Click it and Unblock the Notifications
ఒక్కో మ్యాచ్‌లో ఒక్కో ఆటగాడి సత్తా
రెండేళ్ల నిషేధం తర్వాత పునరాగమనం చేసిన చెన్నై సూపర్ కింగ్స్.. మొదటి మ్యాచ్ నుంచీ జోరు కొనసాగిస్తూనే వస్తోంది. జట్టులో దాదాపు 30ఏళ్లకు పైబడిన ఆటగాళ్లే ఉన్నా..ఒక్కో మ్యాచ్‌లో ఒక్కో ఆటగాడు సత్తా చాటుతూ జట్టు విజయంలో కీలకపాత్ర పోషిస్తూ వస్తున్నారు. తొలి మ్యాచ్‌లో బ్రావో, రెండో మ్యాచ్‌లో బిల్లింగ్స్‌, మూడో మ్యాచ్‌లో ధోనీ, నాలుగో మ్యాచ్‌లో వాట్సన్‌..ఇక సన్‌రైజర్స్‌తో మ్యాచ్‌లో తెలుగు కుర్రాడు అంబటి రాయుడు..ఇలా ఒక్కొక్కరు ఒక్కో మ్యాచ్‌లో చెలరేగి జట్టును విజయతీరాలకు చేరుస్తున్నారు.
దీపక్‌ చాహార్‌ రూపంలో నమ్మకమైన బౌలర్‌
దీంతో చెన్నై ఆడిన 5 మ్యాచ్‌లలో 4 గెలిచి పాయింట్ల పట్టికలో 2వ స్థానంలో నిలిచింది. కానీ, ఐపీఎల్లో మెరుగైన రికార్డు ఉన్న సురేశ్‌ రైనా నుంచి ఈ సీజనులో చెప్పుకోదగ్గ ఇన్నింగ్స్‌ రాలేదు. ఈ క్రమంలో బెంగళూరుతో మ్యాచ్‌లో రైనా బ్యాట్‌కు పనిచెప్తే చెన్నైకు తిరుగుండదు. మరోవైపు బౌలింగ్‌లైనప్‌ కాస్త బలహీనంగా కనిపిస్తున్న చెన్నైకి దీపక్‌ చాహార్‌ రూపంలో నమ్మకమైన బౌలర్‌ దొరికాడు. ముఖ్యంగా సన్‌రైజర్స్‌తో మ్యాచ్‌లో చాహార్‌ అద్భుతంగా రాణించి జట్టు విజయంలో కీలకపాత్ర పోషించాడు.
డివిలియర్స్‌, కోహ్లీను తక్కువ పరుగులకే
కరణ్‌ శర్మ, షేన్‌ వాట్సన్‌, డెత్‌ ఓవర్ల స్పెషలిస్ట్‌ డ్వేన్‌ బ్రావో కూడా స్థాయికి తగ్గ ప్రదర్శన చేస్తుండటం చెన్నైకు కలిసొచ్చే అంశం. స్పిన్‌ బౌలర్‌ ఇమ్రాన్‌ తాహీర్‌ కూడా ఈ మ్యాచ్‌కు అందుబాటులో ఉండే అవకాశాలు ఎక్కువగానే ఉన్నాయి. ఈ క్రమంలో బెంగళూరుతో మ్యాచ్‌లో బౌలర్లంతా సమష్టిగా రాణించి కీలక ఆటగాళ్లు డివిలియర్స్‌, కోహ్లీను తక్కువ పరుగులకే కట్టడి చేస్తే చెన్నైను మరోసారి విజయం వరిస్తుంది.
బలమైన బ్యాటింగ్‌ లైనప్‌ ఉన్నా తడబడుతూనే
రాయల్‌ ఛాలెంజర్స్‌ బెంగళూరు బలమైన బ్యాటింగ్‌ లైనప్‌ కలిగి ఉన్నా ఈ సీజన్‌ ఆరంభం నుంచి తడబడుతూనే ఉంది. ప్రపంచంలోనే ఎలాంటి బౌలర్‌నైనా సులువుగా ఎదుర్కొనే సత్తా ఉన్న డివిలియర్స్‌, విరాట్ కోహ్లీ లాంటి కీలక ఆటగాళ్ల మీదే జట్టు దాదాపుగా ఆధారపడుతోంది. డివిలియర్స్‌ ఫామ్‌లో ఉన్నా కోహ్లీ తడబాటు బెంగళూరు అభిమానుల్ని కాస్త కలవరపెడుతోంది. మరోవైపు ఓపెనర్‌ డికాక్‌, కోరే అండర్సన్‌ బ్యాట్‌ ఝళిపిస్తే బెంగళూరు స్కోరుబోర్డు పరుగులు పెట్టే అవకాశం ఉంది.
కీలక సమయాల్లో జట్టుకు తోడ్పాటునందిస్తున్నాడు
మిడిల్‌ ఆర్డర్‌లో మన్‌దీప్‌ సింగ్‌ కీలక సమయాల్లో రాణిస్తూ జట్టుకు తోడ్పాటునందిస్తున్నాడు. ఇక బౌలింగ్‌లో ఉమేశ్‌ యాదవ్‌ అద్భుతంగా రాణిస్తుండటం బెంగళూరుకు అదనపు బలం. అతనికి తోడు వాషింగ్టన్‌ సుందర్‌, క్రిస్‌ వోక్స్‌, చాహల్‌ కూడా రాణిస్తే చెన్నైను తక్కువ పరుగులకే కట్టడి చేయవచ్చు.
ఐపీఎల్లో బెంగళూరుపై చెన్నైదే పైచేయి:
ఇప్పటి వరకూ ఇరు జట్లు ఐపీఎల్లో 21సార్లు తలపడగా, అందులో చెన్నై 13సార్లు గెలవగా, ఆర్‌సీబీ 7సార్లు విజయం సాధించింది. ఒక్క మ్యాచ్‌లో ఫలితం తేలలేదు. బెంగళూరు వేదికగా జరిగిన ఏడు మ్యాచ్‌లలో చెన్నై మూడింట గెలవగా, ఆర్‌సీబీ మూడు సార్లు నెగ్గంది. మిగతా మరో మ్యాచ్‌లో ఫలితం తేలలేదు. మరో వికెట్‌ తీస్తే ఉమేశ్‌ యాదవ్‌ ఐపీఎల్లో 100వికెట్లు తీసిన బౌలర్ల జాబితాలో చేరతాడు.
