పింక్ బాల్ టెస్ట్, డే 1: తొలి రోజు విశేషాలు, సాధించిన రికార్డులు

బంగ్లాదేశ్‌ ఆలౌట్‌

* 30.3 - ఈ మ్యాచ్‌లో బంగ్లాదేశ్‌ ఆలౌట్‌ అయిన ఓవర్లు. భారత జట్టు తొలి ఇన్నింగ్స్‌లో తమ ప్రత్యర్ధి జట్టుని ఇన్ని తక్కువ ఓవర్లలో ఎప్పుడూ ఆలౌట్‌ చేయలేదు. అంతకముందు జింబాబ్వేను 44.2 ఓవర్లలో ఆలౌట్‌ చేసింది.

* 106 ఆలౌట్ - భారత్‌పై బంగ్లాదేశ్‌కు ఇది రెండో అత్యల్ప స్కోరు. 2000లో జరిగిన తొలి టెస్టులో ఆ జట్టు 91 పరుగులకే ఆలౌటైంది.

ఇషాంత్ శర్మ అరుదైన ఘనత

* 5/22 - ఈ మ్యాచ్‌లో టీమిండియా పేసర్ ఇషాంత్ శర్మ చేసిన ప్రదర్శన. భారత్‌ తరుఫున రెండో అత్యుత్తమ ప్రదర్శన. ఈ ఏడాదే వెస్టిండీస్‌పై బుమ్రా (5/7) అత్యుత్తమ గణాంకాలు నమోదు చేశాడు.

* 4 - పింక్ టెస్ట్ తొలి ఇన్నింగ్స్‌లో బంగ్లా కోల్పోయిన పది వికెట్లూ భారత పేసర్లే తీశారు. స్వదేశంలో భారత పేసర్లు ఈ ఘనత సాధించడమిది నాలుగోసారి మాత్రమే. ఇంతకుముందు 1981లో ఇంగ్లాండ్‌పై, 1983లో వెస్టిండీస్‌పై, 2017లో శ్రీలంకపై పదికి పది వికెట్లూ పేసర్లే పడగొట్టారు.

కోహ్లీ 5000 పరుగులు

* 5000 - టెస్టు కెప్టెన్‌గా 5 వేల పరుగుల (86 ఇన్నింగ్స్‌ల్లో) మైలురాయిని అందుకున్న భారత కెప్టెన్ కోహ్లీ.. అత్యంత వేగంగా ఈ ఘనత సాధించిన కెప్టెన్‌గా రికార్డుల్లోకెక్కాడు. ఆస్ట్రేలియా మాజీ క్రికెట్ దిగ్గజం రకీ పాంటింగ్ 97 ఇన్నింగ్స్‌ల్లో ఈ మార్క్‌ను చేరుకుంటే అంతకంటే 11 ఇన్నింగ్స్‌ల ముందే కోహ్లీ 5000 పరుగులు చేశాడు.

100 ఔట్లు చేసిన సాహా

* 100 ఔట్లు - ఈ మ్యాచ్‌లో షాద్‌మన్ క్యాచ్ అందుకోవడం ద్వారా వికెట్ కీపర్ వృద్ధిమాన్ సాహా టెస్టు క్రికెట్‌లో 100 ఔట్లలో భాగస్వామి అయ్యాడు. ఈ ఫీట్ సాధించిన ఐదో భారత కీపర్‌గా రికార్డుల్లోకెక్కాడు. ఇందులో 89 క్యాచ్‌లు, 11 స్టంపింగ్‌లు ఉన్నాయి.

తొలిసారి ఇద్దరు కాంకషన్‌లు

* 2 - షమీ బౌన్సర్లతో రెచ్చిపోవడంతో పింక్ బాల్ టెస్ట్‌లో బంగ్లా ఇద్దరు ఆటగాళ్లను కాంకషన్ సబ్‌స్టిట్యూట్‌గా బరిలో దించింది. లిటన్ దాస్, నయీమ్ గాయపడటంతో వారి స్థానాల్లో మెహదీ, తైజుల్ లను బంగ్లా మైదానంలో దింపింది.