IPL2021 Final, CSKvsKKR: చెన్నైని కలవరపెడుతోన్న కోల్‌కతా ట్రాక్ రికార్డు! దుబాయ్ పిచ్, ఐపీఎల్ రికార్డ్స్ ఇవే!

హైదరాబాద్: ఇండియన్ ప్రీమియర్ లీగ్ (ఐపీఎల్) 2021 తుది అంకానికి చేరుకుంది. ఫైనల్ పోరులో చెన్నై సూపర్ కింగ్స్, కోల్‌కతా నైట్ రైడర్స్ జట్లు అమితుమీ తేల్చుకోనున్నాయి. ఈ రెండు జట్ల మధ్య దుబాయ్ వేదికగా శుక్రవారం రాత్రి 7.30 గంటలకి మ్యాచ్ ఆరంభం కానుంనుండగా.. టాస్ 7 గంటలకు పడనుంది. క్వాలిఫయర్-1లో ఢిల్లీ క్యాపిటల్స్ జట్టుపై గెలిచిన చెన్నై నేరుగా ఫైనల్‌కి చేరింది. రాయల్ ఛాలెంజర్స్ బెంగళూరు‌ని ఎలిమినేటర్‌లో, ఢిల్లీ క్యాపిటల్స్‌ని క్వాలిఫయర్-2లో ఓడించిన కోల్‌కతా ఫైనల్‌కి అర్హత సాధించింది. లీగ్ దశలో చెన్నై వరుస ఓటములను ఎదుర్కొనగా.. కోల్‌కతా మాత్రం వరుస విజయాలతో సత్తాచాటింది. దాంతో చెన్నైతో పోలిస్తే.. కోల్‌కతా ఇప్పుడు మంచి ట్రాక్‌లో కనిపిస్తోంది.

14 ఏళ్ల ఐపీఎల్ చరిత్రలో చెన్నై సూపర్ కింగ్స్ ఫైనల్‌కి చేరడం ఇది తొమ్మిదోసారి కాగా.. ఇప్పటికే మూడు సార్లు టైటిల్ గెలిచింది. ఇక కోల్‌కతా నైట్ రైడర్స్ ఫైనల్‌కి చేరడం ఇది మూడో సారికాగా.. రెండు సార్లూ టైటిల్ విజేతగా నిలిచింది. ఇప్పుడు ఈ ట్రాక్ రికార్డే చెన్నైలో టెన్షన్ పెంచుతోంది. ఐపీఎల్ ఫైనల్లో ఇప్పటి వరకూ కేవలం ఒకే ఒక సందర్భంలో చెన్నై, కోల్‌కతా జట్లు ఢీకొన్నాయి. 2012లో కోల్‌కతా.. చెపాక్ వేదికగా జరిగిన ఫైనల్లో చెన్నైపై 5 వికెట్ల తేడాతో ఓడించింది. 2014లోనూ ఫైనల్‌కి చేరిన కోల్‌కతా.. పంజాబ్ కింగ్స్‌పై 3 వికెట్ల తేడాతో గెలుపొందింది. దాంతో మూడోసారి కూడా అజేయ ఫైనల్‌ రికార్డుని కొనసాగించాలని కోల్‌కతా చోస్తోంది. ఫైనల్ వచ్చిన రెండుసార్లు కోల్‌కతా టైటిల్ గెలవడమే ఇప్పుడు చెన్నైని కలవరపెడుతోంది.

ఐపీఎల్ టోర్నీలో ఇప్పటివరకూ చెన్నై సూపర్ కింగ్స్, కోల్‌కతా నైట్ రైడర్స్ జట్లు 27 మ్యాచ్‌ల్లో తలపడ్డాయి. ఇందులో 17 మ్యాచ్‌ల్లో చెన్నై విజయం సాధించగా.. 9 మ్యాచ్‌ల్లో కోల్‌కతా గెలుపొందింది. ఒక మ్యాచ్‌లో మాత్రం ఫలితం రాలేదు. గత ఆరు మ్యాచుల్లో కోల్‌కతాపై చెన్నై ఏకంగా ఐదింటిలో గెలిచింది. ఇక ఈ మ్యాచ్‌కి ఆతిథ్యమిస్తున్న దుబాయ్ పిచ్‌ బ్యాటింగ్, బౌలింగ్‌కి అనుకూలంగా ఉండనుంది. మ్యాచ్‌ జరిగే కొద్దీ నెమ్మదించే ఈ పిచ్‌పై బంతి బాగా తిరుగుతుంది. ఈ నేపథ్యంలో ఇరు జట్ల స్పిన్నర్లు ప్రభావం చూపనున్నారు. మైదానం పెద్దది కావడంతో బౌండరీలు రావడం కాస్త కష్టమే. ఈ పిచ్ మీద ఇప్పటివరకు ఈ సీజన్లో 185 పరుగుల కంటే ఎక్కువగా నమోదు కాలేదు. సగటు స్కోర్ 150-170. మ్యాచుకు ఎలాంటి వర్షపు ముప్పులేదు. ఇక టాస్ గెలిచిన కెప్టెన్ బౌలింగ్ ఎంచుకొనే అవకాశాలే ఎక్కువ.

తుది జట్లు (అంచనా):
చెన్నై సూపర్ కింగ్స్: రుతురాజ్ గైక్వాడ్, ఫాఫ్ డుప్లెసిస్, మోయిన్ అలీ, రాబిన్ ఉతప్ప, అంబటి రాయుడు, ఎంఎస్ ధోనీ (కెప్టెన్, కీపర్), రవీంద్ర జడేజా, డ్వేన్ బ్రావో, శార్దూల్ ఠాకూర్, దీపక్ చహర్, జోష్ హాజెల్‌వుడ్.
కోల్‌కతా నైట్ రైడర్స్:
శుభమాన్ గిల్, వెంకటేష్ అయ్యర్, రాహుల్ త్రిపాఠి, నితీష్ రాణా, ఇయోన్ మోర్గాన్ (కెప్టెన్), దినేష్ కార్తీక్ (కీపర్), సునీల్ నరైన్, షకీబ్ అల్ హసన్/ఆండ్రీ రస్సెల్, లాకీ ఫెర్గూసన్, శివమ్ మావి, వరుణ్ చక్రవర్తి.