చెన్నై సూపర్ కింగ్స్ తొందరపాటు: రవీంద్ర జడేజా కేప్టెన్సీ ధ్వంసం: ఆ నిర్ణయంతో అప్‌సెట్

ముందు నుంచీ ఎదురుదెబ్బలే..

ఈ సీజన్ ఆరంభం నుంచీ చెన్నై సూపర్ కింగ్స్ అన్నీ అవాంతరాలే ఎదురయ్యాయి. ఎదురుదెబ్బలే తగిలాయి. మహేంద్ర సింగ్ ధోనీ వారసుడిగా చెన్నై సూపర్ కింగ్స్ కేప్టెన్సీ పగ్గాలను రాత్రికి రాత్రే అందుకున్నాడు రవీంద్ర జడేజా. చివరి నిమిషంలో అతను సారధ్య బాధ్యతలను స్వీకరించాడు. టోర్నమెంట్ ఆరంభానికి ముందు ఆయనను కేప్టెన్‌గా ప్రకటించింది ఫ్రాంఛైజీ. సరిగ్గా రెండు రోజుల ముందు ఈ పరిణామాల చోటు చేసుకున్నాయి. తాను కెప్టెన్సీ నుంచి తప్పుకున్నట్లు ధోనీ ప్రకటించడం.. తన వారసుడిగా రవీంద్ర జడేజాను ఎంపిక చేయాలని ఫ్రాంఛైజీకి సూచించడం.. దానికి మేనేజ్‌మెంట్ అంగీకరించడం చకచకా సాగిపోయాయి.

అనుభవం లేకున్నా..

అంతకుముందు కెప్టెన్‌ వ్యవహరించిన అనుభవం రవీంద్ర జడేజాకు లేదు. తన కెరీర్‌లో ఏ రోజు కూడా అతను జట్టును ముందుండి నడిపించన సందర్భాలు లేవు. కనీసం వైస్ కేప్టెన్‌గా అయినా.. స్టాండ్ బైగా అయినా కేప్టెన్‌గా రవీంద్ర జడేజా పని చేయలేదు. అలాంటిది రాత్రికి రాత్రి సెకెండ్ మోస్ట్ సక్సెస్‌ఫుల్ జట్టుకు కేప్టెన్సీ బాధ్యతలను స్వీకరించడం అంటే మాటలు కాదు. జట్టును ముందుండి నడిపించడం అనేది అసలు సిసలు సవాల్‌. దీన్ని సమర్థవంతంగా నిర్వహించలేకపోయాడనేది ఈ ఐపీఎల్ సీజన్ స్పష్టం చేసింది.

కేప్టెన్సీ ఒత్తిళ్లు..

సాధారణంగా ఏ కేప్టెన్‌ అయినా తీవ్ర ఒత్తిడిని ఎదుర్కోవడం సాధారణమే. ఈ బాధ్యతల వల్ల తన వ్యక్తిగత ప్రదర్శనను కూడా కొన్ని సందర్భాల్లో పణంగా పెట్టాల్సి వస్తుంది. జడేజా విషయంలో అదే జరిగింది. ఒక్క రోజు కూడా కేప్టెన్‌గా వ్యవహరించని ప్లేయర్‌కు ఒక్కసారిగా ఓ మెగా ఈవెంట్‌లో మోస్ట్ సక్సెస్‌ఫుల్ జట్టు బాద్యతలను అప్పగించడం- అతని వ్యక్తిగత ప్రదర్శనను సైతం దెబ్బతీసింది. బ్యాటింగ్ చేయలేక.. బౌలింగ్ వేయలేక తీవ్రంగా సతమతం అయ్యాడు.

చెన్నై ఫ్రాంఛైజీ తొందరపాటు నిర్ణయంగా..

తనను అప్పటికప్పుడు చెన్నై సూపర్ కింగ్స్ కేప్టెన్‌గా నియమించడం.. టోర్నమెంట్ కొనసాగుతుండగానే మళ్లీ తొలగించడం వంటి చర్యలు రవీంద్ర జడేజను తీవ్ర మనస్తాపానికి గురి చేసిందని అతని సన్నిహితులు చెబుతున్నారు. కొంత సమయం ఇచ్చి అతనికి కేప్టెన్సీ పగ్గాలు అందించి ఉంటే మెరుగ్గా ఉండేదని జడేజా భావిస్తున్నాడని అంటున్నారు. అంతా అప్పటికప్పుడు, రాత్రికి రాత్రి జరిగిపోవడం వల్ల- కేప్టెన్‌గా ఎదురైన సవాళ్లను జడేజ అధిగమించలేకపోయాడని స్పష్టం చేస్తోన్నారు.

అన్‌ఫాలో చేయడం కూడా..

కేప్టెన్సీ బాధ్యతలను ధోనీకి అప్పగించడం, గాయం వల్ల టోర్నమెంట్ నుంచి అర్ధాంతరంగా రూల్డ్ అవుట్ కావడం, చెన్నై సూపర్ కింగ్స్ మేనేజ్‌మెంట్ తన సోషల్ మీడియా ప్లాట్‌ఫామ్స్‌ను అన్ ఫాలో చేయడం వంటి పరిణామాలు రవీంద్ర జడేజను మరింత బాధ పెట్టాయని సన్నిహితులు చెబుతున్నారు. కేప్టెన్సీ బాధ్యతల వల్ల సాధారణంగా తనలో ఉండే కిల్లింగ్ గుణాన్ని జడేజా కోల్పోయాడని, ఈ సీజన్‌లో అతను అన్ని రంగాల్లోనూ విఫలం కావడానికి అదే కారణమని స్పష్టం చేస్తోన్నారు.