రాంచీ టెస్ట్: నెట్స్‌లో భారత్‌ ప్రాక్టీస్‌.. కోహ్లీ, రోహిత్ దూరం!!

కుల్దీప్‌కు మళ్లీ నిరాశ తప్పదు?:

మూడో టెస్టు కోసం చైనామన్ స్పిన్నర్ కుల్దీప్ యాదవ్ చెమటోడ్చుతున్నాడు. వైజాగ్, పుణె టెస్టుల్లో చోటు దక్కించుకోలేకపోయిన కుల్దీప్.. రాంచీలో బ్యాటింగ్ కూడా ప్రాక్టీస్ చేశాడు. కుల్దీప్ ప్రాక్టీస్‌లో చెమటోడ్చుతున్నా.. తుది జట్టులో చోటు దక్కడం కష్టంగానే ఉంది. సీనియర్ స్పిన్నర్లు రవిచంద్రన్ అశ్విన్, రవీంద్ర జడేజాలు అద్భుత ఫామ్‌లో ఉన్నారు. అశ్విన్ వికెట్ల వేటలో ఉండగా.. జడేజా వికెట్లతో పాటు వేగంగా పరుగులు కూడా చేస్తున్నాడు. ఇద్దరిలో ఒకరిని కోహ్లీ పక్కన బెట్టే సాహసం చేయలేడు. కాబట్టి కుల్దీప్‌కు మళ్లీ నిరాశ తప్పదు.

ప్రాక్టీస్‌ సెషన్‌లో డుప్లెసిస్:

శుక్రవారం జరిగే ప్రాక్టీస్‌లో జట్టు భారత ఆటగాళ్లంతా పాల్గొంటారు. భారత హెడ్ కోచ్ రవిశాస్త్రి, బౌలింగ్ కోచ్ భరత్ అరుణ్ పిచ్‌ను పరిశీలించారు. పొడిగా ఉన్న వికెట్ స్పిన్నర్లకు అనుకూలించే అవకాశాలు ఉన్నాయి. ఈ వికెట్‌పై స్పిన్నర్లు ప్రభావం చూపగలరు. ఇక పొడిగా ఉన్న పిచ్ నుంచి రివర్స్ స్వింగ్ కూడా లభించొచ్చు. అంతకు ముందు దక్షిణాఫ్రికా ఆటగాళ్లు కూడా ప్రాక్టీస్‌ సెషన్‌లో పాల్గొన్నారు. డుప్లెసిస్, బవుమా, డిబ్రుయన్, డికాక్, ముత్తుస్వామి ప్రాక్టీస్‌లో పాల్గొన్నారు.

స్పిన్, రివర్స్‌స్వింగ్ కీలక పాత్ర:

ఈ మ్యాచ్‌లో స్పిన్, రివర్స్‌స్వింగ్ కీలక పాత్ర పోషిస్తాయని దక్షిణాఫ్రికా కెప్టెన్ డుప్లెసిస్ గురువారం పేర్కొన్నాడు. కెప్టెన్‌తో పాటు రబాడ కూడా రివర్స్‌స్వింగ్ కీలక పాత్ర పోషిస్తుందని అన్నాడు. రెండు టెస్టుల్లో ఘోరంగా విఫలమైన ఓపెనర్‌ ఎయిడెన్‌ మార్క్‌రమ్‌ చేతికి గాయం కారణంగా మూడో టెస్టుకు దూరమయ్యాడు. పుణే టెస్టు రెండు ఇన్నింగ్స్‌లలోనూ డకౌట్‌ అయిన మార్క్‌రమ్‌.. మ్యాచ్‌ తర్వాత ఆ అసహనాన్ని ఒక వస్తువుపై చూపించాడు. దాంతో అతని చేతికి తీవ్ర గాయమైంది.