టైటాన్స్ (జీటీ) 13 మ్యాచ్‌లలో 16 పాయింట్లతో పట్టికలో రెండో స్థానంలో పటిష్టంగా ఉంది.

టేబుల్ టాపర్ ఆర్సీబీ

టాప్-2లో స్థానం ఖాయం చేసుకోవాలంటే గుజరాత్ టైటాన్స్ తమ చివరి లీగ్ మ్యాచ్‌లో చెన్నై సూపర్ కింగ్స్‌ను ఓడించాలి. ప్రస్తుత పట్టిక ప్రకారం, రాయల్ ఛాలెంజర్స్ బెంగళూరు (ఆర్‌సీబీ) 12 మ్యాచ్‌లలో 8 విజయాలు, అత్యుత్తమ నెట్ రన్ రేట్ (+1.053) తో 16 పాయింట్లతో అగ్రస్థానంలో కొనసాగుతోంది. ప్లేఆఫ్స్‌లో తమ స్థానాన్ని అధికారికంగా ఖాయపరచుకోవాలంటే ఆర్‌సీబీకి మిగిలిన రెండు మ్యాచ్‌లలో కేవలం ఒక విజయం సాధిస్తే సరిపోతుంది.

మూడో స్థానంలో సన్ రైజర్స్

సన్‌రైజర్స్ హైదరాబాద్ 12 మ్యాచ్‌లలో 14 పాయింట్లతో మూడో స్థానంలో నిలిచింది. ప్లేఆఫ్స్‌కు సురక్షితంగా చేరుకోవడానికి వారికి మిగిలిన రెండు మ్యాచ్‌లలో ఒక విజయం అవసరం.

పంజాబ్ కింగ్స్ 12 మ్యాచ్‌లలో 6 విజయాలు, 5 ఓటములు, 1 డ్రా మ్యాచ్‌తో 13 పాయింట్లతో నాల్గవ స్థానంలో పటిష్టంగా నిలిచింది. ప్లేఆఫ్స్ బెర్తును పక్కా చేసుకోవాలంటే మిగిలిన రెండు కీలక మ్యాచ్‌లను గెలిచి 17 పాయింట్లకు చేరాలి.

ప్లేఆఫ్స్ రేసులో రాజస్థాన్ రాయల్స్ (ఆర్‌ఆర్) , చెన్నై సూపర్ కింగ్స్ (సీఎస్‌కే) తలా 12 పాయింట్లతో వరుసగా ఐదవ, ఆరవ స్థానాల్లో కొనసాగుతున్నాయి. రాజస్థాన్ కేవలం 11 మ్యాచ్‌లు మాత్రమే ఆడింది, దీంతో వారికి 16 పాయింట్లు సాధించే మెరుగైన అవకాశం ఉంది.

డిఫెండింగ్ ఛాంపియన్ సీఎస్కే (12 మ్యాచ్‌లు, 12 పాయింట్లు)కు ప్రతీ మ్యాచ్ నాకౌట్ లాంటిదే. చెన్నై తమ మిగిలిన రెండు మ్యాచ్‌లను కచ్చితంగా గెలుచుకోవాలి. కోల్‌కతా నైట్ రైడర్స్ (11 పాయింట్లు) కూడా ఇదే తీవ్ర పరిస్థితిలో ఉంది. తమ తదుపరి రెండు మ్యాచ్‌లను గెలవడంతో పాటు పంజాబ్, రాజస్థాన్, చెన్నై ప్రత్యర్థులు తమ మ్యాచ్‌లను ఓడిపోవాలని ఆశించాలి. ఢిల్లీ క్యాపిటల్స్, ముంబై ఇండియన్స్ , లక్నో సూపర్ జెయింట్స్ జట్లు ఇప్పటికే ఈ టోర్నమెంట్ నుండి నిష్క్రమించాయి.