ఐపీఎల్ 2017 వేలం: విదేశీయులకు కోట్లు, స్వదేశీయులకు లక్షలు

హైదరాబాద్: బెంగళూరులో ఇండియన్ ప్రిమియర్ లీగ్ (ఐపీఎల్) వేలం ముగిసింది. ఐపీఎల్ టీ20 ఫార్మెట్ కావడంతో టీ20లో స్పెషలిస్ట్‌లుగా ముద్ర పడిన ఆటగాళ్లు వేలంగా మంచి ధర పలికారు. అయితే వేలం ప్రక్రియ ఎప్పుడెప్పుడూ అని ఎదురు చూసిన దేశీయ యువ క్రికెటర్లకు మాత్రం నిరాశే ఎదురైంది.

ముఖ్యంగా దేశవాళీ టోర్నీల్లో ఆకట్టుకున్న యువ ఆటగాళ్లకు ప్రాంఛైజీలు వేలంలో మొండిచెయ్యి చూపించాయి. టీమిండియాలో ఆడిన అనుభవం ఉన్న ఇషాంత్ శర్మ, ఇర్ఫాన్ పఠాన్ లాంటి ఆటగాళ్లను సైతం ప్రాంఛైజీలు కొనుగోలు చేయకపోడవం విశేషం. నిజానికి దేశవాళీ క్రికెటర్లలో ఉన్న ప్రతిభను వెలికితీసే ఉద్దేశంతో 2008లో ఈ లీగ్‌ను ప్రారంభించారు.

ఐపీఎల్‌లో విదేశీ ఆటగాళ్లతో ఆడటం వల్ల దేశీయ ఆటగాళ్లు తమ నైపుణ్యాన్ని వృద్ధి చేసుకోవడంతో పాటు డ్రెస్సింగ్‌ రూమ్‌లో వారి అనుభవాన్ని పంచుకోవడం, గేమ్‌ప్లాన్‌లను నేర్చుకునేందుకు వీలుండేది. ఐపీఎల్ ప్రారంభమైన తొలినాళ్లలో లీగ్‌లో ఆడే విదేశీ ఆటగాళ్ల సంఖ్య తక్కువగా ఉండేది.

అయితే రాను రాను ఈ సంఖ్య మరింతగా పెరుగతూ వచ్చింది. తాజాగా ఐపీఎల్ రూల్స్ ప్రకారం ఒక్కో జట్టులో 9 మంది విదేశీ ఆటగాళ్లను కలిగి ఉండొచ్చు. జట్టులోని మొత్తం ఆటగాళ్ల సంఖ్య 27. ఇక తుది జట్టులో నలుగురికి మించి విదేశీ ఆటగాళ్లను ఆడించడానికి కూడా అవకాశం లేదు.

అయితే తాజాగా సోమవారం జరిగిన వేలంలో టీ20 స్పెషలిస్ట్ క్రికెటర్లకు ప్రాంఛైజీలు కోట్లు కుమ్మరించి దేశీయ ఆటగాళ్లకు మాత్రం మొండిచెయ్యి చూపించారు. ఇంగ్లాండ్ క్రికెటర్ బెన్ స్టోక్స్ ఈ సీజన్‌లో ఇప్పటివరకు అత్యధిక ధర పలికాడు. అతడిని పూణె రైజింగ్ జెయింట్స్ రూ. 14.5కోట్లకు దక్కించుకుంది.

అతడి తర్వాత ఇంగ్లాండ్‌కు చెందిన తైమాల్ మిల్స్‌ను రూ. 12 కోట్లు పెట్టి రాయల్ ఛాలెంజర్స్ బెంగుళూరు ప్రాంఛైజీ కొనుగోలు చేసింది. వీరిద్దరు కూడా విదేశీ క్రికెటర్లు కావడం విశేషం. మొత్తం 351 మంది ఆటగాళ్లు వేలంలో ఉండగా సోమవారం ఎనిమిది ఫ్రాంచైజీలు కలిపి 66 మంది ఆటగాళ్లను కొనుగోలు చేశాయి. వీరిలో 27 మంది విదేశీ ఆటగాళ్లు ఉన్నారు.