Virat Kohli: కోహ్లీ అద్భుత శతకం.. తెగ మెచ్చుకున్న సచిన్ టెండూల్కర్!

టీమిండియా స్టార్ బ్యాటర్ విరాట్ కోహ్లీ అరుదైన ఘనత సాధించాడు. ప్రపంచ క్రికెట్‌లో తన 500వ అంతర్జాతీయ మ్యాచ్‌లో సెంచరీ చేసిన ఏకైక బ్యాటర్‌గా నిలిచాడు. అంతర్జాతీయ క్రికెట్‌లో 500 మ్యాచులు ఆడటమే అరుదు అనుకుంటే.. ఈ మ్యాచ్‌లో సెంచరీ చేయడం ఇంకా అరుదైన ఘనత అని చెప్పాలి. ఎందుకంటే ఇప్పటి వరకు 500 పైచిలుకు మ్యాచులు ఆడిన ఎవరూ ఈ ఘనత సాధించలేదు.

వెస్టిండీస్‌తో జరుగుతున్న రెండో టెస్టు రెండో రోజున కోహ్లీ ఈ మార్కు అందుకున్నాడు. ఈ మ్యాచ్ తొలిరోజు అద్భుతమైన ఆటతీరుతో ఆకట్టుకున్న కోహ్లీ.. రెండోరోజూ అదే జోరు కొనసాగించాడు. ఈ క్రమంలోనే 180 బంతుల్లో సెంచరీ పూర్తి చేసుకున్నాడు. మొత్తానికి 206 బంతుల్లో 121 పరుగులు చేసిన తర్వాత రనౌట్‌గా వెనుతిరిగాడు. ఇది కోహ్లీకి 76వ అంతర్జాతీయ సెంచరీ. టెస్టుల్లో 29వది.

ఈ క్రమంలోనే క్రికెట్ దేవుడు సచిన్ టెండూల్కర్ కన్నా తక్కువ ఇన్నింగ్సుల్లో 76 సెంచరీలు చేసిన బ్యాటర్‌గా కోహ్లీ నిలిచాడు. ఈ నేపథ్యంలో ప్రపంచం నలుమూలల నుంచి అభిమానులు కోహ్లీకి శుభాకాంక్షలు తెలుపుతున్నారు. సచిన్ కూడా ఈ మైలురాయిపై స్పందించాడు. ఇన్‌స్టాలో కోహ్లీ స్టోరీ షేర్ చేసిన సచిన్.. 'మరో రోజు మరో సెంచరీ చేసిన కోహ్లీ. అద్భుతంగా ఆడావు' అని మెచ్చుకున్నాడు.

ఈ సెంచరీ చేయడం ద్వారా వెస్టిండీస్‌పై వెయ్యి పరుగులను కూడా కోహ్లీ పూర్తి చేసుకున్నాడు. ఇలా కోహ్లీ వెయ్యికిపైగా పరుగులు చేసిన ఐదో దేశం వెస్టిండీస్. ఇంతకుముందు ఆస్ట్రేలియా, ఇంగ్లండ్, సౌతాఫ్రికా, శ్రీలంకపై కోహ్లీ ఈ ఘనత సాధించాడు. అంతేకాదు, అంతర్జాతీయ క్రికెట్‌లో అత్యధిక పరుగులు చేసిన బ్యాటర్‌గా సౌతాఫ్రికా లెజెండ్ జాక్వెస్ కలిస్‌ను కూడా కోహ్లీ ఈ ఇన్నింగ్స్‌తో అధిగమించాడు. అలాగే ఇప్పటి వరకు 2023లో భారత్ తరఫున అత్యధిక పరుగులు చేసిన బ్యాటర్‌గా నిలిచాడు.