IPL 2025: ముంబై ప్లేఆఫ్స్ చేరుకోవడం కాస్త కష్టమే!

IPL 2025: ముంబైలోని వాంఖడే స్టేడియంలో ముంబై ఇండియన్స్, గుజరాత్ టైటాన్స్ మధ్య ఉత్కంఠభరితమైన మ్యాచ్ జరిగింది. వర్షం మ్యాచ్‌కు రెండుసార్లు అంతరాయం కలిగించింది. ఆ మ్యాచ్‌లో గుజరాత్ చివరి బంతికి 3 వికెట్ల తేడాతో గెలిచింది. ఈ విజయంతో గుజరాత్ లీగ్‌లో అగ్రస్థానానికి చేరుకుంది. ఈ మ్యాచ్‌లో చాలా ఒడిదుడుకులు ఎదురైనా ప్రేక్షకులు చివరి వరకు తమ సీట్లకే అతుక్కుపోయారు. 156 పరుగుల లక్ష్య ఛేదనలో గుజరాత్ టైటాన్స్ ఈ ఉత్కంఠభరితమైన విజయాన్ని నమోదు చేసింది. ఈ మ్యాచ్‌లో గుజరాత్ జట్టుకు చివరి ఓవర్‌లో 15 పరుగులు అవసరం కాగా.. గుజరాత్ చివరి బంతికి లక్ష్యాన్ని ఛేదించింది.

చివరి ఓవర్‌లో ఏం జరిగింది?
వర్షం కారణంగా మ్యాచ్‌ను 19 ఓవర్లకు కుదించారు. చివరి ఓవర్లో గుజరాత్ టైటాన్స్‌కు 15వ పరుగులు అవసరం కాగా.. దీపక్ చాహర్ చివరి ఓవర్ వేశాడు. ఈ ఓవర్ చాలా ఉత్కంఠభరితంగా సాగింది. రాహుల్ తెవాటియా మొదటి బంతికి ఫోర్ కొట్టాడు. ఆ తర్వాత ఒక పరుగు తీశాడు. అనంతరం జెరాల్డ్ కోయెట్జీ సిక్స్ కొట్టాడు. మరో బంతి నో-బాల్ వేయగా సింగిల్ తీశారు. నాలుగో బంతికి రాహుల్ తెవాటియా ఫ్రీ హిట్ ద్వారా సింగిల్ తీయడంతో స్కోరు సమం అయింది. తర్వాత 5వ బంతికి జెరాల్డ్ కోయెట్జీని దీపక్ చాహర్ ఔట్ చేశాడు. కానీ చివరి బంతికి అర్షద్ ఖాన్ ఒత్తిడిలో కూడా తన ప్రశాంతతను కొనసాగించాడు. చివరి బంతికి ఒక పరుగు తీసి గుజరాత్ టైటాన్స్‌కు చిరస్మరణీయ విజయాన్ని అందించాడు.

ఈ ఓటమితో ముంబై ఇండియన్స్ పాయింట్ల పట్టికలో నాలుగో స్థానానికి పడిపోయింది. గుజరాత్ చేతిలో ఓటమి తర్వాత ముంబై ప్లేఆఫ్స్‌కు చేరుకోవడం కాస్త కష్టమైంది. ఇప్పుడు ముంబై ఇండియన్స్ ప్లేఆఫ్స్ చేరుకోవడానికి సమీకరణాలు మారిపోయాయి. ముంబై ఇప్పటివరకు 12 మ్యాచ్‌లు ఆడింది. అందులో ఆ జట్టు 7 మ్యాచ్‌లు గెలిచింది. ప్రస్తుతం 14 పాయింట్లతో ముంబై ఇండియన్స్ జట్టు నాలుగో స్థానంలో ఉండగా.. ఇప్పుడు ఆ జట్టుకు ఇంకా 2 మ్యాచ్‌లు మిగిలి ఉన్నాయి. అందులో ఒక మ్యాచ్ ధర్మశాలలో పంజాబ్ కింగ్స్ జట్టుతో, మరొక మ్యాచ్ వాంఖడే స్టేడియంలో ఢిల్లీ క్యాపిటల్స్‌తో జరుగుతుంది. ఈ రెండు మ్యాచ్‌ల్లోనూ ముంబై గెలిస్తే దానికి 18 పాయింట్లు వస్తాయి. ఆ జట్టు ప్లేఆఫ్‌కు సులభంగా అర్హత సాధిస్తుంది.

ముగిసిన ముంబై విజయాల పరంపర
గుజరాత్ టైటాన్స్‌తో మ్యాచ్‌కు ముందు ముంబై ఇండియన్స్ వరుసగా 6 మ్యాచ్‌లు గెలిచింది. కానీ ఇప్పుడు గుజరాత్ టైటాన్స్ ముంబై విజయ పరంపరను నిలిపివేసింది. వర్షం కారణంగా అంతరాయం కలిగిన ఈ మ్యాచ్‌లో ముందుగా బ్యాటింగ్ చేసిన ముంబై 20 ఓవర్లలో 8 వికెట్ల నష్టానికి 155 పరుగులు చేసింది. ముంబై తరఫున బ్యాటింగ్ చేస్తున్నప్పుడు విల్ జాక్స్ 53 పరుగులు చేసి అత్యధిక ఇన్నింగ్స్ ఆడాడు. అనంతరం డీఎల్ఎస్ రూల్ ప్రకారం.. గుజరాత్ నిర్దేశించిన 147 పరుగుల లక్ష్యాన్ని శుభ్‌మన్ గిల్ జట్టు 19 ఓవర్లలో 7 వికెట్లు కోల్పోయి సాధించింది. గుజరాత్ తరఫున బ్యాటింగ్ చేసిన కెప్టెన్ శుభ్‌మన్ గిల్ అత్యధిక ఇన్నింగ్స్ ఆడి 43 పరుగులు చేసి ప్లేయర్ ఆఫ్ ది మ్యాచ్‌గా ఎంపికయ్యాడు.