IND vs SL: దంచికొట్టిన పడిక్కల్, జురేల్.. రెండో రోజు భారత్ కొండంత స్కోరు!

IND vs SL: శ్రీలంకతో జరుగుతున్న తొలి టెస్ట్ మ్యాచ్ లో భారత బ్యాటర్లు పట్టు బిగించారు. గాలే అంతర్జాతీయ స్టేడియం వేదికగా జరుగుతున్న ఈ మ్యాచ్‌లో వర్షం ఆటంకం కలిగించినప్పటికీ.. టీమిండియా తమ ఆధిపత్యాన్ని చాటుకుంది. రెండో రోజు ఆట ముగిసే సమయానికి భారత జట్టు తన తొలి ఇన్నింగ్స్‌లో 9 వికెట్ల నష్టానికి 460 పరుగుల భారీ స్కోరు సాధించింది. క్రీజులో కుల్దీప్ యాదవ్(12*), ప్రసిద్ధ్ కృష్ణ(1*) నాటౌట్‌గా ఉన్నారు. వాతావరణం అనుకూలించకపోవడంతో రెండో రోజు ఆటలో కేవలం 43 ఓవర్ల బౌలింగ్ మాత్రమే సాధ్యమైంది.

భారత్‌తో పోరుకు పాకిస్తాన్ రెడీ.. ఆసియా కప్ కోసం జట్టు ప్రకటన!

దంచికొట్టిన దేవదత్ పడిక్కల్
టాస్ గెలిచి బ్యాటింగ్ ఎంచుకున్న భారత్ కు ఓపెనర్లు యశస్వి జైస్వాల్(32), కేఎల్ రాహుల్(82) నిలకడైన శుభారంభాన్ని అందించారు. యశస్వి జైస్వాల్ రనౌట్ అయ్యాక క్రీజులోకి వచ్చిన దేవదత్ పడిక్కల్(167) అద్భుతమైన ఆటతీరుతో ఆకట్టుకున్నాడు. కేఎల్ రాహుల్ తో కలిసి రెండో వికెట్ కు భారీ భాగస్వామ్యాన్ని నెలకొల్పిన దేవదత్ పడిక్కల్.. తన టెస్ట్ కెరీర్లో తొలి సెంచరీని సాధించాడు. కేఎల్ రాహుల్ మధ్యలో కండరాల నొప్పితో రిటైర్డ్ హర్ట్‌గా వెనుదిరిగినప్పటికీ.. దేవదత్ పడిక్కల్ లంక బౌలర్లను సమర్థవంతంగా ఎదుర్కొంటూ 230 బంతుల్లో 15 ఫోర్లు, ఒక సిక్సర్‌తో 167 పరుగులు చేసి ప్రభాత్ జయసూర్య బౌలింగ్‌‌లో స్టంపౌట్ అయ్యాడు. కెప్టెన్ శుభ్‌మన్ గిల్(16) నిరాశపరిచాడు.

రెండో రోజు వర్షం కారణంగా మొదటి సెషన్ పూర్తిగా రద్దయింది. ఆట ప్రారంభమయ్యాక రిషబ్ పంత్(39) వేగంగా పరుగులు చేసే క్రమంలో అరంగేట్రం చేసిన కేసర నువంత బౌలింగ్‌లో వెనుదిరిగాడు. అనంతరం మళ్లీ బ్యాటింగ్ కు వచ్చిన కేఎల్ రాహుల్ కూడా నువంత బౌలింగ్లోనే క్యాచ్ ఇచ్చి ఔటయ్యాడు. కీలక సమయంలో బ్యాటింగ్ కు వచ్చిన ధ్రువ్ జురేల్(51) బాధ్యతాయుతమైన హాఫ్ సెంచరీతో జట్టు స్కోరను 400 దాటించడంలో కీలక పాత్ర పోషించాడు. మానవ్ సుతార్(24)తో కలిసి ఏడో వికెట్ కు 55 పరుగుల భాగస్వామ్యాన్ని నెలకొల్పాడు. శ్రీలంక బౌలర్లలో ప్రభాత్ జయసూర్య 4 వికెట్లు పడగొట్టగా.. అరంగేట్ర బౌలర్ కేసర నువంత 3 వికెట్లు తీశాడు.

Also Read

IND vs SL: దేవదత్ పడిక్కల్ శతకం.. తొలి రోజు భారత్‌దే ఆధిపత్యం!

టెస్ట్ క్రికెట్లో శ్రీలంకపై భారత్ కు అద్భుతమైన రికార్డు ఉంది. ఇప్పటివరకు ఇరుజట్ల మధ్య జరిగిన 46 టెస్ట్ మ్యాచ్‌ల్లో భారత్ 22 మ్యాచ్‌ల్లో విజయం సాధించగా.. శ్రీలంక కేవలం 7 మ్యాచ్ ల్లో మాత్రమే గెలిచింది. 17 మ్యాచ్‌లు డ్రాగా ముగిశాయి. గత 10 టెస్టుల్లో శ్రీలంక భారత్ పై ఒక్కటి కూడా గెలవకపోవడం టీమిండియా ఆధిపత్యానికి నిదర్శనం. చివరిసారిగా శ్రీలంక 2015లో ఇదే గాలే వేదికపై భారత్ పై టెస్ట్ విజయాన్ని నమోదు చేసింది. ప్రస్తుతం భారత్ భారీ స్కోరు సాధించడంతో ఈ మ్యాచ్ లోనూ పట్టు బిగించింది.