టీ20 ప్రపంచ కప్ ఫైనల్ పోరులో భారత్ vs పాక్?

T20 World Cup 2026: టీ20 ప్రపంచ కప్ 2026 సూపర్-8 దశ రసవత్తరంగా సాగుతోంది. క్రికెట్ ప్రపంచంలో అత్యంత క్రేజ్ ఉన్న భారత్-పాకిస్థాన్ జట్ల మధ్య మరో హై-వోల్టేజ్ పోరును చూసేందుకు అభిమానులు ఆతృతగా ఎదురుచూస్తున్నారు. గ్రూప్ దశలో ఇప్పటికే భారత్ చేతిలో పాక్ ఓడిపోయినప్పటికీ.. టోర్నీ చివరలో అంటే మార్చి 8న జరిగే గ్రాండ్ ఫైనల్లో ఈ దాయాది దేశాలు మళ్లీ తలపడే అవకాశం ఉందన్న వార్త ఇప్పుడు నెట్టింట వైరల్ అవుతోంది. సూపర్-8లో ఇరు జట్లు వేర్వేరు గ్రూపుల్లో ఉన్నప్పటికీ.. ఫైనల్ చేరడానికి ఉన్న సమీకరణాల గురించి తెలుసుకుందాం.

ఫైనల్ పోరు సాధ్యమయ్యే సమీకరణాలు
ఐసీసీ నిబంధనల ప్రకారం.. సూపర్-8లో రెండు గ్రూపుల నుంచి టాప్-2లో నిలిచిన జట్లు సెమీఫైనల్ చేరుతాయి. గ్రూప్-1 టాపర్ గ్రూప్-2 రన్నరప్‌తో.. గ్రూప్-2 టాపర్ గ్రూప్-1 రన్నరప్‌తో సెమీఫైనల్‌లో తలపడతారు. ఒకవేళ భారత్, పాకిస్థాన్ జట్లు ఫైనల్‌లో తలపడాలంటే.. అవి సెమీఫైనల్‌లో ఒకదానితో ఒకటి తలపడకూడదు. అంటే గ్రూప్-1లో భారత్ మొదటి స్థానంలో నిలిస్తే.. గ్రూప్-2లో పాకిస్థాన్ కూడా మొదటి స్థానంలోనే నిలవాలి. లేదా రెండు జట్లు తమ తమ గ్రూపుల్లో రెండో స్థానంలో నిలవాలి. ఇలా జరిగితే సెమీస్‌లో వేర్వేరు జట్లతో పోటీపడి, గెలిస్తే ఫైనల్‌లో ముఖాముఖి తలపడవచ్చు.

సెమీఫైనల్ చేరడం ఇరు జట్లకు సవాలే!
అయితే ఫైనల్ వరకు వెళ్లడం ప్రస్తుతం రెండు జట్లకు అంత సులభం కాదు. సూపర్-8లో భారత్ ఆడిన మొదటి మ్యాచ్‌లోనే దక్షిణాఫ్రికా చేతిలో 76 పరుగుల భారీ ఓటమిని మూటగట్టుకుంది. దీనివల్ల టీమిండియా నెట్ రన్ రేట్ భారీగా దెబ్బతింది. సెమీస్ రేసులో నిలవాలంటే జింబాబ్వే, వెస్టిండీస్‌లపై భారీ తేడాతో గెలవాల్సిన పరిస్థితి ఏర్పడింది. మరోవైపు పాకిస్థాన్ మొదటి మ్యాచ్ వర్షం వల్ల రద్దు కావడంతో పాయింట్ల పంపకం జరిగింది. ఇప్పుడు పాక్ సెమీస్ చేరాలంటే ఇంగ్లాండ్, శ్రీలంక వంటి పటిష్టమైన జట్లపై ఖచ్చితంగా గెలవాల్సి ఉంది.

వేదికల మార్పు, ఐసీసీ నిబంధనలు
ఒకవేళ భారత్-పాకిస్థాన్ జట్లు సెమీఫైనల్ లేదా ఫైనల్‌లో తలపడాల్సి వస్తే.. వేదికల విషయంలో ఐసీసీ కీలక మార్పులు చేసే అవకాశం ఉంది. భద్రతా కారణాల దృష్ట్యా పాకిస్థాన్ జట్టు భారత్‌లో ఆడేందుకు అనుమతి లేదు కాబట్టి, ఆ మ్యాచ్‌లను ముంబై లేదా కోల్‌కతా నుండి శ్రీలంకలోని కొలంబోకు మారుస్తారు. మార్చి 4, 5 తేదీల్లో సెమీఫైనల్స్, మార్చి 8న ఫైనల్ జరగనుంది. ఒకవేళ ఈ రెండు జట్లు ఫైనల్ చేరితే, 2007 నాటి ఉత్కంఠభరితమైన టీ20 వరల్డ్ కప్ ఫైనల్ మ్యాజిక్ మళ్లీ పునరావృతమయ్యే అవకాశం ఉంది.