నా స్ఫూర్తి, స్నేహితుడు, సోదరుడు, లెజెండ్‌: ధోనీని ఉద్దేశించి పాండ్యా

ధోని మెరుపులు

ఇదిలా ఉంటే, ఈ మ్యాచ్‌లో టాస్ గెలిచి తొలుత బ్యాటింగ్ చేసిన చెన్నై సూపర్ కింగ్స్ జట్టు అంబటి రాయుడు 37 బంతుల్లో 42(3 ఫోర్లు), ధోని 29 బంతుల్లో 37(3 సిక్సులు)తో రాణించడంతో టాస్ గెలిచి తొలుత బ్యాటింగ్ ఎంచుకున్న చెన్నై సూపర్ కింగ్స్ నిర్ణీత 20 ఓవర్లలో 4 వికెట్లు కోల్పోయి 131 పరుగులు చేసింది.

132 పరుగుల స్వల్ప లక్ష్యంతో

అనంతరం సీఎస్‌కే నిర్దేశించిన 132 పరుగుల విజయ లక్ష్యాన్ని ముంబై ఇండియన్స్ 18.3 ఓవర్లలో 4 వికెట్లు కోల్పోయి చేధించింది. సూర్యకుమార్ యాదవ్ 54 బంతుల్లో 71(10 ఫోర్లు) హాఫ్ సెంచరీతో రాణించి ముంబై విజయంలో కీలకపాత్ర పోషించాడు. ఈ మ్యాచ్‌ అనంతరం ముంబై ఆల్ రౌండర్ హార్దిక్ పాండ్యా చేసిన ట్వీట్ ఇప్పుడు చర్చనీయాంశమైంది.

పాండ్యా ట్విట్టర్‌లో

మ్యాచ్ అనంతరం పాండ్యా తన ట్విట్టర్‌లో చెపాక్‌ స్టేడియంలో ధోనీతో కలిసి ఉన్న ఓ ఫొటోను ట్విటర్‌ వేదికగా పంచుకున్నారు. అంతేకాదు "నా స్ఫూర్తి, నా స్నేహితుడు, నా సోదరుడు, నా లెజెండ్‌ ఈయనే.. మహేంద్ర సింగ్ ధోనీ" అంటూ పోస్టు చేశాడు. దీంతో పాటు ధోనీ హెలికాప్టర్‌ షాట్లను గుర్తుచేస్తూ హెలికాప్టర్‌ ఎమోజీని పెట్టాడు.

ధోని నాయకత్వంలోనే పాండ్యా అరంగేట్రం

హార్దిక్ పాండ్యా తన అంతర్జాతీయ క్రికెట్ అరంగేట్రాన్ని ధోని నాయకత్వంలోని ఆరంభించాడు. అంతేకాదు ప్రస్తుతం జరుగుతున్న ఐపీఎల్ 2019 సీజన్‌లో ధోని హెలికాప్టర్ షాట్లతో అభిమానులను సైతం అలరించాడు. ఇందులో భాగంగానే ధోనీ తనకు స్ఫూర్తి అంటూ పాండ్యా పేర్కొన్నాడు. ఈ సీజన్‌లో పాండ్యా ముంబై విజయాల్లో కీలకపాత్ర పోషించాడు.