పట్టాలెక్కిన ముంబై ఎక్స్‌ప్రెస్‌: ఆర్సీబీకి వరుసగా నాలుగో ఓటమి పొంచివుందా?

MI vs RCB: ఐపీఎల్ 2024లో మరో హోరాహోరీ పోరు చూడబోతోన్నాం. నేడు ముంబై ఇండియన్స్‌తో వాళ్ల సొంతగడ్డపై ఎదుర్కొనబోతోంది వీర కన్నడిగ టీమ్ రాయల్ ఛాలెంజర్స్ బెంగళూరు. ఈ సాయంత్రం 5:30 గంటలకు ముంబైలోని వాంఖెడే స్టేడియం దీనికి వేదిక.

రాయల్ ఛాలెంజర్స్ బెంగళూరుకు ఈ మ్యాచ్ గెలిచి తీరాల్సిన అవసరం ఉంది. ఇప్పటివరకు ఆడిన అయిదు మ్యాచ్‌లల్లో ఈ జట్టు గెలిచింది ఒక్కటంటే ఒక్కటే. నాలుగింట్లో ఓడింది. వరుసగా మూడు ఓటములతో హ్యాట్రిక్ సైతం కొట్టిందీ బెంగళూరు జట్టు. ప్రస్తుతం ఈ జట్లు ఖాతాలో ఉన్నవి రెండు పాయింట్లు మాత్రమే. పాయింట్ల పట్టికలో తొమ్మిదో స్థానంలో కొనసాగుతోంది.

తొలి మ్యాచ్‌లో చెన్నై సూపర్ కింగ్స్‌తో ఓడిపోయిన అనంతరం పంజాబ్ కింగ్స్‌పై ఘన విజయాన్ని సాధించింది. ఆర్సీబీ ఈ సీజన్‌లో ఇప్పటివరకు గెలిచిన మ్యాచ్ ఏదైనా ఉందంటే అదొక్కటే. అనంతరం కోల్‌కత నైట్ రైడర్స్, లక్నో సూపర్ జెయింట్స్, రాజస్థాన్ రాయల్స్‌పై వరుస ఓటములను చవి చూసింది. ముంబై ఇండియన్స్‌తో జరిగే ఈ మ్యాచ్‌లో గెలిస్తే కొంత పరువు కాపాడుకున్నట్టవుతుంది.

ముంబై ఇండియన్స్ పరిస్థితి కూడా ఇట్లాగే ఉంది. రాయల్ ఛాలెంజర్స్‌కు భిన్నంగా ఏమీ లేదు. మొన్నటి వరకు ముంబై ఇండియన్స్ కూడా వరుస ఓటములతో కుదేల్ అయిన జట్టే. ఆడిన తొలి మూడింట్లో ఓడిపోయి ఆ జట్టు కూడా హ్యాట్రిక్ కొట్టింది రాయల్ ఛాలెంజర్స్ తరహాలోనే. ఎట్టకేలకు ఢిల్లీ కేపిటల్స్‌పై గెలిచింది. విన్నింగ్ ట్రాక్ ఎక్కింది.

ఢిల్లీపై 234 పరుగులను చేసింది ముంబై ఇండియన్స్. ఆ జట్టు బ్యాటింగ్ ఆర్డర్ మొత్తం ఫుల్ ఫామ్‌లోకి వచ్చినట్టే కనిపించిందా మ్యాచ్‌లో. ఆర్సీబీతో జరిగే మ్యాచ్‌లో కూడా దాన్ని కొనసాగిస్తుందా? లేక ఢిల్లీ కేపిటల్స్‌పై సాధించిన గెలుపు గాలివాటమేనని ప్రూవ్ చేసుకుంటుందా అనేది ఈ రాత్రికి తేలిపోతుంది.

ముంబై ఇండియన్స్‌పై ఆర్సీబీకి మంచి ట్రాక్ రికార్డే ఉంది. చివరి అయిదు మ్యాచ్‌లల్లో ఒక్క మ్యాచ్ మాత్రమే ఓడింది. మిగిలిన నాలుగింట్లో విజయం సాధించింది. చివరి అయిదింట్లో తొలి మ్యాచ్‌లో 2 వికెట్లు, రెండోదాంట్లో 54 పరుగులు, మూడో గేమ్‌లో ఏడు వికెట్లు, ఆ తరువాతతి మ్యాచ్‌లో ఎనిమిది వికెట్లతో ముంబైని ఓడించింది. అయిదో మ్యాచ్‌లో మాత్రం ఆరు వికెట్లతో ఓడింది.