'ప్రతి మ్యాచ్‌లో రసెల్‌ ఆడతాడనుకోవడం సరైంది కాదు'

6 ఓవర్ తర్వాత తడబడ్డాం:

మ్యాచ్ అనంతరం కోల్‌కతా నైట్‌ రైడర్స్‌ కెప్టెన్ దినేష్ కార్తీక్ మాట్లాడుతూ... 'బ్యాటింగ్ చేస్తున్నప్పుడు 6 ఓవర్ తర్వాత మేము తడబడ్డాం. మరోవైపు వికెట్ కూడా అంతలా సహకరించలేదు. బంతి బాగా టర్న్ అయింది. ఈ అవకాశాన్ని ముంబై బౌలర్లు సద్వినియోగం చేసుకున్నారు. మంచు కారణంగా రెండవ ఇన్నింగ్స్ లో బ్యాటింగ్ కొంచెం తేలికవుతుంది. ఇది ముంబైకి కలిసొచ్చింది' అని కార్తీక్ పేర్కొన్నారు.

రసెల్‌ అద్భుతంగా ఆడాడు:

'రసెల్‌ టాప్ ఆర్డర్ లో బ్యాటింగ్‌ చేయడానికి అవకాశం ఉంది. కానీ ప్రతి మ్యాచ్‌లో రసెల్‌ ఆడతాడనుకోవడం సరైంది కాదు. అతడి మీద ఆధార పడటం సబబు కాదు. ఈ టోర్నమెంట్‌ మొత్తంలో రసెల్‌ అద్భుతంగా ఆడాడు. ఈ సీజన్‌ అంతగా కలిసిరాలేదు, మాకు ఇది ఉత్తమ సీజన్ కాదు. చాలా విషయాల్లో మేము మెరుగుపడాలి. వచ్చే ఏడాది అవన్ని అధిగమించి మరింత ఆత్మవిశ్వాసంతో వస్తాం' అని కార్తీక్ చెప్పుకొచ్చారు.

కోల్‌కతా ఓటమి:

టాస్‌ ఓడి ముందుగా బ్యాటింగ్‌ చేసిన కోల్‌కతా 20 ఓవర్లలో 7 వికెట్ల నష్టానికి 133 పరుగులు చేసింది. క్రిస్‌ లిన్‌ (29 బంతుల్లో 41; 2 ఫోర్లు, 4 సిక్సర్లు), రాబిన్‌ ఉతప్ప (47 బంతుల్లో 40; 1 ఫోర్, 3 సిక్సర్లు)లు ఆదుకున్నారు. అనంతరం ముంబై 16.1 ఓవర్లలో వికెట్‌ కోల్పోయి 134 పరుగులు చేసింది. రోహిత్‌ శర్మ (48 బంతుల్లో 55 నాటౌట్‌; 8 ఫోర్లు), సూర్య కుమార్‌ (27 బంతుల్లో 46 నాటౌట్‌; 5 ఫోర్లు, 2 సిక్సర్లు)లు చెలరేగారు.