IPL 2025: పంజాబ్-ఢిల్లీ మ్యాచ్ రద్దు.. వీడిన ఉత్కంఠ!

IPL 2025: ఐపీఎల్ 2025లో గురువారం పంజాబ్ కింగ్స్, ఢిల్లీ క్యాపిటల్స్ జట్ల మధ్య జరగాల్సిన మ్యాచ్ భారత్, పాకిస్థాన్ దేశాల మధ్య కొనసాగుతున్న ఉద్రిక్తతల కారణంగా ఆగిపోయింది. ఆ మరుసటి రోజే భారత క్రికెట్ నియంత్రణ మండలి(BCCI) కీలక నిర్ణయం తీసుకుని ఐపీఎల్ 2025ను వారం పాటు నిలిపివేసింది. దీని కారణంగా ఢిల్లీ క్యాపిటల్స్, పంజాబ్ కింగ్స్ జట్ల మధ్య ఈ మ్యాచ్ మళ్లీ ప్రారంభమవుతుందా అనే విషయంలో అభిమానులు గందరగోళానికి గురయ్యారు. ఇప్పుడు దీనిపై కీలక అప్‌డేట్ వచ్చింది.

ఆ రెండు జట్ల మధ్య మ్యాచ్ మళ్లీ జరుగుతుంది..
ఓ నివేదిక ప్రకారం.. ఈ మ్యాచ్ ఇప్పుడు రెండు జట్ల మధ్య మళ్లీ జరుగుతుంది. ఈ మ్యాచ్‌ను నిలిపివేయాలని నిర్ణయం తీసుకునే సమయానికి పంజాబ్ కింగ్స్ స్కోరు 10.1 ఓవర్లలో ఒక వికెట్‌ కోల్పోయి 122 పరుగులు చేసింది. ప్లేఆఫ్స్‌కు చేరుకోవడంలో రెండు జట్లకు ఈ మ్యాచ్ చాలా కీలకం. ప్రస్తుతం పంజాబ్, ఢిల్లీ జట్లు రెండూ ప్లేఆఫ్స్‌కు చేరుకునే రేసులోనే ఉన్నాయి. మ్యాచ్‌ను తిరిగి ప్రారంభించాలని నిర్ణయం ఇరు జట్లకు ప్లేఆఫ్స్‌కు అర్హత సాధించడానికి పూర్తి అవకాశం కల్పిస్తుంది.

అన్ని జట్లకు సూచనలు చేసిన బీసీసీఐ
వారం రోజుల్లోగా ఐపీఎల్‌కు సిద్ధంగా ఉండాలని తమ ఆటగాళ్లను కోరాలని బీసీసీఐ అన్ని ఫ్రాంచైజీలకు చెప్పిందని నివేదిక పేర్కొంది. అయితే వారం రోజుల్లో దేశం విడిచి వెళ్లిన విదేశీ ఆటగాళ్లను తిరిగి తీసుకురావడం ఒక సవాలుగా ఉంటుంది. ఈ నెల చివర్లో బీసీసీఐ ఐపీఎల్‌ను తిరిగి ప్రారంభించలేకపోతే, ఆసియా కప్ స్థానంలో సెప్టెంబర్‌లో ఆడవచ్చని నివేదిక పేర్కొంది.