బౌండరీ వద్ద చిరుతలా డైవ్ చేసి కళ్లు చెదిరే క్యాచ్..!(వీడియో)

IPL 2025: ఢిల్లీ క్యాపిటల్స్ తరఫున ఆడుతున్న శ్రీలంక ఆటగాడు దుష్మంత చమీర ఓ బౌలర్‌గా కేకేఆర్ పై అంతగా రాణించలేదు. దుష్మంత చమీర వేసిన తొలి ఓవర్లోనే సునీల్ నరైన్, రహ్మానుల్లా గుర్బాజ్ కలిసి 25 పరుగులు చేశారు. చమీర తాను వేసిన 3 ఓవర్లలో మొత్తం 46 పరుగులు ఇచ్చి ఒక వికెట్ మాత్రమే తీసుకున్నాడు. చమీర తన బౌలింగ్‌తో ప్రభావం చూపలేకపోయినప్పటికీ.. ఓ అద్భుతమైన క్యాచ్ పట్టి అందరినీ ఆశ్చర్యానికి గురిచేశాడు.

అద్భుతమైన క్యాచ్ పట్టిన దుష్మంత చమీర
కోల్‌కతా నైట్ రైడర్స్ ఇన్నింగ్స్ చివరి ఓవర్‌ను ఢిల్లీ క్యాపిటల్స్ ఫాస్ట్ బౌలర్ మిచెల్ స్టార్క్ వేస్తున్నాడు. తన ఓవర్ నాల్గవ బంతికి అనుకుల్ రాయ్ స్ట్రైక్‌లో ఉన్నాడు. స్టార్క్ అనుకుల్ రాయ్‌కి ప్యాడ్ లపై బౌలింగ్ వేశాడు, ఆ తర్వాత అనుకుల్ రాయ్ బంతిని డీప్ స్క్వేర్ లెగ్ దిశగా ఫ్లిక్ షాట్ ఆడేందుకు ప్రయత్నించాడు. షాట్ సరిగా కనెక్ట్ కాకపోవడం వల్ల బౌండరీ వెళ్తుందని అందరూ భావించారు. కానీ అప్పుడు దుష్మంత చమీర అద్భుతం చేశాడు. చమీర త్వరగా తన ఎడమ వైపుకు పరిగెత్తాడు, తరువాత గాల్లోకి దూకి, రెండు చేతులతో నేలకు కొంచెం ఎత్తులో అద్భుతమైన క్యాచ్ పట్టాడు. ఈ క్యాచ్ చూసి అందరూ ఆశ్చర్యపోయారు . ఇది ఈ సీజన్‌లో అత్యుత్తమ క్యాచ్‌లలో ఒకటిగా పరిగణించబడుతుంది.అటువంటి పరిస్థితిలో అనుకుల్ రాయ్ డకౌట్ అయ్యాడు. క్యాచ్ తీసుకున్న తర్వాత చమీర కూడా కొంచెం ఆశ్చర్యపోయాడు. ఢిల్లీ జట్టు మొత్తం చమీరను ప్రశంసలతో ముంచెత్తింది. ఈ క్యాచ్ చూసిన ప్రేక్షకులు కూడా ఆశ్చర్యపోయారు. ప్రస్తుతం దీనికి సంబంధించిన వీడియో నెట్టింట వైరలవుతోంది.

కోల్‌కతాదే గెలుపు
ఐపీఎల్ 2025లో భాగంగా 48వ మ్యాచ్ ఢిల్లీలోని అరుణ్ జైట్లీ స్టేడియం వేదికగా కోల్‌కతా నైట్ రైడర్స్, ఢిల్లీ క్యాపిటల్స్ జట్ల మధ్య జరిగింది. ఢిల్లీ క్యాపిటల్స్‌తో జరిగిన కీలక మ్యాచ్ లో కోల్‌కతా నైట్ రైడర్స్ జట్టు 14 పరుగుల తేడాతో విజయం సాధించింది. ముందుగా టాస్ ఓడి బ్యాటింగ్ చేసిన కోల్‌కతా నైట్ రైడర్స్ జట్టు నిర్ణీత 20 ఓవర్లలో 204 పరుగులు చేయగలిగింది. అంగ్‌క్రిష్ రఘువంశీ 44 పరుగులతో టాప్ స్కోరర్ గా నిలిచాడు. అనంతరం బ్యాటింగ్‌కు ఢిల్లీ క్యాపిటల్స్ నిర్ణీత 20 ఓవర్లలో 9 వికెట్లు కోల్పోయి 190 పరుగులు మాత్రమే చేయగలిగింది. ఢిల్లీ జట్టులో డుప్లెసిస్(62), కెప్టెన్ అక్షర్ పటేల్(43) రాణించారు. చివరలో విప్రజ్ నిగమ్(38) పోరాడినా ఫలితం లేకపోయింది. కోల్‌కతా బౌలర్లలో సునీల్ నరైన్ 3 వికెట్లు, వరుణ్ చక్రవర్తి 2 వికెట్లు పడగొట్టారు. అనుకుల్ రాయ్, వైభవ్ అరోరా, ఆండ్రీ రస్సెల్ తలో వికెట్ తీశారు.