మిల్లర్‌తో సరదాగా రీల్.. ఇన్‌ఫ్లుయెన్సర్‌కు అత్యాచార బెదిరింపులు!

ప్రస్తుత కాలంలో సోషల్ మీడియా ఇన్‌ఫ్లుయెన్సర్లు సెలబ్రిటీలతో కలిసి వీడియోలు చేయడం, అభిమానులను అలరించడం సర్వసాధారణం. అయితే, ఒక్కోసారి నెటిజన్ల అతివాదం ఏ స్థాయికి చేరుతుందో చెప్పడానికి ప్రిన్సీ పారిఖ్ అనే ఇన్‌ఫ్లుయెన్సర్ ఎదుర్కొన్న అనుభవమే నిదర్శనం. టీ20 ప్రపంచకప్ 2026 ఉత్సాహంలో భాగంగా ఆమె చేసిన ఒక సరదా వీడియో.. చివరకు ఆమెను మానసిక క్షోభకు గురిచేసి, చట్టపరమైన పోరాటం చేసేలా పురికొల్పింది.

మ్యాచ్ ఓటమి సెగ.. ఇన్‌ఫ్లుయెన్సర్‌‌పై పగ
అసలు విషయం ఏమిటంటే.. గత ఆదివారం అహ్మదాబాద్‌లో జరిగిన టీ20 ప్రపంచకప్ సూపర్-8 మ్యాచ్‌లో దక్షిణాఫ్రికా 76 పరుగుల తేడాతో భారత్‌ను చిత్తు చేసింది. ఈ ఓటమి భారత అభిమానులను తీవ్ర నిరాశకు గురిచేసింది. అదే సమయంలో, దక్షిణాఫ్రికా స్టార్ బ్యాటర్ డేవిడ్ మిల్లర్‌తో కలిసి ప్రిన్సీ పారిఖ్ ఒక రీల్ పోస్ట్ చేసింది. అందులో భారత్‌ను ఓడించినందుకు మిల్లర్‌ను ఆటపట్టిస్తూ ఆమె వేసిన చప్పట్లు.. చేసిన అల్లరి కొందరు నెటిజన్లకు ఆగ్రహం తెప్పించాయి. క్రీడను క్రీడలా చూడకుండా, ఆమె చేసిన వీడియోను దేశభక్తికి ముడిపెడుతూ దారుణమైన వేధింపులకు తెరలేపారు.

అత్యాచార బెదిరింపులు, బాడీ షేమింగ్
ఆ వీడియో వైరల్ అయిన కొద్దిసేపటికే ప్రిన్సీ ఇన్-బాక్స్ అసభ్యకరమైన మెసేజ్‌లతో నిండిపోయింది. కొందరు నెటిజన్లు ఆమెను శరీర ఆకృతిని బట్టి విమర్శించడమే కాకుండా (బాడీ షేమింగ్), ఏకంగా అత్యాచార బెదిరింపులకు పాల్పడ్డారు. ఈ సైబర్ దాడితో భీతిల్లిన ప్రిన్సీ.. వెంటనే ఆ వీడియోను తొలగించింది. "నేను ఆ వీడియోను భరించలేక డిలీట్ చేశాను. వందలాది అసభ్యకర కామెంట్లు, భయంకరమైన బెదిరింపుల మధ్య అసలు ఈ ప్రపంచం నుండి మాయమైపోవాలనిపిస్తోంది" అంటూ ఆమె తన ఆవేదనను ఇన్‌స్టాగ్రామ్ వేదికగా పంచుకుంది.

సైబర్ వేటగాళ్లపై యుద్ధం
అయితే ప్రిన్సీ కేవలం భయపడి వెనక్కి తగ్గకుండా.. వేధించిన వారిని చట్టం ముందు నిలబెట్టాలని నిర్ణయించుకుంది. తనను వేధించిన ప్రతి ఒక్కరి యూజర్ నేమ్స్, వారు పంపిన మెసేజ్‌లను స్క్రీన్ షాట్స్ తీసి బహిర్గతం చేస్తానని హెచ్చరించింది. వారిపై పోలీసులకు ఫిర్యాదు చేయడమే కాకుండా, వారు పనిచేసే సంస్థల దృష్టికి కూడా ఈ విషయాన్ని తీసుకెళ్తానని స్పష్టం చేసింది. సమాజంలో ఇలాంటి నేరపూరిత బుద్ధి ఉన్న వ్యక్తుల ముసుగు తొలగించడమే తన లక్ష్యమని ప్రిన్సీ పారిఖ్ ధీమాగా పేర్కొంది.

గండంలో టీమిండియా సెమీస్ ఆశలు
మరోవైపు, మైదానంలో టీమిండియా పరిస్థితి కూడా ఆందోళనకరంగా మారింది. దక్షిణాఫ్రికా చేతిలో భారీ తేడాతో ఓడిపోవడంతో నెట్ రన్ రేట్ (-3.8) దారుణంగా పడిపోయింది. ప్రస్తుతం గ్రూప్ 1లో వెస్టిండీస్, దక్షిణాఫ్రికా పటిష్టమైన స్థానాల్లో ఉన్నాయి. సెమీఫైనల్ రేసులో నిలవాలంటే భారత్ తన మిగిలిన మ్యాచ్‌లలో తప్పక గెలవడమే కాకుండా.. ఇతర జట్ల ఓటమి కోసం ప్రార్థించాల్సిన స్థితి ఏర్పడింది. గురువారం చెన్నైలో జింబాబ్వేతో జరగనున్న మ్యాచ్ భారత్‌కు అగ్నిపరీక్షగా మారింది.