ఇలాగైతే ఒక్క మ్యాచ్ కూడా గెలవలేం:: విరాట్ కోహ్లీ ఎమోషనల్

విజయానికి మేము అర్హులం కాదు

'సింగిల్స్‌ను బౌండరీలుగా మార్చడాన్ని ఆపలేకపోయాం. ఇలా అయితే విజయానికి మేము అర్హులం కాదు. బౌలింగ్‌, ఫీల్డింగ్‌ విభాగాల్లో మరింత శ్రమించాల్సి ఉంది. ప్లే ఆఫ్‌కు అర్హత సాధించాలంటే మిగిలిన ఏడు మ్యాచ్‌ల్లో ఆరింట విజయం సాధించాలి. దానిని దృష్టిలో పెట్టుకుని ప్రతి మ్యాచ్‌ని సెమీ పైనల్ మ్యాచ్‌లా ఆడతాం' అని కోహ్లీ అన్నాడు.

175 పరుగులు చేసిన బెంగళూరు

ఆదివారం చిన్నస్వామి స్టేడియంలో జరిగిన మ్యాచ్‌లో టాస్‌ ఓడి తొలుత బ్యాటింగ్‌కు దిగిన బెంగళూరు 20 ఓవర్లలో నాలుగు వికెట్ల నష్టానికి 175 పరుగులు చేసింది. అనంతరం 176 పరుగుల లక్ష్యంతో బరిలోకి దిగిన కోల్‌కతాకు ఓపెనర్లు క్రిస్‌ లిన్(62), నరైన్‌ (27) చక్కటి శుభారంభం ఇచ్చారు.

పవర్‌ప్లేలో 51 పరుగులు చేసిన కోల్‌కతా

దీంతో పవర్‌ప్లేలో కోల్‌కతాకు 51 పరుగులు వచ్చాయి. 7 పరుగుల వ్యక్తిగత స్కోరు వద్ద తనకు లభించిన లైఫ్‌ని క్రిస్ లిన్ పూర్తిగా సద్వినియోగం చేసుకున్నాడు. తొలి వికెట్‌కు 59 పరుగులు జోడించాక నరైన్‌ ఔటైనా.. ఆ తర్వాత క్రీజులోకి వచ్చిన రాబిన్ ఊతప్ప(36)తో కలిసి స్కోరు బోర్డుని పరిగెత్తించాడు.

హాఫ్ సెంచరీతో రాణించిన క్రిస్ లిన్

ఈ ఇద్దరూ వరుస బౌండరీలతో విరుచుకుపడటంతో 10 ఓవర్లు ముగిసేసరికి కోల్‌కతా వికెట్ నష్టానికి 88 పరుగులు చేసింది. ఆ తర్వాత మరో ఇరవై పరుగులు జోడించాక మురుగన్‌ అశ్విన్‌ బౌలింగ్‌లో రాబిన్ ఉతప్ప పెవిలియన్‌కు చేరాడు. ఈ దశలో క్రిస్ లిన్ 42 బంతుల్లో హాఫ్ సెంచరీ నమోదు చేశాడు.

రిటైర్డ్‌ హర్ట్‌గా వెనుదిరిగిన నితీష్ రాణా

అనంతరం క్రీజులోకి వచ్చిన నితీష్ రాణా(15) పరుగుల వద్ద 17వ ఓవర్లో రిటైర్డ్‌ హర్ట్‌గా వెనుదిరగాడు. అనంతరం క్రీజులోకి వచ్చిన రసెల్‌ (0) తొలి బంతికే ఔటయ్యాడు. దీంతో బెంగళూరు శిబిరంలో ఆశలు చిగురించాయి. ఈ సమయంలో విజయానికి 3 ఓవర్లలో 29 పరుగులు అవసరం కాగా... లిన్‌తో కలిసి కెప్టెన్ దినేశ్ కార్తీక్‌ చెలరేగాడు. చివరి ఓవర్‌ తొలి బంతిని శుభమాన్‌ గిల్‌(5 నాటౌట్‌) బౌండరీకి తరలించి కోల్‌కతాకు విజయాన్ని అందించాడు.