పెర్త్‌లో రెండో టెస్టు: తన స్పిన్‌తో భారత్‌కు బ్రేక్ ఇచ్చిన అంధ్ర కుర్రాడు

బుమ్రాతో పాటు మెరిసిన హనుమ విహారి

తొలి రోజు ఆటలో భారత బౌలర్లలో బుమ్రాతో పాటు ఆంధ్ర కుర్రాడు హనుమ విహారి తన స్పిన్ మ్యాజిక్‌తో అందరినీ ఆశ్చర్యపరచాడు. తన కెరీర్‌లో రెండో టెస్ట్ ఆడుతున్న హనుమ విహారి భారత జట్టులో ప్రధాన స్పిన్నర్ లేని లోటుని తీర్చాడు. కీలక సమయంలో ముఖ్యమైన వికెట్లను తీసి ప్రత్యర్ధి జట్టు బ్యాట్స్‌మెన్‌ను తక్కువ స్కోరుకే కట్టడి చేశాడు.

రెండు కీలక వికెట్లు తీసిన విహారి

తొలిరోజు భారత బౌలర్లలో ఇషాంత్ శర్మ(2/35), స్పిన్నర్ హనుమ విహారి (2/53) చెరో రెండు వికెట్లు తీయగా.... బుమ్రా(1/41), యాదవ్(1/68) చెరో వికెట్ తీసుకున్నారు. క్రీజులో పాతుకుపోయిన భారత పేసర్లకు కొరకరాని కొయ్యగా మారిన ఆసీస్ ఓపెనర్ మార్కస్ హ్యారిస్‌ను బోల్తా కొట్టించిన తీరు నిజంగా అద్భుతం.

అద్భుతమన క్యాచ్‌ పట్టిన రహానే

ఈ మ్యాచ్ ప్రారంభం నుంచి క్రీజులో పాతుకుని భారీ స్కోరు దిశగా సాగుతున్న ఓపెనర్ మార్కస్ హ్యారిస్‌(70)ను హనుమ విహారి పెవిలియన్‌కు పంపాడు. ఇన్నింగ్స్ 49 ఓవర్లో హనుమ విహారి వేసిన రెండో బంతిని అమాంతం గాల్లోకి లేపడంతో అక్కడే ఉన్న రహానే దానిని చక్కటి క్యాచ్‌గా అందుకున్నాడు.

గాయపడిన రోహిత్ శర్మ స్థానంలో తుది జట్టులోకి

అడిలైడ్ టెస్టులో రోహిత్ శర్మ గాయపడటంతో.. అతని స్థానంలో హనుమ విహారి జట్టులోకి వచ్చిన విషయం తెలిసిందే. పెర్త్ పిచ్ ఎక్కువగా పేస్, బౌన్స్‌కి అనుకూలిస్తుండటంతో.. నలుగురు ఫాస్ట్ బౌలర్లతో బరిలోకి దిగాలనుకున్న టీమిండియా.. ఒక స్పిన్ ఆల్‌రౌండర్‌‌ని కూడా టీమ్‌లో చేర్చాలనుకుంది.

కీలక సమయంలో భారత్‌కు మరో బ్రేక్

ఈ క్రమంలో సీనియర్ ఆల్‌రౌండర్ రవీంద్ర జడేజా నుంచి పోటీ ఏర్పడినా.. హనుమ విహారీపై నమ్మకంతో కోహ్లీ తుది జట్టులో చోటిచ్చాడు. అయితే, కోహ్లీ నమ్మకాన్ని వమ్ము చేయకుండా తొలిరోజు రెండు వికెట్లు తీసి అందరినీ ఆశ్చర్యపరిచాడు. ఆ తర్వాత ట్రావిస్‌ హెడ్‌‌తో కలిసి ఇన్నింగ్స్‌ను చక్కదిద్దేయత్నం చేసిన షాన్ మార్ష్(45)ను కీలక సమయంలో ఔట్ చేసి భారత్‌కు మరో బ్రేక్ ఇచ్చాడు.