1993లో వార్న్, 2019లో కుల్దీప్: 'బాల్ ఆఫ్ సెంచరీ'ని గుర్తు చేశాడు

1993లో షేన్ వార్న్

ఈ బంతి గురించి క్రికెట్ అభిమానులు, పండితులు, విశ్లేషకులు ఇప్పటికీ గుర్తు చేసుకొంటూనే ఉంటారు. 1993లో ఇంగ్లాండ్‌తో జరిగిన టెస్టులో వార్న్ లేగ్ బ్రేక్ పిచ్ మీద పడిన వెంటనే అనూహ్యంగా 14 డిగ్రీల మేర బొంగరంలా గింగరాలు తిరిగి మరీ గాటింగ్ ఆఫ్ స్టంప్ బెయిల్‌ను గిరాటేసింది. క్రికెట్ చరిత్రలోనే వార్న్ సంధించిన ఆ బంతి అసాధారణ బంతిగా నిలిచిపోయింది.

2019లో కుల్దీప్ యాదవ్

వార్న్ బాల్ ఆఫ్ ది సెంచరీ ఘటనను కుల్దీప్ యాదవ్ ఈ ప్రపంచకప్‌లో గుర్తు చేశాడు. వార్న్ రికార్డు సృష్టించిన ఓల్డ్ ట్రాఫర్డ్ స్టేడియంలోనే గత ఆదివారం పాకిస్థాన్‌తో జరిగిన మ్యాచ్‌లో భారత చైనామన్ స్పిన్నర్ కుల్దీప్ యాదవ్ మాయ చేశాడు. 24వ ఓవర్లో అద్భుతమైన బంతితో బాబర్ అజామ్‌ను బౌల్డ్‌ చేసి మ్యాచ్‌‌నే మలుపు తిప్పాడు.

ఆ బంతి గురించి ఎంత చెప్పినా తక్కువే

ఈ బంతి గురించి ఎంత చెప్పినా తక్కువే. ఆఫ్‌స్టంప్‌ మీదుగా పడిన బంతి అనూహ్యంగా టర్న్‌ తీసుకొని లోపలికి దూసుకొచ్చింది. బయటి వైపు ఆడేందుకు ప్రయత్నించిన బాబర్‌ పూర్తిగా అంచనా తప్పా డు. దీంతో బ్యాట్, ప్యాడ్‌ మధ్య నుంచి దూసుకుపోయిన బంతి బెయిల్స్‌ను ఎగరగొట్టింది. అజామ్‌ తన కళ్లను తానే నమ్మలేకపోయాడు.

5.80 డిగ్రీల కోణంలో మెలికలు తిరిగి

గంటకు 72 కిలోమీటర్ల వేగంతో కుల్దీప్ సంధించిన ఈ బంతి 5.80 డిగ్రీల కోణంలో మెలికలు తిరిగి మరీ వికెట్‌ను గిరాటేసింది. ఈ బంతిపై టీమిండియా కెప్టెన్ విరాట్ కోహ్లీ సైతం ప్రశంసల వర్షం కురిపించాడు. బాబర్ అజామ్‌ను కుల్దీప్ యాదవ్ ఔట్ చేసిన బంతి అత్యుద్భుతమని విరాట్ కోహ్లీ కొనియాడాడు.