శివం దుబే నిర్వాకం: క్యాప్‌ను విసిరి కొట్టబోయిన జడేజా, నెత్తిపై చేతులు పెట్టుకున్న బ్రావో

బ్యాటింగ్‌లో రాణించని శివం..

తొలుత బ్యాటింగ్ చేసిన చెన్నై సూపర్ కింగ్స్ 20 ఓవర్లలో అయిదు వికెట్ల నష్టానికి 169 పరుగులు చేసింది. ఓపెనర్ రుతురాజ్ చాలాకాలం తరువాత ఫామ్‌లోకి వచ్చాడు. భారీ ఇన్నింగ్ ఆడాడు. 48 బంతుల్లో అయిదు ఫోర్లు, అయిదు సిక్సర్లతో 73 పరుగులు చేశాడు. మరో ఓపెనర్ రాబిన్ ఉతప్ప, మొయిన్ అలీ, శివం దుబే తక్కువ పరుగులకే అవుట్ అయినా.. మిడిలార్డర్‌లో అంబటి రాయుడు, చివర్లో రవీంద్ర జడేజా ధాటిగా ఆడటంతో ఆ స్కోర్ సాధ్యపడింది.

వారిద్దరి వల్లే..

గుజరాత్ టైటాన్స్‌ను మిడిలార్డర్ బ్యాటర్ డేవిడ్ మిల్లర్, స్టార్ స్పిన్నర్, ఈ మ్యాచ్‌కు కేప్టెన్‌గా వ్యవహరించిన రషీద్ ఖాన్ గెలిపించారు. 51 బంతుల్లో ఆరు సిక్సర్లు, ఎనిమిది ఫోర్లతో డేవిడ్ మిల్లర్ 94 పరుగులు చేసి నాటౌట్‌గా నిలిచాడు. రషీద్ ఖాన్ 21 బంతుల్లో 40 పరుగులు బాదాడు. ఇందులో మూడు సిక్సర్లు, రెండు ఫోర్లు ఉన్నాయి. ఈ ఇద్దరూ చెన్నై చేతుల్లో నుంచి మ్యాచ్‌ను లాగేసుకున్నారు. 18వ ఓవర్‌లో రషీద్ ఖాన్ 25 పరుగులను రాబట్టడంతో ఒక్కసారిగా మ్యాచ్ మొత్తం గుజరాత్ టైటాన్స్ వైపు మొగ్గు చూపింది.

మిల్లర్‌ను అవుట్ చేసే ఛాన్స్ దక్కినా..

డేవిడ్ మిల్లర్ 78 పరుగుల వద్ద ఉన్న సమయంలో అవుట్ అయ్యే ప్రమాదం నుంచి తృటిలో తప్పించుకున్నాడు. 17వ ఓవర్ రెండో బంతికి ఈ సంఘటన చోటు చేసుకుంది. డ్వేన్ బ్రావో బౌలింగ్‌లో భారీ షాట్ ఆడిన మిల్లర్ టైమింగ్ మిస్ అయ్యాడు. బంతిని కనెక్ట్ కాలేకపోయాడు. గాల్లోకి లేచిన బంతి మిడ్ ఆన్‌లో ఫీల్డింగ్ చేస్తోన్న శివం దుబే వైపు దూసుకెళ్లింది. దాన్ని అందుకోలేకపోయాడు శివం దుబే. కనీసం ఆ ప్రయత్నం కూడా చేయలేదు. గాల్లోకి లేచిన బంతి.. శివం దుబే ఎదురుగా నేలపై వాలింది.

22 బంతుల్లో 50 పరుగులు చేయాల్సిన దశలో..

అప్పటికి గుజరాత్ టైటాన్స్ 22 బంతుల్లో 50 పరుగులు చేయాల్సిన దశలో ఉంది. దుబే- ఏ మాత్రం అప్రమత్తంగా ఆ క్యాచ్ అందుకుని ఉండే వాడే.. మిల్లర్ వెనుదిరిగే వాడే. అదే జరిగివుంటే మ్యాచ్ ఫలితం మరోలా ఉండేది. డేవిడ్ మిల్లర్ ఇచ్చిన లడ్డూలాంటి క్యాచ్‌ను కనీసం అందుకునే ప్రయత్నం కూడా చేయకపోవడం పట్ల శివం దుబేపై రవీంద్ర జడేజా, బౌలర్ డ్వేన్ బ్రావో అసహనాన్ని వ్యక్తం చేశారు. రవీంద్ర జడేజా తన క్యాప్‌ను నేలకు విసిరి కొట్టబోయి.. చివరి నిమిషంలో తమాయించుకున్నాడు. బ్రావో- ఇలా చేశావేంటంటూ నెత్తిపై చేతులు పెట్టుకున్నాడు.