IPL 2025: ధోని బ్యాటింగ్ చూస్తే బాధగా ఉంది..

IPL 2025: చెన్నై సూపర్ కింగ్స్ ఐపీఎల్ 2025లో కఠినమైన దశను ఎదుర్కొంటోంది. అద్భుత ఆటగాళ్లతో నిండిన జట్టు ఐపీఎల్ పాయింట్ల పట్టికలో 9వ స్థానంలో ఉంది. ఐదు సార్లు ఐపీఎల్ విజేతలైన సీఎస్కే జట్టు.. ముంబై ఇండియన్స్‌పై విజయంతో ఈ సీజన్‌ను ఆరంభించింది. కానీ తర్వాత రాయల్ ఛాలెంజర్స్ బెంగళూరు, రాజస్థాన్ రాయల్స్, ఢిల్లీ క్యాపిటల్స్ చేతిలో ఓడిపోయింది. ఈ ఓటములలో ఒక విషయం సాధారణంగా ఉంది. లక్ష్యాన్ని ఛేదించడంలో సీఎస్కే విఫలమైంది. జట్టులోని టాప్ ఆర్డర్ బ్యాటర్లు బాగా రాణించలేకపోతున్నారు. ఎంఎస్ ధోని బ్యాటింగ్ ఆర్డర్ గురించి కూడా ప్రశ్నలు తలెత్తుతున్నాయి. ఈ క్రమంలో ధోని కెప్టెన్‌గా లేకపోతే యువ ఆటగాళ్లకు అవకాశం ఇవ్వాలని భారత మాజీ ఓపెనర్ వసీం జాఫర్ అభిప్రాయపడ్డాడు.

ఢిల్లీ క్యాపిటల్స్‌తో జరిగిన మ్యాచ్‌లో ధోని పదో ఓవర్లో బ్యాటింగ్ చేయడానికి వచ్చాడు కానీ అప్పటికి సగం మంది సీఎస్కే ఆటగాళ్లు ఔట్ అయ్యారు. ఆ జట్టు గెలవాలంటే 52 బంతుల్లో 110 పరుగులు అవసరం. విజయ్ శంకర్ (54 బంతుల్లో 69), ధోని(26 బంతుల్లో 30) వేగంగా పరుగులు చేయడంలో విఫలమయ్యారు. 2010 తర్వాత తొలిసారి చెన్నైలో సీఎస్కేను ఢిల్లీ క్యాపిటల్స్ ఓడించింది. ఇది అందరికీ ఆశ్చర్యం కలిగించింది. ధోని కెప్టెన్సీలో టీమిండియా తరఫున ఆడిన మాజీ ఓపెనర్ వసీం జాఫర్ కీలక ప్రకటన చేశాడు.

సీఎస్కే బ్యాటింగ్ వైఫల్యం తర్వాత వసీం జాఫర్ మాట్లాడుతూ.. ధోని జట్టు కెప్టెన్ కాకపోతే ఇలాగే బ్యాటింగ్ చేస్తూ ఉంటే.. ఇప్పుడు యువ ఆటగాళ్లకు దారి ఇవ్వాలని అన్నాడు. "ధోని కెప్టెన్‌గా లేకపోతే.. అతడి ఇలా చూడటం కొంచెం బాధగా ఉంది" అంటూ మాజీ సీఎస్కే కెప్టెన్ ను ప్లేయింగ్ 11 నుంచి తొలగించాలా అని అడిగినప్పుడు వసీం జాఫర్ ఈ సమాధానం ఇచ్చాడు. ధోని అంత బాగా ఆడకపోవడమే అతని కష్టానికి కారణమని వసీం జాఫర్ అన్నాడు. 43 ఏళ్ల ధోని 2020లో అంతర్జాతీయ క్రికెట్ నుంచి రిటైర్ అయ్యాడు. ఇప్పుడు ధోని ఐపీఎల్‌లో మాత్రమే ఆడుతున్నాడు.

జాఫర్ మాట్లాడుతూ.."ధోని చాలా తక్కువగా బ్యాటింగ్ చేస్తాడు. కానీ 10 ఓవర్లలో ఐదు వికెట్లు కోల్పోయినప్పుడు ధోనికి బ్యాటింగ్ చేయడానికి వేరే మార్గం లేదు. ఎందుకంటే అతని వెనుక అశ్విన్ మాత్రమే ఉన్నాడు. ధోని కంటే సీఎస్కేకు ఆందోళన చెందాల్సిన పెద్ద సమస్యలు ఉన్నాయి. టాప్ ఆర్డర్ పరుగులు సాధించకపోవడమే అతిపెద్ద సమస్య. లక్ష్యాన్ని ఛేదించే రేసులో వారు ఉన్నట్లు అనిపించడం లేదు. సొంత గడ్డపై సీఎస్కే ఇంత దారుణంగా ఆడడం నేను ఎప్పుడూ చూడలేదు." అని అన్నాడు.