మొహాలీ టెస్ట్‌లో ద్రావిడ్‌ సెంచరీ

న్యూఢిల్లీ: భారత క్రికెటర్‌ రాహుల్‌ ద్రవిడ్‌ మొహాలీ టెస్ట్‌లో తన సత్తా చూపాడు. ఈరోజు ఆటలో సెంచరీ సాధించాడు. 13 ఫోర్ల సాయంతో 105 పరుగులు చేశాడు. ద్రావిడ్‌కు ఇది 26వ సెంచరీ.ఒక వికెట్ నష్టానికి 179 పరుగుల ఓవర్‌నైట్ స్కోరుతో రెండో రోజు ప్రారంభించిన భారత్ దాటిగా ఆట ప్రారంభించింది. ఈ క్రమంలో ద్రవిడ్ టెస్ట్‌ల్లో 26 వ సెంచరీని పూర్తి చేశాడు. ఇటీవల మంచి ఫామ్‌లో ఉన్న గౌతమ్ గంభీర్ డబుల్ సెంచరీ దిశగా సాగుతున్నాడు. దీంతో భారత్‌ 250 మార్కును దాటింది. 94 ఓవర్లు ముగిసే సరికి గంభీర్ (136)పరుగులతో, ద్రవిడ్ (105) పరుగులతో క్రీజ్‌లో ఉన్నారు.

ఏడాది కాలంగా ద్రవిడ్‌ బ్యాటింగ్‌ పై రకరకాల విమర్శలు వస్తున్నాయి. సెలెక్టర్లపై, బోర్డు ఒత్తిడితో కెప్టెన్సీని వదులుకున్న ద్రవిడ్‌ అప్పుడే రిటైర్మెంట్‌ ఆలోచన కూడా చేశాడు. అప్పట్లో అది సాధ్యం కాలేదు. ఆ తర్వాత సీనియర్ల రిటైర్మెంట్‌లపై ఒత్తిడి పెరిగింది. ఈ క్రమంలో సీనియర్ ఆటగాళ్లు గంగూలీ, కుంబ్లే తప్పుకున్నారు. ఇది ద్రవిడ్‌పై మరింత ఒత్తిడి పెంచింది. వారు రిటైర్మెంట్‌ ప్రకటించినపుడే ద్రవిడ్‌ కూడా పక్కకు తప్పుకోవాలని చూసినా కుంబ్లే వారించాడు. ఈ స్థితిలో ద్రవిడ్‌కు భవిష్యత్తు అంధకారమైంది. ఇవన్నీ ఎలా ఉన్నా మొహాలీ టెస్ట్‌తో ఒత్తిడి నుండి బయటపడ్డ రాహుల్‌ సెంచరీ చేయటం అతని అభిమానలులో ఆనందాన్ని నింపుతోంది.