ట్వంటీ20 ప్రపంచ కప్: ఇండియా ఔట్?

బార్బడోస్‌: కెప్టెన్‌ క్రిస్‌గేల్‌ (98; 66 బంతుల్లో 5X4, 7X6) చెలరేగడంతో ఆదివారం జరిగిన మ్యాచ్‌లో ఆతిథ్య వెస్టిండీస్‌ 14 పరుగుల తేడాతో భారత్‌పై గెలిచింది. 170 పరుగుల లక్ష్యంతో బరిలోకి దిగిన భారత్‌ బ్యాట్స్‌మెన్‌ ఘోర వైఫల్యంతో 9 వికెట్లకు 155 పరుగులే చేయగలిగింది. 32 పరుగులే చేసిన రైనానే టాప్‌ స్కోరర్‌. విజయ్‌ (7), గంభీర్‌ (15), రోహిత్‌ (5), యువరాజ్‌ (12), యూసుఫ్‌ పఠాన్‌ (17)ల వైఫల్యం భారత్‌ను దెబ్బతీసింది. ఇన్నింగ్స్‌లో ఒక్క విలువైన భాగస్వామ్యమూ నమోదు కాలేదు. తొలుత విండీస్‌ 6 వికెట్లకు 169 పరుగులు చేసింది. ఇంగ్లాండ్‌లో జరిగిన గత ప్రపంచకప్‌లోనూ భారత్‌ సూపర్‌ దశలోనూ నిష్క్రమించిన సంగతి తెలిసిందే. సాంకేతికంగా భారత్‌కు ఇంకా ఈ ప్రపంచకప్‌లో సెమీఫైనల్‌ అవకాశాలున్నాయి. ఆసీస్‌, శ్రీలంక, విండీస్‌లపై గెలిచి, మనం లంకను చిత్తుగా ఓడించాలి. అప్పటికీ నెట్‌ రన్‌రేట్‌ మెరుగ్గా ఉంటేనే సెమీస్‌ అవకాశముంటుంది.

ఈ మ్యాచ్‌లోనూ భారత్‌ బ్యాట్స్‌మెన్‌ ప్రదర్శనలో ఎలాంటి మార్పులేదు. మళ్లీ అదే తడబాటు. షార్ట్‌ పిచ్‌ బంతుల పరీక్షకు నిలవలేక చేతులెత్తేశారు. తమ బలహీనతలను సొమ్ము చేసుకునే అవకాశాన్ని విండీస్‌ పేసర్లకు ఇచ్చారు. 170 పరుగుల లక్ష్య ఛేదనలో భారత్‌కు మెరుగైన ఆరంభం అవసరమైంది. కానీ ఓపెనర్లు మరోసారి తీవ్రంగా నిరాశపరిచారు. తొలి బంతి నుంచీ తడబడ్డ విజయ్‌ సామి వేసిన నాలుగో ఓవర్లో ఔటయ్యాక భారత్‌ వికెట్ల పతనానికి ఏ దశలో అడ్డుకట్ట పడలేదు. వెంటనే గంభీర్‌ కూడా వెనుదిరిగాడు. అంపైర్‌ తప్పుడు నిర్ణయానికి రోహిత్‌ బలయ్యాడు. అప్పటికి స్కోరు 38. రైనా మెరుపులు మెరిపించడంతో పరిస్థితి కాస్త మెరుగైంది. కానీ జట్టు స్కోరు 80 వద్ద రైనా, 81 వద్ద యువరాజ్‌ ఔట్‌కావడంతో పరిస్థితి మళ్లీ మొదటికొచ్చింది. 12.4 ఓవర్లలో 81/5. యూసుఫ్‌, హర్భజన్‌తో కలిసి ధోనీ(18 బంతుల్లో 29; 2X4, 2X6) జట్టును గట్టెక్కించే ప్రయత్నం చేశాడు. ఆశలు కల్పించాడు. కానీ చివరి 2 ఓవర్లలో 32 పరుగులు చేయాల్సిన దశలో రనౌటయ్యాడు. ఆ తర్వాత భారత్‌ ఓటమి లాంఛనమే! ఆల్‌రౌండర్‌గా జట్టులోకి వచ్చిన జడేజా మ్యాచ్‌లో కేవలం రెండు ఓవర్లు చేసి 27 పరుగులు ఇచ్చాడు.

వెస్టిండీస్‌ ఇన్నింగ్స్‌: గేల్‌ రనౌట్‌ 98; చందర్‌పాల్‌ (సి) ధోనీ (బి) నెహ్రా 23; సామి (సి) విజయ్‌ (బి) జడేజా 19; పొలార్డ్‌ (సి) యూసుఫ్‌ పఠాన్‌ (బి) జహీర్‌ 17; బ్రావో (సి) రోహిత్‌ (బి) నెహ్రా 1; శర్వాణ్‌ (సి) రోహిత్‌ (బి) నెహ్రా 0; హిండ్స్‌ నాటౌట్‌ 0; రామ్‌దిన్‌ నాటౌట్‌ 4; ఎక్స్‌ట్రాలు 7 మొత్తం: (20 ఓవర్లలో 6 వికెట్లకు)169

వికెట్ల పతనం: 1-80, 2-119, 3-160, 4-163, 5-164, 6-165

బౌలింగ్‌: హర్భజన్‌ 4-0-16-0; జహీర్‌ 4-0-36-1; నెహ్రా 4-0-35-3; యూసుఫ్‌ పఠాన్‌ 4-0-28-0; రైనా 2-0-23-0; జడేజా 2-0-27-1

భారత్‌ ఇన్నింగ్స్‌: మురళీ విజయ్‌ (సి) పొలార్డ్‌ (బి) సామీ 7; గంభీర్‌ (సి) రామ్‌దిన్‌ (బి) రోచ్‌ 15; రైనా (సి) సామీ (బి) గేల్‌ 32; రోహిత్‌ (సి) రామ్‌దిన్‌ (బి) పొలార్డ్‌ 5; యువరాజ్‌ (సి) చందర్‌పాల్‌ (బి) బెన్‌ 12; ధోనీ రనౌట్‌ 29; యూసుఫ్‌ పఠాన్‌ (సి) హిండ్స్‌ (బి) టేలర్‌ 17; హర్భజన్‌ (సి) బ్రావో (బి) రోచ్‌ 14; జడేజా నాటౌట్‌ 5; నెహ్రా (సి) బెన్‌ (బి) బ్రావో 0; జహీర్‌ నాటౌట్‌ 0; ఎక్స్‌ట్రాలు 19 మొత్తం: (20 ఓవర్లలో 9 వికెట్లకు) 155

వికెట్ల పతనం: 1-12, 2-27, 3-38, 4-80, 5-81, 6-114, 7-139, 8-150, 9-152

బౌలింగ్‌: సామీ 3-0-16-1; టేలర్‌ 4-0-24-1; రోచ్‌ 4-0-38-2; బ్రావో 4-0-28-1; పొలార్డ్‌ 2-0-23-1; గేల్‌ 2-0-22-1; బెన్‌ 1-0-2-1