DC vs PBKS: 6569 రోజుల తర్వాత అరుదైన రికార్డ్!

ధర్మశాల వేదికగా పంజాబ్ కింగ్స్, ఢిల్లీ క్యాపిటల్స్ మధ్య జరిగిన మ్యాచ్ కేవలం పరుగుల వరదకే కాదు, ఒక అరుదైన బౌలింగ్ రికార్డుకు కూడా వేదికైంది. ఐపీఎల్ చరిత్రలో చాలా అరుదుగా కనిపించే ఒక వింత ఈ మ్యాచ్‌లో చోటు చేసుకుంది. అదేమిటంటే, ఈ మ్యాచ్‌లోని రెండు ఇన్నింగ్స్‌లలో కలిపి దాదాపు అన్ని ఓవర్లను పేసర్లే వేయడం. స్పిన్నర్ల ప్రభావం ఏమాత్రం లేకుండానే ఈ హై-వోల్టేజ్ పోరు ముగిసింది. అక్షర్ పటేల్, శ్రేయాస్ అయ్యర్ల వినూత్న వ్యూహాలతో 2008 తర్వాత లీగ్‌లో ఇలాంటి విచిత్రమైన రికార్డు నమోదైంది: ఒక్క స్పిన్ ఓవర్ కూడా వేయబడలేదు.

టాస్ గెలిచి బౌలింగ్‌ ఎంచుకున్న ఢిల్లీ కెప్టెన్ అక్షర్ పటేల్, కుల్దీప్ యాదవ్, విప్రజ్ నిగమ్‌లను తుదిజట్టు నుంచి తప్పించాడు. జట్టులో తానొక్కడే స్పిన్ ఆప్షన్‌గా ఉన్నప్పటికీ.. అక్షర్ పటేల్ బౌలింగ్ చేయలేదు. దీంతో ఢిల్లీ క్యాపిటల్స్ తమ 20 ఓవర్లలో స్పిన్‌ను అస్సలు ఉపయోగించలేదు.మరోవైపు, ఐపీఎల్ చరిత్రలోనే అత్యధిక వికెట్లు తీసిన యుజ్వేంద్ర చాహల్ పంజాబ్ జట్టులో ఉన్నాడు. కానీ కెప్టెన్ శ్రేయస్ అయ్యర్ అతనికి బంతిని అప్పగించలేదు. దీంతో ఢిల్లీ క్యాపిటల్స్ ఒక ఓవర్ మిగిలి ఉండగానే మ్యాచ్‌ను గెలిచారు, పంజాబ్ వరుసగా నాలుగో ఓటమిని చవిచూసింది.

ఈ మ్యాచ్‌లో మొత్తం 39 ఓవర్లు బౌలింగ్ చేయగా, రెండు జట్లు ఒక్క స్పిన్ ఓవర్‌ను కూడా ఉపయోగించకపోవడం విశేషం. వర్ష ప్రభావితం కాని ఐపీఎల్ మ్యాచ్‌లలో 18 ఏళ్ల తర్వాత ఇలా స్పిన్ బౌలింగ్ లేకుండా ముగిసిన తొలి మ్యాచ్ ఇదే. గతంలో, కేవలం రెండుసార్లే స్పిన్ బౌలింగ్ లేకుండా పూర్తి ఐపీఎల్ మ్యాచ్‌లు జరిగాయి. అవి 2008 తొలి సీజన్‌లో బెంగళూరులో రాయల్ ఛాలెంజర్స్ బెంగళూరు వర్సెస్ చెన్నై సూపర్ కింగ్స్ జట్ల మధ్య జరిగిన మ్యాచ్ (మొత్తం 39.4 ఓవర్లు), అలాగే ముంబైలో ముంబై ఇండియన్స్ (MI) వర్సెస్ కోల్‌కతా నైట్ రైడర్స్ మధ్య జరిగిన మ్యాచ్‌లు.

ఈ మ్యాచ్‌లో వేసిన 39 ఓవర్ల పేస్ బౌలింగ్ లీగ్ చరిత్రలో రెండో అత్యధికం. 2008లో బెంగళూరులోని చిన్నస్వామి స్టేడియంలో ఆర్‌సీబీ vs సీఎస్‌కే మ్యాచ్‌లో 39.4 ఓవర్ల పేస్ బౌలింగ్ నమోదై అగ్రస్థానంలో ఉంది. గతంలో, 2013, 2015లలోనూ కొన్ని మ్యాచ్‌లలో 36 ఓవర్ల పేస్ బౌలింగ్ కూడా చూశాం.

ఈ మ్యాచ్‌కు ముందు, ఒక జట్టు తమ 20 ఓవర్ల కోటాను ఒక్క స్పిన్ ఓవర్‌ను కూడా ఉపయోగించకుండా పూర్తి చేసిన సందర్భాలు తక్కువ. చివరిసారిగా 2016 ఐపీఎల్‌లో సన్‌రైజర్స్ హైదరాబాద్ (SRH) ఆర్‌సీబీతో హైదరాబాద్‌లో ఆడిన మ్యాచ్‌లో ఇలా చేసింది. ఐపీఎల్ సుదీర్ఘ చరిత్రలో స్పిన్నర్ల ప్రమేయం లేకుండా ఒక ఇన్నింగ్స్ ముగియడం ఇప్పటివరకు కేవలం 13 సార్లు మాత్రమే జరిగింది. ధర్మశాల పిచ్ కండిషన్స్ దృష్ట్యా పంజాబ్ కింగ్స్ కెప్టెన్ కూడా పూర్తిస్థాయిలో తన పేస్ దళాన్నే రంగంలోకి దించాడు. మొత్తానికి బ్యాటర్ల ఆధిపత్యం నడిచిన ఈ మ్యాచ్‌లో బౌలింగ్ పరంగా పేసర్లు తమ మార్క్ చూపించి ఈ అరుదైన ఫీట్‌ను సాకారం చేశారు.

చివరగా, మ్యాచ్ విషయానికి వస్తే, ఢిల్లీ క్యాపిటల్స్ మూడు వికెట్ల తేడాతో, ఆరు బంతులు మిగిలి ఉండగానే విజయం సాధించింది. పంజాబ్ జట్టు పట్టికలో అగ్రస్థానాన్ని సాధించే అవకాశాన్ని కోల్పోగా.. ఢిల్లీ ప్లేఆఫ్‌ ఆశలను సజీవంగా ఉంచుకుంది.