IPL 2025: ఢిల్లీ బౌలింగ్ కోచ్‌కు భారీ జరిమానా.. ఎందుకంటే?

IPL 2025: ఐపీఎల్ 2025లో భాగంగా బుధవారం ఉత్కంఠభరితమైన మ్యాచ్ జరిగింది. ఇక్కడ ఆతిథ్య ఢిల్లీ క్యాపిటల్స్ సూపర్ ఓవర్‌లో రాజస్థాన్ రాయల్స్‌ను ఓడించింది. ఈ మ్యాచ్‌లో ఢిల్లీ బౌలింగ్ కోచ్ మునాఫ్ పటేల్ ఐపీఎల్ ప్రవర్తనా నియమావళిని ఉల్లంఘించడంతో బీసీసీఐ అతడిపై చర్య తీసుకుంది. అంపైర్‌తో తీవ్ర వాగ్వాదానికి దిగినందుకు మునాఫ్ కు భారీ జరిమానా విధించబడింది. మునాఫ్ పటేల్ మ్యాచ్ ఫీజులో 25 శాతం కోత విధించబడింది. దీనితో పాటు మునాఫ్ పటేల్ కు ఒక డీమెరిట్ పాయింట్ కూడా ఇవ్వబడింది.

నిజానికి ఈ మ్యాచ్‌కు సంబంధించి మునాఫ్ పటేల్ వీడియో వైరల్ అవుతోంది. అందులో మునాఫ్ పటేల్ బౌండరీ దగ్గర ఫోర్త్ అంపైర్ తో వాదిస్తున్నట్లు కనిపిస్తుంది. మునాఫ్ పటేల్‌ను చూస్తుంటే అంపైర్ చెప్పిన దానికి కోపంగా ఉన్నట్లు అనిపిస్తుంది. మునాఫ్ పటేల్ తన జట్టు ఆటగాళ్లలో ఒకరి ద్వారా మైదానంలో సందేశం ఇవ్వాలనుకున్నాడని తెలుస్తోంది. కానీ అంపైర్ అతడికి అలా చేయడానికి అనుమతి ఇవ్వలేదు. దీని తర్వాతే మునాఫ్ పటేల్ అంపైర్ తో గొడవ పడ్డాడు.

తన తప్పును అంగీకరించిన మునాఫ్ పటేల్
ఆర్టికల్ 2.20 కింద లెవెల్ 1 నేరానికి మునాఫ్ పటేల్ నేరాన్ని అంగీకరించాడు. తద్వారా విచారణ అవసరం లేకుండా పోయింది. మునాఫ్ పటేల్ గురించి బీసీసీఐ తన ప్రకటనలో "మునాఫ్ పటేల్ లెవెల్ 1 నేరాన్ని అంగీకరించాడు. మ్యాచ్ రిఫరీ ఇచ్చిన నిర్ణయాన్ని కూడా అంగీకరించాడు' అని పేర్కొంది.