టీమిండియాపై పైచేయి సాధించాలంటే.. భారీ స్కోర్లు తప్పక చేయాలి!! లేదంటే: స్మిత్

భారీ స్కోర్లు సాధించాలి

మ్యాచ్‌ అనంతరం తన ప్రదర్శనపై స్టీవ్ స్మిత్ మాట్లాడాడు. 'ఎదుర్కొన్న తొలి బంతి నుంచే మంచి టచ్‌లో ఉన్నట్లు అనిపించింది. మా ఓపెనర్లు ఆరోన్ ఫించ్‌, డేవిడ్ వార్నర్‌ ఇచ్చిన ఘనమైన ఆరంభం వల్లే నేను, గ్లెన్ మ్యాక్స్‌వెల్‌ గొప్పగా ఆడాం. పరిస్థితులకు తగ్గట్లుగా ఆడటమే మా ముందు ఉన్న పని. భారత్‌కు వ్యతిరేకంగా ఆడినప్పుడు మాత్రం కచ్చితంగా భారీ స్కోర్లు సాధించాలి. అలా చేస్తేనే మ్యాచ్‌లో పైచేయి సాధించగలం. అదృష్టవశాత్తు గత రెండు మ్యాచ్‌ల్లోనూ మేం ఇలానే చేశాం' అని స్మిత్ తెలిపాడు.

రికార్డుల గురించి పట్టించుకోవట్లేదు

ఆస్ట్రేలియా తరఫున వరుసగా రెండు సెంచరీలు సాధించిన స్టీవ్ స్మిత్‌.. ఐపీఎల్ 2020‌లో ఆశించిన స్థాయిలో రాణించని సంగతి తెలిసిందే. ఈ విషయంపై మాట్లాడుతూ... 'ఐపీఎల్ 2020‌లో భారీ షాట్లు ఆడటానికి ప్రయత్నించా. ఇప్పుడు మరింత ఫిట్‌నెస్‌ సాధించి ఆడుతున్నా. ఇది ప్రయోజనకరంగా ఉంది. కేవలం క్రికెటింగ్‌ షాట్లే ఆడుతున్నా. రికార్డుల గురించి పట్టించుకోవట్లేదు. జట్టు కోసం పరుగులు చేయడం సంతోషంగా ఉంది. మా జట్టు ఆటగాళ్లందరూ గొప్పగా ఆడుతున్నారు' అని స్మిత్ చెప్పుకొచ్చాడు. టీమిండియాపై స్మిత్ గత ఐదు ఇన్నింగ్స్‌లో 69, 98, 131, 105, 104 పరుగులు చేశాడు.

అత్యంత వేగంగా సెంచరీ

62 బంతుల్లో సెంచరీ చేసిన స్టీవ్ స్మిత్‌ ఓ అరుదైన రికార్డును ఖాతాలో వేసుకున్నాడు. ఆసీస్ తరపున వన్డేల్లో అత్యంత వేగంగా సెంచరీ బాదిన మూడో బ్యాట్స్‌మన్‌గా రికార్డుల్లోకి ఎక్కాడు. ఈ జాబితాలో 51 బంతుల్లోనే శతకం బాదిన గ్లెన్ మాక్స్‌వెల్‌ అగ్ర స్థానంలో ఉన్నాడు. జేమ్స్ ఫాల్కనర్ (57) రెండో స్థానంలో కొనసాగుతున్నాడు. స్మిత్ మూడు (62), నాలుగు (62) స్థానాల్లో ఉన్నాడు. మాథ్యూ హేడెన్ 66 బంతుల్లోనే సెంచరీ చేసి ఐదవ స్థానంలో ఉన్నాడు.

టీమిండియాపైనే 5 శతకాలు

ఓవరాల్‌గా వన్డేల్లో స్టీవ్ స్మిత్‌ ఇప్పటివరకు 11 సెంచరీలు చేయగా.. అందులో టీమిండియాపైనే 5 సాధించాడు. భారత్‌పై 5 కంటే ఎక్కువ సెంచరీలు సాధించిన ఆసీస్‌ ఆటగాళ్లలో రికీ పాంటింగ్‌ తర్వాతి స్థానంలో నిలిచాడు. పాంటింగ్‌ టీమిండియాపై ఆరు సెంచరీలు సాధించి మొదటి స్థానంలో ఉన్నాడు. అయితే పాంటింగ్‌ 6 సెంచరీలు సాధించడానికి 59 మ్యాచ్‌లు తీసుకోగా.. స్మిత్‌ 20 మ్యాచ్‌ల్లోనే ఈ రికార్డును సాధించడం విశేషం.