Border-Gavaskar Series: భారత్-ఆస్ట్రేలియా 5 టెస్టుల షెడ్యూల్ ఇదే

క్రికెట్ అభిమానులు ఎంతో ఆసక్తిగా ఎదురుచూస్తున్న భారత్ వర్సెస్ ఆస్ట్రేలియా బోర్డర్-గవాస్కర్ సిరీస్ షెడ్యూల్ రిలీజ్ అయ్యింది. అయితే ఈ సారి ఆస్ట్రేలియా పర్యటనలో భారత్ అయిదు టెస్టులు ఆడనుంది. నవంబర్‌లో ప్రారంభం కానున్న ఈ సుదీర్ఘ సిరీస్‌లో ఓ డే/నైట్ టెస్టు కూడా ఉంది.

నవంబర్ 22 నుంచి జనవరి 7 వరకు టీమిండియా, ఆసీస్ అయిదు టెస్టులు ఆడనున్నాయి. పెర్త్ వేదికగా నవంబర్ 22న తొలి మ్యాచ్ జరగనుంది. ఈ మైదానంలో ఆడిన నాలుగింట్లో ఆస్ట్రేలియాదే విజయం. తొలి మ్యాచ్ 2018లో భారత్‌తోనే ఆసీస్ ఆడింది. ఇక డిసెంబర్ 6 నుంచి జరగనున్న పింక్ బాల్‌ టెస్టుకు అడిలైడ్ ఆతిథ్యం ఇవ్వనుంది.

గత పర్యటనలో అడిలైడ్ వేదికగానే భారత్-ఆసీస్ డే/నైట్ టెస్టు ఆడాయి. 2020-21 పర్యటనలో భాగంగా జరిగిన ఈ మ్యాచ్‌లో టీమిండియా చెత్త రికార్డు నమోదు చేసింది. 36 పరుగులకే ఆలౌటైంది. ఈసారి అదే వేదికగా పింక్ బాల్ టెస్టు జరగనుంది. ఆస్ట్రేలియా కంచుకోట అయిన గబ్బాలో భారత్ మూడో టెస్టు ఆడనుంది. ఈ మ్యాచ్ డిసెంబర్ 14 నుంచి ప్రారంభం కానుంది.

మెల్‌బోర్న్ వేదికగా బాక్సింగ్‌డే టెస్టు జరగనుంది. డిసెంబర్ 26 నుంచి ఈ టెస్టు మొదలవుతుంది. ఇక ఆఖరి టెస్టుకు సిడ్నీ ఆతిథ్యం ఇవ్వనుంది. జనవరి 3 నుంచి ఈ మ్యాచ్ ప్రారంభమవుతుంది. టీమిండియాతో సిరీస్‌కు ముందు ఆస్ట్రేలియా పాకిస్థాన్‌తో మూడు వన్డేలు, మూడు టీ20లు ఆడనుంది. నవంబర్ 2 నుంచి 18వరకు పాక్‌తో తలపడనుంది.

ఆస్ట్రేలియా vs భారత్ షెడ్యూల్
తొలి టెస్టు: నవంబర్ 22-26 (పెర్త్)
2వ టెస్టుణ : డిసెంబర్ 6-10 (అడిలైడ్) (D/N)
3వ టెస్టు: డిసెంబర్ 14-18 (గబ్బా, బ్రిస్బేన్)
4వ టెస్టు: డిసెంబర్ 26-30 (మెల్ బోర్న్)
5వ టెస్టు: జనవరి 3-7 (సిడ్నీ)