నెట్ ప్రాక్టీస్: అవకాశం కోసం ఎదురు చూస్తున్న రహానే (ఫోటోలు)

హైదరాబాద్: మూడు టెస్టు మ్యాచుల సిరీస్‌లో భాగంగా భారత్‌, శ్రీలంక జట్ల మధ్య ఆగస్టు 3 (గురువారం)న రెండో టెస్టు ప్రారంభం కానుంది. గాలే వేదికగా జరిగిన తొలి టెస్టులో కోహ్లీసేన 304 పరుగుల తేడాతో ఘన విజయం సాధించి సిరిస్‌లో 1-0తో ముందంజలో ఉంది.

రెండో టెస్టు కోసం కోహ్లీసేన సోమవారం కొలంబో చేరుకుంది. మంగళవారం ఉదయమే ప్రాక్టీస్‌ సెషన్‌లో పాల్గొంది. రెండో టెస్టులో కూడా విజయం సాధించి సిరిస్‌ను కైవసం చేసుకోవాలని రవిశాస్త్రి నేతృత్వంలో కోహ్లీసేన సింహలీస్ స్పోర్ట్స్ క్లబ్‌లో మంగళవారం ప్రాక్టీస్ సెషన్‌లో పాల్గొంది.

ప్రాక్టీస్ సెషన్‌లో భాగంగా ధావన్, అభినవ్ ముకుంద్‌లు బ్యాటింగ్ ప్రాక్టీస్ చేశారు. ఈ ప్రాక్టీస్ సెషన్‌లో కెప్టెన్ కోహ్లీతో పాటు జట్టులోని మిగతా ఆటగాళ్లు కూడా పాల్గొన్నారు. టీమిండియా ఆటగాళ్లు ప్రాక్టీస్‌లో పాల్గొన్న ఫొటోలను బీసీసీఐ ట్విట్టర్ ఖాతా ద్వారా అభిమానులతో పంచుకుంది.

మరోవైపు శ్రీలంక ఆటగాళ్లు కూడా కొలంబో టెస్టుని కాస్తంత సీరియస్‌గానే తీసుకున్నారు. అయితే లంక జట్టును గాయాల బెడద బాధిస్తోంది. దీంతో కొలంబో టెస్టుకి లంక జట్టులో కీలక మార్పులు చేసే అవకాశం ఉంది. అనారోగ్యంతో తొలి టెస్టుకు దూరమైన కెప్టెన్ చండీమాల్‌ రెండో టెస్టుకు అందుబాటులో వచ్చాడు.