ఆసియా కప్‌లో భారత్ షెడ్యూల్ ఇదే! పాకిస్తాన్‌తో పోరు ఎప్పుడు?

యూఏఈ వేదికగా డిసెంబర్ 12, 2025(రేపటి) నుంచి అండర్-19 ఆసియా కప్ ప్రారంభం కానుంది. ఈసారి కూడా భారత్, పాకిస్తాన్ మధ్య మరో మహా సమరం జరగనుంది. ఈ టోర్నమెంట్‌లో టీమిండియా షెడ్యూల్ ఏమిటో, దాయాది దేశంతో ఎప్పుడు తలపడుతుందో తెలుసుకుందాం.

భారత్-పాకిస్తాన్ మ్యాచ్ ఎప్పుడు?
అండర్-19 ఆసియా కప్ 2025లో భారత్, పాకిస్తాన్ మధ్య హై-వోల్టేజ్ మ్యాచ్ డిసెంబర్ 14, ఆదివారం నాడు జరగనుంది. ఈ ప్రతిష్టాత్మక మ్యాచ్ ఐసీసీ అకాడమీ గ్రౌండ్‌లో నిర్వహించబడుతుంది. సీనియర్ మెన్స్ ఆసియా కప్‌లో భారత్ పాకిస్తాన్‌ను ఫైనల్‌తో సహా 3 సార్లు ఓడించింది. అయితే రైజింగ్ స్టార్స్ ఆసియా కప్‌లో మాత్రం పాకిస్తాన్ భారత్‌ను ఓడించింది. ఈ అండర్-19 ఆసియా కప్‌లో ఏ జట్టు పైచేయి సాధిస్తుందో కాలమే నిర్ణయిస్తుంది. అండర్-19 ఆసియా కప్‌లో భారత్‌కు ఆయుష్ మాత్రే కెప్టెన్‌గా వ్యవహరించనున్నారు. ఈ జట్టులో విధ్వంసకర బ్యాట్స్‌మెన్ వైభవ్ సూర్యవంశీ కూడా భాగమయ్యాడు.

టీమ్ ఇండియా పూర్తి షెడ్యూల్ (గ్రూప్ దశ)
భారత్ vs యూఏఈ -డిసెంబర్ 12(ఐసీసీ అకాడమీ గ్రౌండ్), ఉదయం 10:30 గంటలకు
భారత్ vs పాకిస్తాన్ -డిసెంబర్ 14(ఐసీసీ అకాడమీ గ్రౌండ్), ఉదయం 10:30 గంటలకు
భారత్ vs మలేషియా- డిసెంబర్ 16(ది సెవెన్స్ స్టేడియం), ఉదయం 10:30 గంటలకు

టోర్నమెంట్ ప్రారంభం గ్రూప్ దశతో అవుతుంది. చిరకాల ప్రత్యర్థులు భారత్, పాకిస్తాన్... మలేషియా, యూఏఈలతో కలిసి గ్రూప్ Aలో ఉన్నాయి. గ్రూప్ Bలో శ్రీలంక, బంగ్లాదేశ్, ఆఫ్ఘనిస్తాన్, నేపాల్ జట్లు ఉన్నాయి. ప్రతి జట్టు తమ గ్రూప్‌లోని అన్ని జట్లతో ఒక్కోసారి ఆడుతుంది. ఆ తర్వాత రెండు గ్రూప్‌ల నుండి టాప్ 2 జట్లు సెమీ-ఫైనల్‌కు అర్హత సాధిస్తాయి. ఈ టోర్నమెంట్ ఫైనల్ డిసెంబర్ 21న జరగనుంది.

అండర్-19 ఆసియా కప్ కోసం భారత జట్టు (స్క్వాడ్)
ఆయుష్ మాత్రే (కెప్టెన్), వైభవ్ సూర్యవంశీ, విహాన్ మల్హోత్రా, వేదాంత్ త్రివేది, అభిజ్ఞాన్ కుండూ (వికెట్ కీపర్), హర్వంశ్ సింగ్ (వికెట్ కీపర్), యువరాజ్ గోహిల్, కనిష్క్ చౌహాన్, ఖిలాన్ ఏ. పటేల్, నమన్ పుష్పక్, డి. దీపేష్, హేనిల్ పటేల్, కిషన్ కుమార్ సింగ్, ఉద్ధవ్ మోహన్, ఆరోన్ జార్జ్