మొహాలి టెస్టులో భారత్ ఘనవిజయం

మొహాలి: రెండో టెస్టు మ్యాచులో భారత్ ఆస్ట్రేలియాపై 320 పరుగుల తేడాతో ఘన విజయం సాధించింది. దీంతో నాలుగు టెస్టుల సిరీస్ లో భారత్ 1-0 స్కోరుతో ఆధిక్యత సాధించింది. తొలి టెస్టు మ్యాచ్ డ్రా కాగా మరో రెండు టెస్టు మ్యాచులు జరగాల్సి ఉంది. ఆస్ట్రేలియా భారత్ నిర్దేశించిన 516 పరుగుల లక్ష్యాన్ని ఛేదించే క్రమంలో రెండో ఇన్నింగ్సులో 195 పరుగులకే కుప్పకూలింది. రెండో ఇన్నింగ్సులో హర్భజన్, జహీర్ ఖాన్ బౌలింగుకు ఆస్ట్రేలియా బ్యాట్స్ మెన్ చేతులెత్తేశారు. తొలి ఇన్నింగ్సులో ఆస్ట్రేలియా 268 పరుగులు చేసింది. భారత్ తొలి ఇన్నింగ్సులో 469 పరుగులు చేయగా రెండో ఇన్నింగ్సును మూడు వికెట్లు కోల్పోయి 314 పరుగుల వద్ద డిక్లేర్ చేసింది. రెండో ఇన్నింగ్సులో జహీర్ ఖాన్, హర్భజన్ మూడేసి వికెట్లు తీసుకోగా, ఇషాంత్ శర్మ, అమిత్ మిశ్రా రెండేసి వికెట్లు తీసుకున్నారు. ఆస్ట్రేలియా బ్యాట్స్ మెన్ లో మంగళవారం ఐదో రోజు క్లార్క్ ఒంటరి పోరు చేశాడు. జాన్సన్ కూడా భారత బౌలర్లను ఎదుర్కునే ప్రయత్నం చేశాడు. అతను 26 పరుగులు చేశాడు. మహేంద్ర సింగ్ ధోనీ మ్యాన్ ఆఫ్ ద మ్యాచుగా ఎన్నికయ్యాడు. రెండో ఇన్నింగ్సులో ఆస్ట్రేలియా సోమవారం నాలుగో రోజు ఆట ముగిసే సమయానికి ఐదు వికెట్లు కోల్పోయి 141 పరుగులు చేసింది. మంగళవారం కొద్దిసేపటికే ఆస్ట్రేలియా మిగతా వికెట్లను కోల్పోయి ఓటమి పాలైంది.

ఆస్ట్రేలియా రెండో ఇన్నింగ్సులో ఒకానొక సందర్భంలో 58 పరుగులకే ఐదు వికెట్లను కోల్పోయి ఆస్ట్రేలియా పీకల లోతు కష్టాల్లో పడింది. భారత్ లక్ష్యాన్ని ఛేదించడంలో 375 పరుగులు వెనకబడి పోయింది. ఆట ముగిసే సమయానికి క్లార్క్ 42 పరుగులతోనూ, హాడిన్ 37 పరుగులతోనూ క్రీజులో ఉన్నారు. ఆస్ట్రేలియా రెండో ఇన్నింగ్సులో 46 ఓవర్లు ఆడింది.ఆస్ట్రేలియా ఓపెనర్లు మాథ్యూ హేడెన్, కాటిచ్ ఇన్నింగ్సును ధాటిగానే ప్రారంభించారు. చకచకా పరుగులు చేసి భారత్ ను భయపెట్టే ప్రయత్నం చేశారు. 20 బంతుల్లో 29 పరుగులు చేసిన హెడెన్ హర్భజన్ బౌలింగులో ఎల్బీడబ్ల్యుగా పెవిలియన్ కు దారి పట్టాడు. కాటిచ్ 26 బంతుల్లో 20 పరుగులు చేసి హర్భజన్ బౌలింగులోనే టెండూల్కర్ కు క్యాచ్ ఇచ్చి అవుటయ్యాడు. ఆ తర్వాత వచ్చిన బ్యాట్సమెన్ నిలదొక్కుకోలేకపోయారు. పాంటింగ్ రెండు పరుగులు మాత్రమే చేసి ఇషాంత్ శర్మ బౌలింగులో అవుటయ్యాడు. వాట్సన్ కూడా 22 బంతులు ఆడి రెండు పరుగులు మాత్రమే చేసి ఇషాంత్ శర్మ చేతిలో అవుటయ్యాడు. హస్సీ ఒక పరుగు మాత్రమే చేసి హర్భజన్ బౌలింగులో ఎల్బీడబ్ల్యుగా వెనుదిరిగాడు. హర్భజన్ మూడు వికెట్లు తీసుకోగా, ఇషాంత్ రెండు వికెట్లు తీసుకున్నాడు.