క్వాలిఫయిర్-2: పరుగు తీసిన పొలార్డ్, పుట్‌బాల్ ఆడిన రోహిత్

హైదరాబాద్: ఐపీఎల్‌లో సిసలైన సవాల్‌కు మాజీ చాంపియన్లు సిద్ధమయ్యాయి. బెంగళూరులోని చిన్నస్వామి స్టేడియంలో శుక్రవారం జరిగే క్వాలిఫయర్‌-2 మ్యాచ్‌లో ముంబై ఇండియన్స్, కోల్‌కతా నైట్‌రైడర్స్ జట్లు అమీతుమీ తేల్చుకోనున్నాయి.

ఈ రెండు జట్లలో గెలిచిన జట్టు ఉప్పల్‌ స్టేడియంలో జరిగే ఫైనల్ మ్యాచ్‌లో పూణెతో తలపడనుంది. ఈ మ్యాచ్‌లో ఓటమి పాలైన జట్టు ఇంటికిదారి పడుతుంది. దాంతో, చావోరేవో పోరులో ఎలాగైనా గెలిచి టైటిల్‌ పోరుకు వెళ్లాలని ఇరు జట్లూ యత్నిస్తున్నాయి.

ఇదే వేదికపై గత మ్యాచ్‌లో హైదరాబాద్‌ను ఓడించిన కోల్‌కతా ఆత్మవిశ్వాసంలో ఉండగా.. తొలి క్వాలిఫయర్‌లో పుణె చేతిలో చిత్తయిన ముంబై కాస్త డీలా పడింది. కాగా, లీగ్‌ దశలో రెండు మ్యాచ్‌లతో పాటు ఐపీఎల్‌లో కోల్‌కతాతో ఆడిన 20 మ్యాచ్‌ల్లో 15 విజయాలతో ముంబైకి ఘనమైన రికార్డు ఉంది.

దాంతో, నైట్‌రైడర్స్‌పై తమ ఆధిపత్యాన్ని చాటుకోవాలని రోహిత్ సేన కోరుకుంటోంది. ఈ సారి ఆ రికార్డును బద్దలుకొట్టి ప్రతీకారం తీర్చుకోవాలని గంభీర్‌సేన భావిస్తోంది. అయితే, గత వారం రోజులుగా బెంగళూరులో కురుస్తున్న వర్షం ఇరు జట్లనూ ఆందోళనకు గురి చేస్తున్నాడు.

వర్షం కారణంగా ఎలిమినేటర్‌కు మూడు గంటలకు పైగా అంతరాయం కలిగింది. శుక్రవారం కూడా వర్షం కురిసే అవకాశాలు ఉన్నాయి. మరోవైపు గురువారం ముంబై ఇండియన్స్ ఆటగాళ్లు ప్రాక్టీస్ సెషన్‌లో పాల్గొన్నారు.