కేకేఆర్ కొంపముంచిన ఆశ.. ఆ రెండు తప్పిదాలే ఓటమికి కారణం!

KKR vs SRH: ఐపీఎల్ 2026 సీజన్లో సన్‌రైజర్స్ హైదరాబాద్‌తో జరిగిన మ్యాచ్ లో కోల్‌కతా నైట్ రైడర్స్ 65 పరుగుల భారీ తేడాతో ఓటమి పాలైంది. ఈడెన్ గార్డెన్స్‌లో జరిగిన ఈ పోరులో ఓ దశలో కేకేఆర్ గెలిచేలా కనిపించినా.. ఇద్దరు కీలక బ్యాటర్లు రనౌట్ అవ్వడం మ్యాచ్‌ను మలుపు తిప్పింది. ఆ రెండు బ్లండర్స్ కేకేఆర్ పతనాన్ని శాసించాయి.

ఆ రెండు రనౌట్లే.. టర్నింగ్ పాయింట్స్!
227 పరుగుల భారీ లక్ష్య ఛేదనలో ఉన్న కేకేఆర్‌కు ఆదిలోనే షాక్ తగిలింది. పవర్ ప్లే ఆఖరి బంతి వద్ద కామెరూన్ గ్రీన్, అంగ్క్రిష్ రఘువంశీ మధ్య సరైన అవగాహన లేకపోవడంతో గ్రీన్ (2) వింతగా రనౌట్ అయ్యాడు. ఆ సమయంలో కేకేఆర్ జట్టు స్కోరు 3 వికెట్లు కోల్పోయి 74 పరుగుల వద్ద ఉంది. అనంతరం ఇన్నింగ్స్ చక్కదిద్దుచున్న సమయంలో 11వ ఓవర్లో అంగ్క్రిష్ రఘువంశీ మరో తప్పు చేశాడు. రింకూ సింగ్‌తో అనవసర‌మైన పరుగు కోసం ప్రయత్నించి రఘువంశీ కూడా రనౌట్ అయ్యాడు. అసలు అక్కడ పరుగు తీసే అవకాశమే లేకపోయినా రిస్క్ తీసుకోవడం కేకేఆర్ ఆశలపై నీళ్లు చల్లింది. ఈ రెండు వికెట్లు పడకుండా ఉండి ఉంటే ఫలితం మరోలా ఉండేదని విశ్లేషకులు భావిస్తున్నారు.

మెరుపు ఆరంభం.. కానీ నిలకడ లేదు..
కేకేఆర్ ఇన్నింగ్స్ ప్రారంభంలో ఫిన్ అలెన్ ఆకాశమే హద్దుగా చెలరేగాడు. కేవలం 7 బంతుల్లోనే 4 ఫోర్లు, 2 సిక్సర్లతో 28 పరుగులు పిండుకున్నాడు. అజింక్య రహానే (8) నెమ్మదిగా ఆడినా, అంగ్క్రిష్ రఘువంశీ మాత్రం ఎదురుదాడి కొనసాగించాడు. పార్ట్ టైమ్ స్పిన్నర్ అభిషేక్ శర్మ ఓవర్లో వరుసగా రెండు సిక్సర్లు బాదిన రఘువంశీ.. కేవలం 20 బంతుల్లోనే జట్టు స్కోరును 50 దాటించాడు. కానీ అతని దూకుడు రనౌట్ రూపంలో ముగిసింది.

సన్‌రైజర్స్ బ్యాటర్ల వీరవిహారం
అంతకుముందు బ్యాటింగ్ చేసిన సన్‌రైజర్స్ హైదరాబాద్ నిర్ణీత 20 ఓవర్లలో 8 వికెట్లకు 226 పరుగుల భారీ స్కోరు సాధించింది. ఓపెనర్లు ట్రావిస్ హెడ్, అభిషేక్ శర్మ కేవలం 5.2 ఓవర్లలోనే 82 పరుగులు జోడించి కేకేఆర్ బౌలర్లను ఉతికి ఆరేశారు. మధ్యలో వికెట్లు పడినా, హెన్రిచ్ క్లాసెన్ (35 బంతుల్లో 52) ఇన్నింగ్స్‌ను నిలబెట్టాడు. చివర్లో నితీష్ కుమార్ రెడ్డి (39) మెరుపులు మెరిపించడంతో హైదరాబాద్ ఈ సీజన్‌లో మొదటి విజయాన్ని అందుకుంది.

ఓటమికి ప్రధాన కారణాలు
కేకేఆర్ బ్యాటర్ల మధ్య సమన్వయ లోపం వల్ల రనౌట్లు వాళ్ల కొంపముంచాయి. ఇన్నింగ్స్ మొత్తంలో 46 పరుగుల భాగస్వామ్యమే అత్యధికం కావడం కేకేఆర్ బలహీనతను చూపిస్తోంది. పవర్ ప్లేలోనే 80కి పైగా పరుగులు సమర్పించుకోవడం బౌలర్ల వైఫల్యానికి అద్దం పడుతోంది. చివరకు రింకూ సింగ్ (35) పోరాడినా, సహకారం లేకపోవడంతో కేకేఆర్ 16 ఓవర్లలోనే 161 పరుగులకు కుప్పకూలింది.