మిశ్రా అబ్‌స్ట్రక్టింగ్‌ ద ఫీల్డ్‌ .. బెస్ట్ బ్యాట్స్‌మన్‌ అంటూ ట్విట్టర్లో జోకులు

3 బంతుల్లో 2 పరుగులు:

విశాఖలో సన్‌రైజర్స్ హైదరాబాద్‌, ఢిల్లీ క్యాపిటల్స్ మధ్య ఎలిమినేటర్ మ్యాచ్‌ జరిగింది. ఈ మ్యాచ్‌లో తొలుత బ్యాటింగ్ చేసిన సన్‌రైజర్స్ నిర్ణీత 20 ఓవర్లలో 8 వికెట్లు కోల్పోయి 162 పరుగులు చేసింది. అనంతరం 163 పరుగుల విజయ లక్ష్యంతో బరిలోకి దిగిన ఢిల్లీ క్యాపిటల్స్ విజయానికి 3 బంతుల్లో 2 పరుగులు అవసరమయ్యాయి.

'అబ్‌స్ట్రక్టింగ్‌ ద ఫీల్డ్‌' ఔట్:

ఖలీల్ అహ్మద్ వేసిన నాలుగో బంతికి షాట్‌ ఆడబోయి మిశ్రా విఫలమయ్యాడు. అయినా పరుగుకు ప్రయత్నించగా.. కీపర్‌ సాహా బంతిని విసరగా అది స్టంప్స్‌కు తాకలేదు. అనంతరం బంతిని అందుకున్న ఖలీల్‌ అహ్మద్.. నాన్‌-స్ట్రైకింగ్‌ వైపున్న స్టంప్స్‌కు విసిరాడు. ఇదే సమయంలో మిశ్రా స్టంప్స్‌కు అడ్డంగా పరుగెత్తాడు. దీంతో ఖలీల్‌ విసిరిన బంతి అతడికే తాకింది. దీనిపై ఖలీల్‌ థర్డ్ అంఫైర్ నిర్ణయాన్ని కోరాడు. ఖలీల్‌ త్రోకు ఉద్దేశపూర్వకంగా అడ్డుగా వెళ్లినందుకు ‘అబ్‌స్ట్రక్టింగ్‌ ద ఫీల్డ్‌' కింద అంఫైర్ అతడిని ఔట్‌గా ప్రకటించాడు.

భారత బెస్ట్ బ్యాట్స్‌మన్‌:

అబ్‌స్ట్రక్టింగ్‌ ద ఫీల్డ్‌ ద్వారా ఔట్ అవ్వడంతో క్రికెట్ అభిమానులు ట్విట్టర్ వేదికగా మిశ్రాపై వ్యంగంగా జోకులు పేల్చుతున్నారు. మరికొందరు ఇంకో అడుగు ముందుకేసి వీడియోలతో విమర్శలు చేస్తున్నారు. 'అమిత్ మిశ్రా భారత బెస్ట్ బ్యాట్స్‌మన్‌. అతడిని బౌలర్, కీపర్, ఫీల్డర్ ఎవ్వరూ ఔట్ చేయలేరు' అని ఓ అభిమాని పోస్ట్ చేసాడు. 'మిశ్రా వికెట్ల మధ్య పరుగెత్తడంలో గొప్ప రన్నర్' అని మరో అభిమాని పోస్ట్ చేసాడు.