రూ.25 కోట్ల ఆటగాడి విధ్వంసం.. టాటా కారుకు డెంట్! (వీడియో)

ఐపీఎల్ 2026లో భాగంగా గుజరాత్ టైటాన్స్, కోల్‌కతా నైట్ రైడర్స్ జట్ల మధ్య జరిగిన మ్యాచ్‌లో ఓ ఆసక్తికరమైన సంఘటన చోటుచేసుకుంది. స్టేడియంలో ప్రదర్శనకు ఉంచిన స్పాన్సర్ కారు 'టాటా సియెర్రా' కామెరూన్ గ్రీన్ కొట్టిన భారీ సిక్సర్‌కు దెబ్బతింది. గ్రీన్ కొట్టిన బంతి నేరుగా వెళ్లి కారుకు తగలడంతో దాని ఫ్రంట్ లెఫ్ట్ డోర్ వద్ద పెద్ద డెంట్ పడింది. ఐపీఎల్ మ్యాచ్‌ల్లో ఇలా బంతి తగిలి కారు డ్యామేజ్ అవ్వడం అరుదుగా జరుగుతుంటుంది.

13వ ఓవర్లో విధ్వంసం
కేకేఆర్ ఇన్నింగ్స్ 13వ ఓవర్లో ఈ ఘటన జరిగింది. గుజరాత్ టైటాన్స్ బౌలర్ అశోక్ శర్మ వేసిన 146 కిలోమీటర్ల వేగంతో కూడిన బంతిని గ్రీన్ డీప్ స్క్వేర్ లెగ్ మీదుగా భారీ సిక్సర్‌గా మలిచాడు. ఆ బంతి గాలిలో ప్రయాణిస్తూ నేరుగా స్టేడియంలో ఉన్న టాటా సియెర్రా కారును బలంగా తాకింది. దీంతో ఒక్కసారిగా స్టేడియంలో ఉన్నవారంతా ఆశ్చర్యపోయారు. గ్రీన్ తన పవర్‌ను చూపిస్తూ ఆడిన ఈ షాట్ ఇప్పుడు సోషల్ మీడియాలో వైరల్ అవుతోంది.

మెరుపు ఇన్నింగ్స్ ఆడిన గ్రీన్
ఈ మ్యాచ్‌లో కేకేఆర్ తరపున కామెరూన్ గ్రీన్ అత్యద్భుత ఇన్నింగ్స్ ఆడాడు. ఆరంభంలో మూడు వికెట్లు కోల్పోయి జట్టు కష్టాల్లో ఉన్నప్పుడు క్రీజులోకి వచ్చిన గ్రీన్, మొదట నెమ్మదిగా ఆడాడు. ఒక దశలో 29 బంతుల్లో 27 పరుగులు మాత్రమే చేసిన కామెరూన్ గ్రీన్.. ఆ తర్వాత గేర్ మార్చి కేవలం 34 బంతుల్లోనే అర్థసెంచరీ పూర్తి చేశాడు. ఇన్నింగ్స్ చివరి బంతికి అవుట్ అయ్యే సమయానికి గ్రీన్ 55 బంతుల్లో 7 ఫోర్లు, 4 సిక్సర్లతో 79 పరుగులు సాధించి జట్టుకు గౌరవప్రదమైన స్కోరును అందించాడు.

ముగింపులో తడబడిన కేకేఆర్
టాస్ గెలిచి బ్యాటింగ్ ఎంచుకున్న కోల్‌కతా నైట్ రైడర్స్ నిర్ణీత 20 ఓవర్లలో 180 పరుగులు చేసింది. ఒకానొక దశలో 15 ఓవర్లకు 148 పరుగులతో ఉన్న కేకేఆర్, 200 పైచిలుకు స్కోరు సాధిస్తుందని భావించారు. కానీ చివరి 5 ఓవర్లలో గుజరాత్ బౌలర్లు కట్టుదిట్టంగా బౌలింగ్ చేయడంతో కోల్‌కతా కేవలం 32 పరుగులు మాత్రమే చేయగలిగింది. గుజరాత్ బౌలర్లలో కాగిసో రబాడ 3 వికెట్లతో రాణించగా.. అశోక్ శర్మ, మహమ్మద్ సిరాజ్ చెరో రెండు వికెట్లు తీశారు.