బెంగళూరు రికార్డు బద్దలు కొట్టిన చెన్నై: కానీ, కోహ్లీని అందుకోలేకపోయారు

తొలి మ్యాచ్‌లోనే చెన్నై విజయం

రెండేళ్లు విరామం తర్వాత ఐపీఎల్ 11వ సీజన్‌లోకి పునరాగమనం చేసిన చెన్నై సూపర్ కింగ్స్ తన తొలి మ్యాచ్‌లో భాగంగా డిఫెండింగ్ ఛాంపియన్ ముంబై ఇండియన్స్‌తో తలపడింది. ముంబైలోని వాంఖడె స్టేడియంలో జరిగిన ఈ మ్యాచ్‌లో చెన్నై ఘన విజయం సాధించింది. ఆ తర్వాత వరుస విజయాలను నమోదు చేసింది.

ఫైనల్లో హైదరాబాద్‌పై విజయం

ఇక, ఫైనల్లో సన్‌రైజర్స్‌ హైదరాబాద్‌పై 8 వికెట్ల తేడాతో విజయం సాధించి ముచ్చటగా మూడోసారి ట్రోఫీని కైవసం చేసుకుంది. వాంఖడె స్టేడియంలో జరిగిన ఐపీఎల్ ఫైనల్లో చెన్నై సూపర్ కింగ్స్ మొత్తం 10 సిక్స్‌లు నమోదు చేసింది. ఇక, ఈ సీజన్‌లో చెన్నై జట్టు నమోదు చేసిన మొత్తం సిక్సుల సంఖ్య 145.

ఒక సీజన్‌లో అత్యధిక సిక్సులు

గతంలో ఏ జట్టు ఒక సీజన్‌లో ఇన్ని సిక్స్‌లు బాదలేదు. 2016లో కోహ్లీ నాయకత్వంలోని రాయల్‌ ఛాలెంజర్స్‌ బెంగళూరు 142 సిక్స్‌లు బాదడమే ఇప్పటివరకు అత్యధికం. ఆ సీజన్‌లో ఆర్‌సీబీ కెప్టెన్ విరాట్ కోహ్లీ మొత్తం 38 సిక్సులు బాదాడు. ఇప్పుడు ఈ రికార్డుని చెన్నై సూపర్ కింగ్స్ బద్దలు కొట్టింది.

145 సిక్సులు నమోదు చేసిన చెన్నై సూపర్ కింగ్స్

ఐపీఎల్ 11వ సీజన్‌లో చెన్నై సూపర్ కింగ్స్ జట్టు 145 సిక్స్‌లు నమోదు చేసింది. ఈ సీజన్‌లో అత్యధిక సిక్సుల బాదిన ఆటగాడిగా చెన్నై సూపర్ కింగ్స్ ఆటగాడు షేన్ వాట్సన్(35 సిక్సులు) ఉన్నాడు. ఇక, అత్యధిక సిక్స్‌లు బాదిన జట్లలో కోల్‌కతా నైట్‌రైడర్స్‌ (130), కింగ్స్‌ ఎలెవన్‌ పంజాబ్‌(127), ముంబై ఇండియన్స్‌(120) ఆ తర్వాతి స్థానాల్లో ఉన్నాయి.