సన్‌రైజర్స్ హైదరాబాద్ మ్యాచ్‌కు వర్షం అడ్డు?: ఏ జట్టుకు ఎన్ని పాయింట్లు?

SRH vs LSG: ఐపీఎల్ 2024లో భాగంగా సన్‌రైజర్స్ హైదరాబాద్ మరో కీలక మ్యాచ్ ఆడబోతోంది. తన సమవుజ్జీగా ఉంటోన్న లక్నో సూపర్ జెయింట్స్‌తో తలపడనుంది. తన హోమ్ గ్రౌండ్.. ఉప్పల్ స్టేడియం దీనికి వేదిక. ఈ సాయంత్రం 7:30 గంటలకు మ్యాచ్ మొదలవుతుంది.

ఈ మ్యాచ్ గెలిచి తీరాల్సిన అవసరం ఉంది సన్‌రైజర్స్‌కు. ప్లేఆఫ్స్ ఆశలను సజీవంగా ఉంచుకోవాలనుకుంటే మాత్రం గెలవక తప్పదు. ఈ మ్యాచ్ గెలిస్తే నాకౌట్స్‌కు మరింత చేరువ అవుతుంది. 14 పాయింట్లతో టోర్నమెంట్‌లో ముందుడుగు వేయగలుగుతుంది. ఇప్పటివరకు ఆడిన 11 మ్యాచ్‌లల్లో ఆరింట్లో నెగ్గింది. 12 పాయింట్లతో పాయింట్ల పట్టికలో నాలుగో స్థానంలో కొనసాగుతోంది.

సన్‌రైజర్స్ కాకుండా మరో మూడు జట్లు- చెన్నై సూపర్ కింగ్స్, ఢిల్లీ కేపిటల్స్, లక్నో సూపర్ జెయింట్స్ ఖాతాల్లో కూడా 12 పాయింట్లు ఉన్నాయి. నేడు జరిగే మ్యాచ్‌లో గెలవగలిగితే ఈ మూడు జట్ల నుంచి ఎలాంటి ఇబ్బందులు, ఈక్వేషన్లు, నెట్ రన్‌రేట్‌ లెక్కలతో సంబంధం లేకుండా తన ప్లేఆఫ్స్ స్థానాన్ని సుస్థిరం చేసుకుంటుంది.

ఈ మ్యాచ్‌కు వర్షం అడ్డుపడే అవకాశాలు దాదాపుగా లేకపోవచ్చు. రెండు రోజులుగా హైదరాబాద్‌ను కుమ్మి వదిలేసిన వరుణుడు.. నేడు శాంతించినట్టే కనిపిస్తోంది. ఈ రాత్రి వరకూ హైదరాబాద్‌లో వర్షం పడటానికి అనుకూల వాతావరణం లేదు. ఆకాశం మేఘావృతమై కనిపించినప్పటికీ వర్షం పడకపోవచ్చు.

టాస్ పడిన సమయం అంటే సాయంత్రం 7 గంటల నుంచి వర్షం పడటానికి గల అవకాశాలు 51 శాతం మాత్రమే ఉన్నాయి. 7 గంటల సమయంలో 31 డిగ్రీల సెల్సియస్ వరకు ఉష్ణోగ్రత నమోదవుతుంది. గాలిలో తేమ 60 నుంచి 65 శాతం మధ్య ఉండొచ్చు. రాత్రి 8 గంటలకు 51, 9 గంటలకు 50, 10 గంటలకు 38, 11 గంటలకు 32 శాతం వరకు వర్షం పడే అవకాశాలు ఉన్నాయి.