జింబాబ్వేతో మ్యాచ్ కూడా అగ్నిపరీక్షేనా? ఓడిపోతే తట్టా బుట్టా సర్దేయడమే!

IND vs ZIM: దాదాపు మూడు వారాల పరాజయాల పరంపర అనంతరం టీమిండియా నేడు హరారేలో జింబాబ్వే జట్టుతో తలపడనుంది. ఓ కొత్త ఆరంభం కోసం ఆశిస్తోంది. ఐర్లాండ్, ఇంగ్లాండ్ పర్యటనలలో 6 టీ20 మ్యాచ్‌లలో ఓడిపోయిన ఈ యువ భారత జట్టు ఇప్పుడు కేవలం సిరీస్ గెలవడమే కాకుండా కోల్పోయిన ఆత్మవిశ్వాసాన్ని తిరిగి పొందాలనే సవాలును ఎదుర్కొంటోంది. గురువారం (జులై 23) అంటే నేడు ప్రారంభమయ్యే 3 మ్యాచ్‌ల టీ20 సిరీస్‌లో కెప్టెన్ శ్రేయస్ అయ్యర్ , 15 ఏళ్ల వైభవ్ సూర్యవంశీ ప్రధాన ఆకర్షణగా నిలవనున్నారు . ఈ మ్యాచ్ భారత కాలమానం ప్రకారం సాయంత్రం 4:30 గంటలకు ప్రారంభం కానుంది. ఈ మ్యాచ్ శ్రేయస్ అయ్యర్‌కు కీలకం. కెప్టెన్‌గా బాధ్యతలు స్వీకరించినప్పటి నుంచి భారత జట్టు తొలి ఏడు టీ20 అంతర్జాతీయ మ్యాచ్‌లలో ఆరుసార్లు ఓడిపోయింది. అందువల్ల జింబాబ్వేపై విజయం శ్రేయస్ అయ్యర్‌కు చాలా కీలకం.

కామన్వెల్త్ గేమ్స్‌లో భారత్ పతకాలపై అంచనాలొద్దు: గోపిచంద్

గణాంకాల ప్రకారం ఈ సిరీస్ లో భారత జట్టు బలంగా కనిపిస్తోంది. కానీ ప్రస్తుత ఫామ్ సమీకరణాన్ని మార్చేసింది. జింబాబ్వే వంటి జట్టు ముందు యువ భారత జట్టు తడబడితే డ్రెస్సింగ్ రూమ్ వాతావరణం, జట్టు యాజమాన్యంపై తలెత్తే ప్రశ్నలు మరింత తీవ్రం కానున్నాయి. ఈ కారణంగా హెడ్ కోచ్ గౌతమ్ గంభీర్ స్థానంలో వీవీఎస్ లక్ష్మణ్‌ను ఈ పర్యటనకు జట్టుతో పాటు పంపారు. లక్ష్మణ్ స్వభావం గంభీర్ స్వభావానికి పూర్తిగా భిన్నంగా ఉంటుందని భావిస్తారు. అనవసరమైన ప్రయోగాలు చేయడం కంటే ఆటగాళ్లకు స్పష్టమైన పాత్రలు ఇవ్వాలని ఆయన నమ్ముతారు. వరుస ఓటముల తర్వాత తిరిగి విజయాల బాట పట్టడమే జట్టు యాజమాన్యానికి ప్రధాన ప్రాధాన్యతగా ఉంటుంది.

వైభవ్-అభిషేక్‌ల ఓపెనింగ్‌పై అందరి దృష్టి
ఈ సిరీస్‌లో మరోసారి అతిపెద్ద ఆకర్షణ వైభవ్ సూర్యవంశీనే కానున్నాడు . సంజు శాంసన్ జట్టుకు దూరమవడంతో అభిషేక్ శర్మతో కలిసి వైభవ్ ఇన్నింగ్స్ ప్రారంభించే అవకాశం ఉంది. హరారే స్పోర్ట్స్ క్లబ్ ఈ ఇద్దరు ఆటగాళ్లకు ఓ చిరస్మరణీయమైన మైదానంగా నిలిచింది. అభిషేక్ శర్మ ఇక్కడే తన టీ20 అంతర్జాతీయ అరంగేట్రం చేసి, ఆ తర్వాతి మ్యాచ్‌లోనే తన తొలి సెంచరీని సాధించాడు. వైభవ్ సూర్యవంశీ కూడా అండర్-19 ప్రపంచ కప్ ఫైనల్‌లో ఇంగ్లాండ్‌పై సెంచరీ సాధించి ప్రపంచ దృష్టిని ఆకర్షించాడు.

హరారే పిచ్‌పై పేసర్లదే రాజ్యం
హరారే స్పోర్ట్స్ క్లబ్ పిచ్ ఆరంభంలో తేమతో పాటు అదనపు బౌన్స్‌ను అందిస్తుందని అంచనా. జింబాబ్వేకు చెందిన బ్లెస్సింగ్ ముజరబాని, రిచర్డ్ నగరవ భారత బ్యాటర్లకు గట్టి సవాలు విసరగలరు. కొత్త బంతితో భారత్ జాగ్రత్తగా బ్యాటింగ్ చేయడం కీలకం.

నాకు అచ్చొచ్చిన మైదానం.. నా సత్తా చూపిస్తా: వైభవ్ సూర్యవంశీ

తలనొప్పిగా మారిన మిడిలార్డర్
భారత జట్టుకు మిడిలార్డర్ లో రాణించడం అనేది పెద్ద తలనొప్పిగా మారింది. టీ20లలో వైస్ కెప్టెన్ తిలక్ వర్మ మూడో స్థానంలో మరింత ప్రభావవంతంగా రాణించినప్పటికీ.. ఆ స్థానంలో ఇషాన్ కిషన్‌ను ప్రయత్నిస్తున్నారు. ఫలితంగా ఐదో స్థానంలో తిలక్ పూర్తిగా సౌకర్యవంతంగా కనిపించడం లేదు. ఈ పాత్రకు రింకూ సింగ్‌ను మంచి ఎంపికగా భావిస్తున్నప్పటికీ, వైస్ కెప్టెన్‌ను పక్కన పెట్టడం జట్టు యాజమాన్యానికి అంత సులభమైన నిర్ణయం కాదు. అందుకే బ్యాటింగ్ ఆర్డర్ మరోసారి చర్చనీయాంశం కానుంది.

ఆల్‌రౌండర్ల విషయంలో కఠిన నిర్ణయం తీసుకోవాల్సిందే..
హర్ష్ దుబే, శివమ్ దూబే, సూర్యాంశ్ షెడ్గే వంటి ఆల్ రౌండర్ల విషయంలో కాస్త జాగ్రత్తగా ఆలోచించాల్సి వస్తోంది. వీరిలో ఎవరిని ఆడించాలనేది వీవీఎస్ లక్ష్మణ్, జట్టు యాజమాన్యానికి అతిపెద్ద సవాలుగా ఉంటుంది. శివమ్ దూబేకు పెద్ద మ్యాచ్‌ల అనుభవం ఉంది, కానీ సీమ్, స్వింగ్ బౌలింగ్‌ను ఎదుర్కోవడంలో దూబే బలహీనత ఇటీవల స్పష్టమైంది. మరోవైపు, సూర్యాంశ్ షెడ్గే బ్యాటింగ్‌లో ఉపయోగపడతాడు కానీ బౌలింగ్‌లో ఆశించిన స్థాయిలో ప్రభావం చూపలేకపోయాడు. హర్ష్ దూబే బౌలింగ్‌లో కొన్ని అవకాశాలు కల్పిస్తున్నాడు కానీ బ్యాటింగ్‌లో నిలకడ కోసం ఎదురుచూస్తున్నాడు. గౌతమ్ గంభీర్ తరచుగా ఎక్కువ మంది ఆల్‌రౌండర్లను బరిలోకి దించడానికి మొగ్గుచూపుతుండగా.. లక్ష్మణ్ విధానం భిన్నంగా పరిగణించబడుతుంది. ఆయన బ్యాటింగ్ డెప్త్‌కు, ఆటగాళ్లకు స్పష్టమైన పాత్రలకు ఎక్కువ ప్రాధాన్యత ఇస్తాడు. జట్టు యాజమాన్యం ఎలాంటి సమతుల్యతను పాటిస్తుందో చూడటం ఆసక్తికరంగా ఉంటుంది.

యువ పేస్ బౌలింగ్ దళానికి అసలైన పరీక్ష
భవిష్యత్తు కోసం ఫాస్ట్ బౌలింగ్ దళాన్ని అభివృద్ధి చేయడం ఈ సిరీస్ ముఖ్య లక్ష్యం. మయాంక్ యాదవ్ వేగంపై దృష్టి కేంద్రీకరించనుండగా.. ప్రిన్స్ యాదవ్, అశోక్ శర్మ, యశ్ ఠాకూర్ వంటి యువ బౌలర్లకు తమను తాము నిరూపించుకోవడానికి ఇది ఓ సువర్ణావకాశం.అయితే వరుస ఓటముల తర్వాత, ఇప్పుడు ప్రయోగాలు చేయడం కన్నా గెలవడమే ముఖ్యం. అందువల్ల ప్రతి క్రీడాకారుడిపై రాణించాలనే ఒత్తిడి ఉంటుంది.

భారత జట్టు: శ్రేయస్ అయ్యర్ (కెప్టెన్), వైభవ్ సూర్యవంశీ, అభిషేక్ శర్మ, ఇషాన్ కిషన్, తిలక్ వర్మ, శివమ్ దూబే, హర్ష్ దూబే, సూర్యాంశ్ షెడ్గే, యశ్ ఠాకూర్, ప్రిన్స్ యాదవ్, మయాంక్ యాదవ్, అశోక్ శర్మ, రవి బిష్ణోయ్, ప్రభ్‌సిమ్రన్ సింగ్, ప్రభ్‌సిమ్రన్ సింగ్