భారత్-పాక్ మ్యాచ్: డ్రెస్సింగ్ రూమ్‌లో బైకాట్ టెన్షన్

Asia Cup 2025: ఆసియా కప్ 2025లో భారత్, పాకిస్థాన్ జట్ల మధ్య జరగబోయే హై-వోల్టేజ్ క్రికెట్ మ్యాచ్ కోస క్రీడా ప్రపంచం ఎంతగానో ఎదురుచూస్తోంది. నేడు(ఆదివారం) ఆదివారం ఇంటర్నేషనల్ క్రికెట్ స్టేడియంలో జరగనున్న ఈ మ్యాచ్‌ను కేవలం ఓ క్రీడా సంఘటనగా కాకుండా.. దేశాల మధ్య ఉన్న ఉద్రిక్తతల నేపథ్యంలో ఓ యుద్ధభూమిగా భావిస్తున్నారు. ఈ పరిస్థితి భారత డ్రెస్సింగ్ రూమ్‌లో కూడా స్పష్టంగా కనిపిస్తోంది.

'బైకాట్' ఎఫెక్ట్.. డ్రెస్సింగ్ రూమ్‌లో చర్చలు
ఇటీవల జరిగిన పహల్గాం ఉగ్రదాడి ఘటన నేపథ్యంలో భారత్‌లో ఈ మ్యాచ్‌ను బహిష్కరించాలనే పిలుపులు వచ్చాయి. దీని వల్ల అభిమానుల్లో ఉత్సాహం తగ్గి టికెట్లు అమ్ముడుపోవడం లేదని కొన్ని మీడియా నివేదికలు పేర్కొన్నాయి. ఈ ప్రచారం టీమిండియాపై కూడా ప్రభావం చూపింది. ఆటగాళ్లు తమ హెడ్ కోచ్ గౌతమ్ గంభీర్, ఇతర సిబ్బందితో ఈ అంశంపై సుదీర్ఘంగా చర్చించినట్లు తెలిసింది. సరిహద్దు ఘర్షణల వల్ల ఇప్పటికే చలించి ఉన్న యువ జట్టు, ఈ 'బైకాట్' పిలుపుల నేపథ్యంలో మరింత ఉద్వేగానికి లోనయ్యారు. ఈ ఒత్తిడి కారణంగానే మ్యాచ్‌కు ముందు జరిగిన ప్రెస్ కాన్ఫరెన్స్‌లో కెప్టెన్, కోచ్ లేదా ఏ ఇతర ఆటగాడు పాల్గొనలేదు.

అసిస్టెంట్ కోచ్ ర్యాన్ టెన్ డోస్చేట్ విశ్లేషణ
మ్యాచ్‌కు ముందు రోజు జరిగిన ప్రెస్ కాన్ఫరెన్స్‌లో.. టీమిండియా అసిస్టెంట్ కోచ్ ర్యాన్ టెన్ డోస్చేట్ మీడియా ప్రశ్నలను ఎదుర్కొన్నారు. గాయపడిన ప్రజల భావాలను ఆటగాళ్లు మైదానంలో వ్యక్తం చేస్తారా అని అడిగినప్పుడు, "అవును, చేస్తారని అనుకుంటున్నాను," అని ఆయన బదులిచ్చారు. ఇది చాలా సున్నితమైన అంశమని, భారత ప్రజల భావాలను, బాధలను ఆటగాళ్లు అర్థం చేసుకుంటారని చెప్పారు. ఒకానొక దశలో ఈ టోర్నమెంట్ జరుగుతుందో లేదో కూడా అనిశ్చితిలో ఉందని, కానీ ప్రభుత్వం నిర్ణయించిన మార్గంలోనే తాము ముందుకు సాగుతున్నామని ఆయన వివరించారు.

జట్టు సమావేశంలో ఈ పరిస్థితిని గురించి చర్చించామని, ఆటగాళ్లు తమ భావోద్వేగాలను పక్కన పెట్టి, రేపు తమ దేశం కోసం పూర్తి వృత్తిపరంగా ఆడతారని ఆయన స్పష్టం చేశారు. "క్రీడను రాజకీయాల నుంచి వేరు చేయాలనే అభిప్రాయం కూడా ఉంది. మేము ఆడే విధానం దేశం పట్ల మాకున్న గౌరవాన్ని ప్రదర్శిస్తుందని ఆశిస్తున్నాను," అని ఆయన అన్నారు. బీసీసీఐ, భారత ప్రభుత్వ నిర్ణయాలను తాము అనుసరిస్తున్నామని చెప్పారు.

గంభీర్ సందేశం.. భావోద్వేగాలను పక్కనపెట్టండి..
ర్యాన్ టెన్ డోస్చేట్ మాట్లాడుతూ.. హెడ్ కోచ్ గౌతమ్ గంభీర్ జట్టుకు ఇచ్చిన కీలక సందేశాన్ని పంచుకున్నారు. "ప్రజల భావోద్వేగాలు, బలమైన భావాల గురించి మాకు తెలుసు. అయితే మన నియంత్రణలో లేని విషయాల గురించి చింతించవద్దని గౌతీ (గంభీర్) చెప్పాడు. కేవలం క్రికెట్ పైనే దృష్టి పెట్టండి, భావోద్వేగాలను పక్కన పెట్టండి," అని గంభీర్ సూచించారు. ఆటగాళ్లు వృత్తిపరులని, ఈ పరిస్థితిని ఎలా ఎదుర్కోవాలో వారికి తెలుసని ఆయన నమ్మకం వ్యక్తం చేశారు.

భావోద్వేగాల యుద్ధభూమి
ర్యాన్ టెన్ డోస్చేట్‌కు ఇది రెండో భారత్-పాకిస్థాన్ మ్యాచ్ అయినప్పటికీ.. ఆయనకు ఈ మ్యాచ్‌లలో ఉండే ఉద్రిక్తత, ఒత్తిడి కొత్త అనుభవం. ఛాంపియన్స్ ట్రోఫీలో కూడా ఇలాంటి వాతావరణం ఉంటుందని ఊహించానని, కానీ అది ఇక్కడ అంతగా కనిపించలేదని ఆయన చెప్పారు. అయినప్పటికీ ఈ మ్యాచ్ కేవలం ఒక ఆట మాత్రమే కాదని, అది ఒక యుద్ధభూమి అని ఆయన భావించారు. మ్యాచ్‌లోని ప్రతి అడుగు, ప్రతి మాట ఎంతో బరువుగా ఉంటుందని ఆయన అనుభవంలోకి వచ్చింది.

తొలి మ్యాచ్‌లలో రెండు జట్ల విజయం
ఈ మెగా మ్యాచ్‌కు ముందు ఇరు జట్లు తమ తొలి మ్యాచ్‌లలో విజయం సాధించి మంచి ఆత్మవిశ్వాసంతో ఉన్నాయి. భారత్ తమ మొదటి మ్యాచ్‌లో యూఏఈపై 9 వికెట్ల తేడాతో ఈజీగా విజయం సాధించింది. మరోవైపు, పాకిస్తాన్ కూడా తమ తొలి మ్యాచ్‌లో ఒమన్‌ను ఓడించి సత్తా చాటింది. ఇప్పుడు ఈ ఆదివారం జరగనున్న మ్యాచ్‌లో ఏ జట్టు మెరుగైన ప్రదర్శనతో విజయం సాధించి, తమ ఆధిపత్యాన్ని నిరూపించుకుంటుందో చూడాలి.