మహిళా టీ20 ప్రపంచకప్‌.. చెత్త రికార్డు నెలకొల్పిన హర్మన్‌సేన!!

ప్రపంచకప్‌లో హర్మన్‌సేన చెత్త రికార్డు:

మహిళా టీ20 ప్రపంచకప్‌లో హర్మన్‌సేన ఓ చెత్త రికార్డును ఖాతాలో వేసుకుంది. మెగాటోర్నీలో అత్యధిక క్యాచులు జారవిడిచిన జట్టుగా బంగ్లాదేశ్‌తో సంయుక్తంగా అగ్రస్థానంలో నిలిచింది. టోర్నీ మొత్తంలో భారత మహిళలు 9 క్యాచ్‌లు నేలపాలు చేసారు. మరోవైపు బంగ్లాదేశ్‌ కూడా అన్నే క్యాచ్‌లు జారవిడిచింది. 'క్యాచులే మ్యాచులు గెలిపిస్తాయి' అన్న క్రికెట్‌ సూత్రాన్ని ఈ రెండు జట్లు మరిచిపోయినట్టున్నాయి.

అత్యల్పంగా వెస్టిండీస్‌ 3 మాత్రమే:

హర్మన్‌సేన టీ20 ప్రపంచకప్‌లో అత్యధిక క్యాచులు జారవిడిచి తగిన మూల్యమే చెల్లిచుకుంది. కీలకమైన ఫైనల్లో జారవిడిచిన రెండు క్యాచులే హర్మన్‌సేన కొంపముంచాయి. దాంతో ఏకంగా కప్పే దూరమయింది. ఇక విశ్వవిజేతగా నిలిచిన ఆస్ట్రేలియా 4 క్యాచులు మాత్రమే జారవిడిచింది. అత్యల్పంగా వెస్టిండీస్‌ 3 మాత్రమే వదిలేసింది. శ్రీలంక 8, పాకిస్థాన్‌ 6, ఇంగ్లాండ్‌ 6, దక్షిణాఫ్రికా 6, న్యూజిలాండ్‌ 5, థాయ్‌ల్యాండ్‌ 5 క్యాచులు జారవిడిచాయి.

షెఫాలీని నిందించలేం:

'అలీసా హీలీ ఇచ్చిన క్యాచ్‌ను షెఫాలీ వర్మ నేలపాలు చేసిందని ఆమెను నిందించలేం. 16 ఏళ్ల వయసులో తొలి ప్రపంచకప్ ఆడుతున్న షెఫాలీ జట్టు కోసం గొప్పగా పోరాడింది. ఈ వయసులో అంత సానుకూల దృక్పథంతో ఆడడం ఎంతో కష్టం' అని హర్మన్‌ప్రీత్‌ కౌర్ తెలిపారు. 9 పరుగుల వ్యక్తిగత స్కోరు వద్ద ఉన్నప్పుడు హీలీ ఇచ్చిన క్యాచ్‌ను షెఫాలీ జారవిడిచింది. ఆ తర్వాత ఆమె చెలరేగి 75 పరుగులు చేసింది.

99 పరుగులకే ఆలౌట్:

ఫైనల్లో టాస్‌ గెలిచి బ్యాటింగ్‌కు దిగిన ఆస్ట్రేలియా నిర్ణీత 20 ఓవర్లలో 4 వికెట్లకు 184 పరుగులు చేసింది. హేలీ, మూనీ చితకొట్టారు. భారత బౌలర్లలో పూనమ్‌ యాదవ్‌ (1/30) పెద్దగా ప్రభావం చూపలేకపోగా.. మరో స్పిన్నర్‌ దీప్తి శర్మ (2/38) ఫర్వాలేదనిపించింది. అనంతరం లక్ష్య ఛేనలో భారత్‌ 19.1 ఓవర్లలో 99 పరుగులకే ఆలౌటైంది. దీప్తి శర్మ (33; 2 ఫోర్లు) టాప్‌ స్కారర్‌. ఆసీస్‌ బౌలర్లలో మేఘన్ షుట్‌ (4/18), జెస్‌ జొనాసెన్‌ (3/20) రాణించారు.