ఆక్లాండ్: ఐదు టీ20ల సిరీస్లో భాగంగా ఆక్లాండ్లోని ఈడెన్ పార్క్లో మరికొద్దిసేపట్లో న్యూజిలాండ్, భారత్ జట్ల మధ్య తొలి టీ20 మ్యాచ్ ప్రారంభం కానుంది. ఈ మ్యాచ్లో టాస్ గెలిచిన టీమిండియా కెప్టెన్ విరాట్ కోహ్లీ బౌలింగ్ ఎంచుకున్నాడు. తొలి టీ20 మ్యాచ్లో కీపర్గా లోకేష్ రాహుల్ కొనసాగుతున్నాడు. దీంతో స్పెషలిస్టు కీపర్లు సంజూ శాంసన్, రిషభ్ పంత్లకు తుది జట్టులో చోటు దక్కలేదు. భారత్ ఈ మ్యాచ్ కోసం ఆరుగురు బౌలర్లతో బరిలోకి దిగుతోంది. మరోవైపు కివీస్ జట్టులో కుగ్లిన్ ఆడట్లేదు.
'కివీస్ను భారత్ చిత్తుగా ఓడిస్తుంది.. మ్యాచ్ కోసం ఎంతో ఆసక్తిగా ఎదురుచూస్తున్నా'
ఈడెన్ పార్క్ మైదానం బ్యాటింగ్కు అనుకూలం. చిన్న బౌండరీలు కావడంతో పరుగుల వరద ఖాయం. ఇటీవల కివీస్-ఇంగ్లండ్ సిరీస్లో కూడా భారీగా పరుగులు నమోదయ్యాయి. గత ఏడాది కివీస్ పర్యటనలో భారత్ వన్డే సిరీస్ను 4-1తేడాతో కైవసం చేసుకోగా.. టీ20 సిరీస్ను 1-2తో కోల్పోయిన విషయం తెలిసిందే. ఇప్పటి వరకు కివీస్తో భారత్ 11 టీ20ల్లో తలపడగా.. కేవలం మూడు మ్యాచుల్లోనే విజయం సాధించింది. ఇరు జట్ల మధ్య చివరిసారిగా 2019, ఫిబ్రవరిలో హామిల్టన్ వేదికగా జరిగిన టీ20 మ్యాచ్లో టీమిండియా 4 పరుగుల తేడాతో ఓడిపోయింది.
Captain @imVkohli wins the toss and elects to bowl first in the 1st T20I against New Zealand. pic.twitter.com/6NEIvq83w0
— BCCI (@BCCI) January 24, 2020
ఈ ఏడాదే మెగా టోర్నీ టీ20 ప్రపంచకప్ ఉండటంతో న్యూజిలాండ్-భారత్ జట్లు ఈ సిరీస్ను ఎంతో ప్రతిష్ఠాత్మకంగా తీసుకున్నాయి. మరోవైపు ప్రపంచకప్నకు ముందు ప్రయోగాలు చేసేందుకు ఈ సిరీస్ను వేదికగా చేసుకున్నాయి. అదే విధంగా జట్టులో మేలు మార్పులు కూడా చేసాయి. సొంతగడ్డపై బలమైన జట్టుగా ముద్రపడ్డ న్యూజిలాండ్.. ఇటీవల ఆస్ట్రేలియాతో టెస్టు సిరీస్లో వైట్వాష్కు గురైంది. మూడు మ్యాచ్ల సిరీస్ను 0-3తో కోల్పోయి ఆత్మవిశ్వాసం లోపించినట్లు కనిపిస్తోంది. ఈ ఓటమితో కివీస్ కెప్టెన్ కేన్ విలియమ్సన్ నాయకత్వంపై కూడా విమర్శలు వచ్చాయి. మరోవైపు విరాట్ కోహ్లీ మాత్రం విజయాలపై నమ్మకంగా ఉన్నాడు.
తుది జట్లు:
భారత్: రోహిత్ శర్మ, కేఎల్ రాహుల్, విరాట్ కోహ్లీ (కెప్టెన్), శ్రేయస్ అయ్యర్, మనీష్ పాండే, రవీంద్ర జడేజా, శివం దూబే, మొహమ్మద్ షమీ, జస్ప్రీత్ బుమ్రా, శార్దూల్ శార్దూల్, యుజువేంద్ర చహల్.
న్యూజిలాండ్: కేన్ విలియమ్సన్ (కెప్టెన్), మార్టిన్ గప్టిల్, కొలిన్ మున్రో, సీఫెర్ట్, రాస్ టేలర్, కొలిన్ గ్రాండ్హోమ్, మిచెల్ సాన్ట్నర్, ఇష్ సోధి, టీమ్ సౌతీ, బెన్నెట్, బ్లెయిర్ టిక్నెర్.