IND vs SA: ఓపెనింగే నాకు సరిపోతుంది.. ప్యాడ్లు కట్టుకొని నేరుగా వెళ్లి ఆడొచ్చు: రోహిత్

ఓపెనింగే నాకు సరిపోతుంది

తొలిరోజు ఆట అనంతరం రోహిత్ శర్మ మాట్లాడుతూ... 'ఓపెనింగే నా ఆటకు సరిపోతుందని నేను అనుకుంటున్నా. ప్యాడ్లు కట్టుకొని నేరుగా మైదానంలోకి వెళ్లి ఆడొచ్చు. అదే 5, 6 స్థానాల్లోనైతే ఆటకోసం ఎదురుచూడాలి. అయితే మిడిలార్డర్‌ నాకు సరిపోదని చెప్పను. కానీ 5, 6 స్థానాల్లో ఆడితే ఆలోచనా ధోరణి భిన్నంగా ఉండాలి. బాల్‌ రివర్స్‌ స్వింగ్‌ అవుతుంది. ఫీల్డింగ్‌ పొజిషన్లు వేర్వేరుగా ఉంటాయి. అవన్నీ గమనించాలి. అవన్ని పక్కనబెడితే.. అంతర్జాతీయ క్రికెట్‌ ఆడుతున్నప్పుడు అవకాశాల కోసం ఎదురుచూడక తప్పదు. ఇది నాకో గొప్ప అవకాశం' అని అన్నాడు.

ఓపెనింగ్‌ భిన్నంగా ఉంటుంది

'టెస్టులో ఓపెనింగ్‌ స్థానం గురించి చాలా కాలంగా చర్చ జరుగుతోంది. వెస్టిండీస్‌ పర్యటనలో దీనిపై జట్టు మేనేజ్మెంట్ నాకు స్పష్టంగా చెప్పారు. రెండేళ్లుగా ఈ అవకాశం కోసం ఎదురుచూస్తున్నా. నేను ఓపెనింగ్‌ చేయాల్సి వస్తుందని ఇదివరకే ఊహించాను. అందుకు తగినట్టుగా సిద్ధమయ్యా. టెస్ట్ క్రికెట్లో ఓపెనింగ్‌ భిన్నంగా ఉంటుంది. మానసికంగా మెదడుకు శిక్షణనివ్వాలి. టెక్నిక్‌ పరంగా కొన్ని మార్పులు చేసుకోవాల్సి ఉంటుంది. కొత్త బంతిని ఎదుర్కొనేందుకు మానసికంగా సిద్ధంగా ఉండాలి' అని రోహిత్‌ తెలిపాడు.

క్రీజులో కుదురుకోవడానికి ప్రయత్నిస్తా

'ఏరుపు బంతి ఎక్కువ సేపు స్వింగ్‌ అవుతుంది. ఏ పరిస్థితుల్లోనైనా తొలుత బంతి స్వింగ్‌ అవుతుంది. ఇన్నింగ్స్ ఆరంభం అంత ఈజీ ఏం కాదు. శరీరానికి దగ్గరగా వచ్చే బంతుల్ని వదిలేయడం మంచింది. విశాఖ పిచ్‌ మందకొడిగా ఉంది. ఫీల్డర్లు వలయం లోపల ఉండడంతో పరుగులు చేయడం కష్టమని తెలుసు. అందుకే తొలుత క్రీజులో కుదురుకోవడానికి ప్రయత్నిస్తా. అనంతరం పరుగులు చెయ్యడానికి సిద్దమవుతా' అని రోహిత్‌ చెప్పుకొచ్చాడు.