MI: కష్టాల్లో ముంబై ఇండియన్స్.. ప్లేఆఫ్స్ ఆశలు గాలిలో దీపమేనా?

IPL 2026: ఐపీఎల్ 2026 సీజన్‌లో భాగంగా సన్‌రైజర్స్ హైదరాబాద్ జట్టుతో జరిగిన కీలక మ్యాచ్‌లో ముంబై ఇండియన్స్ పరాజయం పాలవ్వడంతో ఆ జట్టు ప్లేఆఫ్స్ అవకాశాలు కష్టంగా మారాయి. 13 ఏళ్లల నిరీక్షణ తర్వాత ఈ సీజన్లో తొలి మ్యాచ్‌ను గెలిచి ఘనంగా ఆరంభించినప్పటికీ.. ఆ తర్వాత వరుస పరాజయాలతో ముంబై పాయింట్ల పట్టికలో వెనుకబడింది. హార్దిక్ పాండ్యా సారథ్యంలోని ఈ జట్టు ఇప్పటివరకు ఆడిన 8 మ్యాచ్‌ల్లో ఏకంగా 6 ఓటములను చవిచూసి, ప్రస్తుతం పాయింట్ల పట్టికలో 9వ స్థానంలో కొనసాగుతోంది.

ఇకపై గెలిస్తేనే ముందడుగు
ముంబై ఇండియన్స్ ప్లేఆఫ్స్ రేసులో నిలవాలంటే ఇకపై జరిగే ప్రతి మ్యాచ్ 'డూ ఆర్ డై' వంటిదే. ప్రస్తుతం ముంబై వద్ద కేవలం 4 పాయింట్లు మాత్రమే ఉన్నాయి. ప్లేఆఫ్స్ అర్హత సాధించడానికి కనీసం 16 పాయింట్లు అవసరం. అంటే ముంబై తన చేతిలో ఉన్న మిగిలిన 6 మ్యాచ్‌ల్లోనూ తప్పనిసరిగా విజయం సాధించాలి. ఎక్కడ ఒక్క మ్యాచ్ ఓడినా ఆ జట్టు దాదాపు టోర్నీ నుంచి నిష్క్రమించినట్టే. కేవలం విజయాలే కాకుండా సీఎస్కేతో జరిగిన భారీ ఓటమి వల్ల దెబ్బతిన్న నెట్ రన్-రేట్‌ను కూడా మెరుగుపరుచుకోవాల్సిన అవసరం ఉంది.

మిగిలిన మ్యాచ్‌ల షెడ్యూల్
ముంబై ఇండియన్స్ తన తదుపరి మ్యాచ్‌లలో కఠినమైన జట్లను ఎదుర్కోవాల్సి ఉంది.

మే 2: చెన్నై సూపర్ కింగ్స్‌ (చెపాక్)

మే 4: లక్నో సూపర్ జెయింట్స్‌ (వాంఖడే)

మే 10: రాయల్ ఛాలెంజర్స్ బెంగళూరు (రాయ్‌పూర్)

మే 14: పంజాబ్ కింగ్స్‌ (ధర్మశాల)

మే 20: కోల్‌కతా నైట్ రైడర్స్‌ (ఈడెన్ గార్డెన్స్)

మే 24: రాజస్థాన్ రాయల్స్‌ (వాంఖడే)

చరిత్ర పునరావృతమవుతుందా?
ముంబై ఇండియన్స్‌కు ఐపీఎల్ చరిత్రలో అసాధ్యమైన పరిస్థితుల నుంచి అద్భుతాలు చేసిన చరిత్ర ఉంది. 2014లో వరుసగా మొదటి ఐదు మ్యాచ్‌లు ఓడిపోయినప్పటికీ.. ఆదిత్య తారే సిక్సర్‌తో ప్లేఆఫ్స్‌కు చేరిన ఘనత ఆ జట్టుది. అలాగే 2015లోనూ మొదటి 6 మ్యాచ్‌ల్లో 5 ఓటములు ఎదురైనా, చివరకు కప్పు గెలిచి సత్తా చాటింది. రోహిత్ శర్మ నాయకత్వంలో ఐదు టైటిళ్లు సాధించిన ఈ జట్టు, ఇప్పుడు హార్దిక్ పాండ్యా సారథ్యంలో మరో చారిత్రాత్మక మలుపును ఆశిస్తోంది. ఇంకా అవకాశాలు ఉన్నందున, అభిమానులు ముంబై 'కమ్ బ్యాక్' ఇస్తుందని ఆశగా ఎదురుచూస్తున్నారు.