IPL 2025: సీఎస్కే గెలుపు బాట పట్టాలంటే.. ఈ 3 కీలక మార్పులు అవసరం!

IPL 2025: ఐపీఎల్ 2025లో చెన్నై సూపర్ కింగ్స్ ముంబై ఇండియన్స్ ను 4 వికెట్ల తేడాతో ఓడించి సీజన్‌ను ప్రారంభించింది. కానీ ఆ తర్వాత జట్టు వరుసగా నాలుగు మ్యాచ్‌ల్లో ఓడిపోయింది. ఐదుసార్లు ఛాంపియన్‌గా నిలిచిన చెన్నై జట్టు ఈ సీజన్‌లో ఉన్నంత ఉత్సాహంతో, బలంతో ఆడినట్లు కనిపించలేదు. బ్యాటింగ్, బౌలింగ్, ఫీల్డింగ్ అనే మూడు విభాగాల్లోనూ జట్టు ప్రదర్శన పేలవంగా ఉంది. తాజాగా చెన్నై జట్టు కెప్టెన్ రుతురాజ్ గాయపడి సీజన్ నుంచి వైదొలగడం సీఎస్కేకు పెద్ద దెబ్బే.

ఈ సారి చెన్నై జట్టు రచిన్ రవీంద్ర, శివం దూబే వంటి కొంతమంది ప్రత్యేక ఆటగాళ్లపై ఎక్కువగా ఆధారపడి ఉన్నట్లు కనిపిస్తోంది. ఆ జట్టు కొంతమంది ఆటగాళ్లకు మంచి అవకాశాలు ఇచ్చింది. కానీ వారు ఆశించిన స్థాయిలో రాణించలేకపోయారు. ఇప్పుడు చెన్నై జట్టు తన తదుపరి మ్యాచ్ కోల్‌కతా నైట్ రైడర్స్ జట్టుతో ఆడనుంది. సీఎస్కే ప్లేఆఫ్ రేసులో కొనసాగాలంటే ఈ మ్యాచ్ లో ఎలాగైనా గెలవాల్సిందే. దీనికోసం జట్టు తన ప్లేయింగ్ ఎలెవన్ లో కొన్ని మార్పులు చేయాల్సి రావచ్చు. కేకేఆర్‌తో జరిగే తదుపరి మ్యాచ్‌లో చెన్నై జట్టు చేయగలిగే ఈ 3 మార్పుల గురించి తెలుసుకోండి.

ముఖేష్ చౌదరి స్థానంలో గుర్జప్నీత్ సింగ్‌కు అవకాశం
ఈ సీజన్ లో ముఖేష్ చౌదరి ఇప్పటివరకు ఆకట్టుకునే ప్రదర్శన ఇవ్వలేకపోయాడు. ఈ ఎడమచేతి వాటం ఫాస్ట్ బౌలర్ కొత్త బంతితో ఎక్కువ వికెట్లు తీయలేదు. ఇటీవల అతని ఫామ్ ను పరిశీలిస్తే చెన్నై తదుపరి మ్యాచ్ లో అతనిని ప్లేయింగ్ ఎలెవన్ నుంచి తొలగించే అవకాశం ఉంది. సీఎస్కే జట్టులో మరిన్ని ఎంపికలు ఉన్నాయి. వారిలో గుర్జప్నీత్ సింగ్ ఒకరు. గుర్జప్నీత్ సింగ్ ఐపీఎల్ 2025 ప్రారంభానికి ముందు తమిళనాడు తరపున బాగా బౌలింగ్ చేశాడు. ముఖేష్ లాగే గుర్జప్నీత్ సింగ్ కూడా ఎడమచేతి వాటం ఫాస్ట్ బౌలర్.

అశ్విన్ స్థానంలో శ్రేయాస్ గోపాల్‌కు ఛాన్స్!
ఐపీఎల్ 2025 మెగావేలంలో చెన్నై సూపర్ కింగ్స్ రవిచంద్రన్ అశ్విన్ ను రూ.9.75 కోట్లకు కొనుగోలు చేసింది. కానీ ఇప్పటివరకు అశ్విన్ తన ప్రదర్శనతో అంచనాలను అందుకోలేకపోయాడు. అశ్విన్ 5 వికెట్లు తీసుకున్నప్పటికీ ఎక్కువ పరుగులు సమర్పించుకున్నట్లు అనిపించింది. ప్రత్యర్థి బ్యాటర్లకు అడ్డుకట్ట వేయలేకపోయాడు. ఈ నేపథ్యంలో చెన్నై అశ్విన్ స్థానంలో లెగ్ స్పిన్నర్ శ్రేయాస్ గోపాల్‌కు అవకాశం ఇవ్వవచ్చు.శ్రేయాస్ గోపాల్ వికెట్ టేకింగ్ బౌలర్‌గా పేరుగాంచాడు. మిడిల్ ఓవర్లలో సమర్థవంతంగా రాణించగలడు. ఈ సీజన్ లో నూర్ అహ్మద్ మిడిల్ ఓవర్లలో బాగా బౌలింగ్ చేశాడు కానీ అవతలి ఎండ్ నుంచి మద్దతు లభించలేదు. శ్రేయాస్ గోపాల్‌ను జట్టులోకి తీసుకుంటే అతను నూర్ అహ్మద్‌తో కలిసి మంచి స్పిన్ ద్వయాన్ని ఏర్పాటు చేయగలడు. ఇది జట్టుకు ప్రయోజనకరంగా ఉంటుంది.

విజయ్ శంకర్ స్థానంలో షేక్ రషీద్..
ఇటీవలే దీపక్ హుడా స్థానంలో విజయ్ శంకర్ ను సీఎస్కే జట్టులోకి తీసుకుంది. కానీ అతను కూడా ప్రత్యేకంగా ఏమీ చేయలేకపోయాడు. ఢిల్లీ క్యాపిటల్స్ పై విజయ్ శంకర్ అర్థ సెంచరీ చేసినప్పటికీ ఆ ఇన్నింగ్స్‌లో త్వరగా పరుగులు సాధించలేకపోయాడు. జట్టు వేగంగా ఆడాల్సిన అవసరం వచ్చినప్పుడు అతను నెమ్మదిగా ఆడటం కనిపించింది. ఈ క్రమంలో చెన్నై అతని స్థానంలో 20 ఏళ్ల యువ ఆటగాడు షేక్ రషీద్ కు అవకాశం ఇవ్వగలదు. 2022 అండర్-19 ప్రపంచకప్ లో భారత్ తరపున షేక్ రషీద్ అద్భుతంగా రాణించాడు. అవసరమైనప్పుడు అతను వేగంగా పరుగులు సాధించగలడు. వికెట్లు త్వరగా పడిపోతే కూడా ఓపికగా బ్యాటింగ్ చేయగలడు. షేక్ రషీద్ మిడిల్ ఆర్డర్ లో సీఎస్కేకు మంచి ఆప్షన్ అని నిరూపించుకోగలడు.